 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, (ᕕᕝᕗᐊᕆ 24, 2003) - ᒥᓂᔅᑕ ᐱᓕᕆᐊᖃᖅᑐᖅ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᑭᐅᓪᕙᓐ ᐃᖕ ᐃᓇᖏᖅᓯᔪᖅ ᐃᖃᓗᐃᑦ ᐃᒡᓗᓕᕆᓂᕐᒧᑦ ᑲᑎᒪᔨᖏᓐᓂᒃ ᑕᒪᒃᑯᐊ ᑲᒪᒋᔭᐅᑦᓯᐊᖁᓪᓗᒋᑦ ᐃᒡᓗᖃᖅᑎᑦᓯᓂᖅ ᑭᒃᑯᑐᐃᓐᓇᕐᓂᒃ. ᒥᓂᔅᑕ ᐃᖕ ᖃᓄᐃᓕᐅᕆᐊᕈᑎᖃᓚᐅᖅᑐᖅ ᑲᑎᒪᔩᑦ ᓄᖅᑲᓚᐅᖅᑎᓪᓗᒋᑦ ᐅᓪᓗᒥ. ᑖᒃᑯᐊ ᓄᖅᑲᕐᓂᖏᑦ ᓴᖅᑭᓚᐅᖅᑐᑦ ᑖᓐᓇ ᒥᓂᔅᑕ ᐊᐱᕆᓚᐅᖅᑎᓪᓗᒍ ᑲᑎᒪᔩᑦ ᐃᓱᒪᓕᐅᕈᑎᖓᓐᓂᒃ ᑭᐳᒃᓯᖁᓪᓗᒍ ᐱᔾᔪᑎᒋᓪᓗᒍ ᐃᖅᑲᓇᐃᔭᖅᑏᑦ ᐊᑲᐅᙱᓕᐅᖃᑎᒌᖕᓂᖏᑦ. “ᖃᓄᖅ ᑲᒪᓂᕆᓚᐅᖅᑕᖏᑦ ᑖᒃᑯᐊ ᐃᒡᓗᓕᕆᓂᕐᒧᑦ ᑲᑎᒪᔩᑦ ᐅᓗᕆᐊᓇᕐᓂᖃᓚᐅᕐᒪᑕ ᑮᓇᐅᔭᑎᒍᑦ ᓵᔾᔪᑕᐅᔪᓐᓇᖅᑐᓂᒃ ᐃᒡᓗᓕᕆᔨᒃᑯᓐᓄᑦ,” ᒥᓂᔅᑕ ᐃᖕ ᐅᖃᖅᑲᐅᔪᖅ. “ᖃᐅᔨᒪᑐᐃᓐᓇᕈᓐᓇᖅᑲᐅᖏᓐᓇᒪ ᐊᒻᒪᓗ ᑕᒪᓐᓇ ᑲᔪᓯᑎᑐᐃᓐᓇᕐᓗᒍ. ᐱᔾᔪᑎᒋᓪᓗᒍ ᖃᓄᖅ ᑲᒪᒋᔭᐅᓚᐅᕐᓂᖓ ᑕᒪᑐᒪ, ᐅᒃᐱᕆᔪᓐᓃᓚᐅᕋᒃᑭᑦ ᑖᒃᑯᐊ ᑲᑎᒪᔩᑦ ᐊᐅᓚᑎᑦᓯᑦᓯᐊᕈᓐᓇᕐᓂᖏᑦ ᐊᒻᒪᓗ ᑲᒪᓗᑎᒡᓗ ᐃᒡᓗᓕᕆᔨᐅᔪᓂᒃ.” ᐊᑐᑲᐃᓐᓇᑐᐃᓐᓇᕐᓂᐊᕐᓗᒍ, ᒥᓂᔅᑕ ᐃᖕ ᑎᒃᑯᐊᖅᓯᔪᖅ ᑲᑎᒪᔨᐅᑲᐃᓐᓇᕐᓂᐊᖅᑐᓂᒃ ᑲᑎᒪᔨᖃᐅᖅᑐᑎᒃ ᐊᖓᔪᖅᑲᐅᑎᖏᓐᓂᒃ ᑖᒃᑯᐊ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ. ᑖᒃᑯᐊ ᑲᑎᒪᔨᐅᑲᐃᓐᓇᕐᓂᐊᖅᑐᑦ ᐃᓚᖃᖅᑐᑦ: ᐹᒻ ᕼᐊᐃᔅ ᐃᒃᓯᕙᐅᑕᐅᓪᓗᓂ, ᔪᐃ ᑖᒻᓴᓐ ᑐᒡᓕᐊ ᐃᒃᓯᕙᐅᑕᐅᑉ ᐊᒻᒪᓗ ᑏᕕᑦ ᐋᖁᐊᖅ ᐊᒻᒪᓗ ᑯᕆᔅ ᑖᓯ ᑲᑎᒪᔨᐅᓪᓗᑎᒃ. ᐊᑖᒍᑦ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᖏᑦᑕ ᐱᖁᔭᖏᑦ, ᑖᓐᓇ ᒥᓂᔅᑕ ᐱᔪᓐᓇᐅᑎᖃᕐᒪᑦ ᑎᒃᑯᐊᖅᓯᔪᓐᓇᖅᑐᓂᒃ, ᐲᖅᓯᔪᓐᓇᖅᑐᓂᓘᓐᓃᑦ ᑲᑎᒪᔩᑦ ᑎᒃᑯᐊᖅᑕᐅᓯᒪᓂᖏᓐᓂᒃ. ᑖᒃᑯᐊ ᑲᑎᒪᔨᐅᑲᐃᓐᓇᕐᓂᐊᖅᑐᑦ ᕿᓂᕐᓂᐊᖅᑐᑦ ᑭᒃᑯᑐᐃᓐᓇᕐᓂᒃ ᓂᕈᐊᒐᒃᓴᙳᕈᒪᔪᓂᒃ ᓄᑖᓄᑦ ᑲᑎᒪᔨᐅᓂᐊᖅᑐᓄᑦ ᐊᒻᒪ ᓇᒃᓯᐅᑎᓗᒋᑦ ᐊᑐᓕᖁᔭᐅᔪᑦ ᑎᒃᑯᐊᖅᑕᐅᖁᔭᐅᔪᑦ ᒥᓂᔅᑕᒧᑦ, ᐃᓱᒪᒃᓴᖅᓯᐅᕈᑎᒋᓂᐊᕐᒪᐅᒃ. ᑖᒃᑯᐊ ᓄᑖᑦ ᑲᑎᒪᔩᑦ ᐋᖅᑭᒃᓯᒪᓕᕐᓂᐊᖅᑐᑦ ᐊᐃᐳᕈ 1, 2003. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ: ᓃᓄ ᕙᐃᔅᓅᔅᑭ ᓄᓇᕗᑦ ᒐᕙᒪᖏᑦᑕ ᑐᓴᒐᒃᓴᓕᕆᔨᖏᑦ (867) 975-6001 |