 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᕕᕝᕗᐊᕆ 19, 2003)-ᓯᕗᓕᖅᑎ ᐹᓪ ᐅᑲᓕᖅ ᑎᒃᑯᐊᖅᓯᔪᖅ ᔭᐃᒥ ᐸᓛᕈᑎᒥᒃ, ᖃᐅᒪᑦᓯᐊᖅᑐᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᖓᑦ, ᐃᓂᐊᓄᑦ ᐊᖓᔪᖅᑳᖑᑲᐃᓐᓇᕐᓂᐊᕐᓗᓂ ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᓐᓄᑦ. “ᒥᔅᑕ ᐸᓛᕈᑎ ᑎᑎᕋᖅᑕᐅᓯᒪᔾᔪᑎᖃᖅᑐᖅ ᐊᐅᓚᓂᖃᑦᓯᐊᖃᑦᑕᕐᓂᖓᓂᒃ ᐊᒻᒪᓗ ᖃᐅᔨᒪᓂᖃᖅᑐᓂ ᑕᑯᒃᓴᐅᔪᓂᒃ ᓯᕗᓕᖅᑎᑦᓯᐊᕙᐅᔾᔪᑎᒋᓂᐊᖅᑕᖏᓐᓂᒃ ᐱᑕᖃᕆᐊᖃᖅᑐᓂᒃ ᑲᔪᓯᑎᑕᐅᓂᐊᖅᑎᓪᓗᒍ ᑕᒪᓐᓇ ᐋᖅᑭᒃᑕᐅᓂᖓ ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᑦ,” ᓯᕗᓕᖅᑎ ᐅᑲᓕᖅ ᐅᖃᖅᑲᐅᔪᖅ. ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᑦ ᑲᒪᒋᔭᖃᕐᓂᐊᖅᑐᑦ ᑯᐊᐳᕇᓴᒃᑯᑦ ᐊᑖᓃᑦᑐᓂᒃ ᓴᖅᑭᑎᑦᑎᔨᐅᓗᑎᒃ ᐊᒻᒪᓗ ᑐᓂᐅᖅᑲᐃᔨᐅᓗᑎᒃ ᐅᐊᔭᒃᑯᑦ ᐊᒻᒪᓗ ᓂᐅᕕᕐᓂᕐᒥᑦ ᐊᒻᒪᓗ ᑐᓂᐅᖅᑲᐃᓂᕐᒥᑦ ᐅᖅᓱᐊᓗᖃᕈᑕᐅᓂᐊᖅᑐᓂᒃ. ᑖᒃᑯᐊ ᑯᐊᐳᕇᓴᒃᑯᑦ ᓴᖅᑭᔮᖅᑎᑦᓯᓂᐊᕐᒥᔪᑦ ᐊᓯᐊᒎᕈᑕᐅᔪᓐᓇᖅᑐᓂᒃ ᐆᒻᒪᖅᑯᑎᖃᕐᓂᕐᒧᑦ. ᓴᖅᑭᑦᓯᓂᖅ ᐊᑲᐅᓈᕐᓂᖅᓴᐅᔪᒥᒃ ᐊᐅᓚᔾᔪᑎᓂᒃ, ᑖᒃᑯᐊ ᑯᐊᐳᕇᓴᒃᑯᑦ ᐃᑲᔫᑎᓂᐊᖅᑐᑦ ᖃᐅᔨᒻᒪᕆᒐᓱᐊᖅᑎᓪᓗᒋᑦ ᐊᑭᒻᒪᕆᐅᓂᐊᖅᑐᓂᒃ ᐆᒻᒪᖅᑯᑎᖃᕐᓂᖓᓄᑦ ᓄᓇᕗᑦ ᐊᒻᒪᓗ ᐃᑲᔫᑎᓗᑎᒃ ᐊᕕᒃᑐᖅᓯᒪᓂᐅᔪᒧᑦ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᐊᓯᐊᒎᕈᑕᐅᔪᓐᓇᖅᑐᓂᒃ ᐆᒻᒪᖅᑯᑎᖃᕐᓂᕐᒧᑦ. “ᒐᕙᒪᕗᑦ ᓴᖅᑭᑎᑦᑎᓂᐊᕐᒪᑕ ᐱᖁᔭᒃᓴᓂᒃ ᒫᑦᓯ ᑲᑎᒪᓂᖃᖅᑎᓪᓗᒍ ᒪᓕᒐᓕᐅᕐᕕᒃ ᓴᖅᑭᑎᑦᑎᓂᐊᕐᓗᑎᒃ ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᓐᓂᒃ,” ᓯᕗᓕᖅᑎ ᐅᑲᓕᖅ ᐅᖃᖅᑲᐅᔪᖅ. ᒥᔅᑕ ᐸᓛᕈᑎ ᐃᓅᓕᓚᐅᖅᑐᖅ ᐊᐅᓱᐃᑦᑐᒥ. ᐃᓕᓐᓂᐊᕆᐊᓚᐅᕆᓪᓗᓂ ᐃᓕᓐᓂᐊᕐᕕᐊᓗᖕᒥ ᐃᖃᓗᖕᓂ, ᐊᒻᒪᓗ ᕿᔪᓕᕆᔨᐅᓂᕐᒥᑦ ᐃᓕᓐᓂᐊᓕᕆᓪᓗᓂ ᒐᕙᒪᑐᖃᒃᑯᓐᓂ. ᕿᔪᓕᕆᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᑐᖅ. ᐱᒋᐊᓚᐅᖅᓯᒪᔪᖅ ᐃᖅᑲᓇᐃᔮᒥᓂᒃ ᓄᓇᑦᓯᐊᑉ ᒐᕙᒪᖏᓐᓄᑦ ᐃᖅᑲᓇᐃᔭᖅᑎᕈᖅᑦᑐᓂ, ᒐᕙᒪᒃᑯᑦ ᓴᓇᔪᓕᕆᔨᖏᓐᓄᑦ, ᐃᒡᓗᓕᕆᔨᕐᔪᐊᒃᑯᓐᓂ. ᓄᒃᑎᓕᓚᐅᕐᒥᔪᖅ ᒐᕙᒪᑐᖃᒃᑯᑦ, ᓴᓇᔪᓕᕆᔨᖏᓐᓄᑦ ᐊᒻᒪᓗ ᒐᕙᒪᑐᖃᒃᑯᑦ ᐱᔨᑦᓯᕋᖅᑎᖏᓐᓄᑦ, ᓯᕗᓪᓕᕐᒥ ᐋᑐᕚᒨᓚᐅᖅᑐᖅ ᐃᑲᔪᖅᑎᐅᓪᓗᓂ ᒐᕙᒪᑐᖃᒃᑯᓐᓂ ᐃᒡᓗᒋᔭᐅᒋᐊᓕᖕᓂᑦ ᒪᑭᒪᔾᔪᑎᒃᓴᓂᒃ ᐸᕐᓇᒃᑎᐅᖃᑕᐅᓪᓗᓂ, ᓄᒃᑎᓚᐅᕋᓂ ᐃᖃᓗᖕᓄᑦ. ᒥᔅᑕ ᐸᓛᕈᑎ ᐱᒋᐊᓚᐅᖅᑐᖅ ᓄᓇᕗᑦ ᒐᕙᒪᖏᓐᓄᑦ ᔪᓚᐃ 1999. ᑐᖏᓕᕆᔭᐅᓪᓗᓂ, ᑐᒡᓕᐊᓄᑦ ᒥᓂᔅᑕᐅᑉ, ᒐᕙᒪᒃᑯᑦ ᓴᓇᔪᓕᕆᔨᖏᓐᓂ ᐊᒻᒪᓗ ᓄᒃᑎᓕᓚᐅᕐᒥᔪᖅ ᒐᕙᒪᒃᑯᑦ ᐃᖅᑲᓇᐃᔭᖅᑐᓕᕆᔨᖏᓐᓄᑦ ᑐᖏᓕᐅᓪᓗᓂ ᑐᒡᓕᐊᓄᑦ ᒥᓂᔅᑕᐅᑉ ᐅᑎᓚᐅᕋᓂ ᒐᕙᒪᒃᑯᑦ ᓴᓇᔪᓕᕆᔨᖏᓐᓄᑦ. ᒥᔅᑕ ᐸᓛᕈᑎ ᐃᓚᒋᔭᐅᓚᐅᖅᑐᖅ ᓄᓇᕗᒥ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑲᑎᒪᔨᓂᒃ, ᐃᒃᓯᕙᐅᑕᕆᔭᐅᓪᓗᓂ ᐱᓕᕆᕕᐅᔪᓂ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔨᕋᓛᕆᔭᐅᔪᓄᑦ, ᐃᒃᓯᕙᐅᑕᐅᖃᑕᐅᓪᓗᓂ ᓄᓇᕗᒥ ᐊᒡᒍᖅᓯᒪᔪᓂᒃ ᐃᓗᒋᔭᐅᒋᐊᖃᖅᑐᓄᑦ ᐃᑲᔫᑎᓂ ᐊᒻᒪᓗ ᐃᓚᒋᔭᐅᓚᐅᖅᑐᖅ ᑕᒪᒃᑮᖕᓄᑦ ᐃᖃᓗᐃᑦ ᐸᕐᓇᐃᔨᖏᑦᑕ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑲᑎᒪᔨᖏᓐᓂᒃ ᐋᖅᑭᒋᐊᕈᑎᒃᓴᖏᓐᓄᑦ ᓯᑎᐊᑕ ᐃᖃᓗᐃᑦ. ᒥᔅᑕ ᐸᓛᕈᑎ ᐃᖃᓗᖕᒥᐅᖅ, ᖃᑕᙳᑎᖏᓪᓗ ᐊᒻᒪᓗ ᐃᓕᓐᓂᐊᕌᓂᖃᑕᐅᓯᒪᓪᓗᓂ ᓯᕗᓕᐅᖅᑎᕈᖅᓴᕐᓂᕐᒧᑦ ᐃᓕᓐᓂᐊᕈᑕᐅᓚᐅᖅᑐᓂᒃ. ᖃᓄᐃᑦᑑᓯᒪᓂᖓ: ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᓐ ᑐᓴᒐᒃᓴᓕᕆᔩᑦ ᐅᖃᕐᕕᖃᕈᓐᓇᖅᑐᑦ, ᓃᓄ ᕙᐃᓅᔅᑭ ᓄᓇᕗᑦ ᒐᕙᒪᖏᑦᑕ ᑐᓴᒐᒃᓴᓕᕆᔨᖏᑦ (867)975-6001 |