 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᑲᑎᒪᖃᑎᖃᕋᓱᐊᖅᑐᑦ ᑲᓇᑕᐅᑉ ᐊᖓᔪᖅᑳᒻᒪᕆᐊᓂᒃ ᐋᖅᑭᒐᓱᐊᖅᑐᒍ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᕐᔪᐊᕈᑕᐅᔪᖅ ᐅᑭᐅᖅᑕᖅᑐᒥ ᐋᑐᕚ, ᕕᕝᕗᐊᕆ 17, 2003 - ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ ᓯᕗᓕᖅᑎᐅᔪᑦ ᐅᑎᖅᓯᒪᓕᖅᐳᑦ ᐋᑐᕚᒧᑦ ᓂᕆᐅᒍᒪᓪᓗᑎᒃ ᑲᓇᑕᐅᑉ ᐊᖓᔪᖅᑳᒻᒪᕆᐊᓂᒃ ᔩᓐ ᑯᕆᑦᓯᐃᐊᓐ ᑲᑎᒪᖃᑎᖃᕈᒪᓪᓗᑎᒃ ᑭᐅᖁᓪᓗᒍ ᑐᒃᓯᕋᐅᑎᒋᓯᒪᔭᖏᓐᓂᒃ ᑲᑎᒪᖃᑎᖃᕈᒪᑎᓪᓗᒋᑦ ᐅᖃᐅᓯᐅᖃᕐᓂᐊᕐᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᕕᒡᔪᐊᕈᑕᐅᔪᒥᒃ ᐅᑭᐅᖅᑕᖅᑐᒧᑦ. ᑖᒃᑯᐊ ᐱᖓᓱᑦ ᓯᕗᓕᖅᑏᑦ ᐊᖏᕈᑎᖃᓚᐅᙱᒻᒪᑕ ᐊᖏᖃᑎᒌᒍᑕᐅᓂᖓᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᕈᑕᐅᔪᖅ ᑲᑎᒪᓂᖃᖅᑎᓪᓗᒋᑦ ᑲᓇᑕᐅᑉ ᒥᓂᔅᑕᖏᑦ ᐋᑐᕚᒥ ᕕᕝᕗᐊᕆ 5-ᒥ. ᑖᒃᑯᐊ ᑮᓇᐅᔭᖅᑑᑎᒃᓴᑦ ᒪᓂᒪᑎᑕᐅᔪᑦ ᐊᑭᓖᔪᓐᓇᕋᔭᓚᐅᙱᑦᑐᓪᓘᓐᓃᑦ ᐱᓇᓱᐊᕈᓯᕐᒥᒃ ᐊᑕᐅᓯᕐᒥ ᐋᓐᓂᐊᖃᕐᓇᖏᑦᑐᓕᕆᔾᔪᑕᐅᕙᒃᑐᓂᒃ ᐱᖓᓱᓂ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ, ᐃᑲᔪᖅᓱᐃᔾᔪᑕᐅᓂᐊᖅᑐᓪᓘᓐᓃᑦ ᓄᑖᑦ ᐃᑲᔫᑕᐅᔪᑦ ᐅᖃᐅᓯᐅᓯᒪᔪᑦ ᐊᖏᕈᑎᓂ. “ᑕᒪᓐᓇ ᑐᐊᕕᕐᓇᕐᓂᖅᐹᖑᖕᒪᑦ, ᐊᑐᖅᑕᐅᖃᑦᑕᖅᑐᑦ ᓴᖅᑭᓯᒪᔪᑦ ᐊᕕᒃᑐᖅᓯᒪᓂᐅᔪᓂ,” ᓄᓇᑦᓯᐊᑉ ᓯᕗᓕᖅᑎᖓᑦ ᓯᑏᕙᓐ ᑳᒃᕖ ᐅᖃᖅᑲᐅᔪᖅ. “ᓂᕆᐅᒍᒪᔪᒍᑦ ᒪᓂᒪᓗᑕ ᐋᑐᕚᒥ, ᑖᓐᓇ ᑲᓇᑕᐅᑉ ᐊᖓᔪᖅᑳᒻᒪᕆᐊᑦ ᑭᐅᔪᓐᓇᖅᓯᖁᓪᓗᒍ ᑐᒃᓯᕋᐅᑎᑦᑎᓐᓄᑦ ᑲᑎᒪᖃᑎᖃᕈᒪᓂᑦᑎᓐᓄᑦ ᐊᒻᒪᓗ ᑕᒪᓐᓇ ᑮᓇᐅᔭᖅᑑᑎᒃᓴᓕᕆᓂᖅ ᐋᖅᑭᒍᒪᓪᓗᒍ.” “ᓂᕆᐅᖕᓂᖃᕈᒪᔪᒍᑦ ᓱᓕ ᑖᓐᓇ ᑲᓇᑕᐅᑉ ᐊᖓᔪᖅᑳᒻᒪᕆᐊᑦ ᓱᓕᖁᓪᓗᒍ ᐅᖃᓚᐅᖅᑕᒥᓂᒃ, ᐃᑲᔪᕈᒪᓂᕆᓚᐅᖅᑕᖓ ᐃᓄᖏᓐᓂᒃ ᐅᑭᐅᖅᑕᖅᑑᑉ,” ᓄᓇᕗᑦ ᓯᕗᓕᖅᑎᖓᑦ ᐹᓪ ᐅᑲᓕᖅ ᐅᖃᖅᑲᐅᔪᖅ. “ᐊᐱᕆᑐᐃᓐᓇᕋᑦᑎᒍ ᐃᑲᔪᖅᑕᐅᔪᒪᓪᓗᑕ ᑕᒪᒃᑯᐊ ᑲᓇᑕᐅᒥᐅᑦ ᐅᑭᐅᖅᑕᖅᑐᒥᐅᑕᐅᔪᑦ ᑕᐃᒫᑦᓴᐃᓐᓇᖅ ᓇᓕᒧᒋᔭᐅᔪᒥᒃ ᐋᓐᓂᐊᖃᕐᓇᖏᑦᑐᓕᕆᔭᐅᖁᓪᓗᒋᑦ ᑲᓇᑕᒥᐅᑎᑐᑦ.” ᓯᕗᓕᖅᑎ ᑎᓂᔅ ᐱᓐᑎ ᐃᓚᓕᐅᑎᔪᓐᓇᖏᒻᒪᑦ ᓯᕗᓕᖅᑎᐅᖃᑎᒥᓄᑦ ᐋᑐᕚᒥ ᐅᓪᓗᒥ ᐱᔾᔪᑎᒋᓪᓗᒍ ᒐᕙᒪᖏᓐᓂ ᐱᓕᕆᐊᒃᓴᖏᑦ. ᐃᓚᓕᐅᑎᓂᐊᖅᑐᖅ ᑭᓯᐊᓂ ᑕᓚᕖᓴᒃᑯᑦ ᐊᒻᒪᓗ ᐅᖄᓚᐅᑎᒃᑯᑦ ᑲᑎᒪᓂᖃᓕᖅᐸᑕ ᐊᒻᒪᓗ ᑐᓴᖃᑦᑕᐅᑎᓕᕆᔨᓄᑦ ᐊᐱᖅᓱᖅᑕᐅᔪᓐᓇᕐᓗᓂ. “ᓇᓗᓇᐃᖅᓯᒪᕗᖓ ᓯᕗᓕᖅᑎᐅᖃᑎᒃᑲᓄᑦ ᐃᓚᐅᒐᒪ ᑕᕐᓂᒃᑯᑦ ᐃᓱᒪᒃᑯᑦ. ᑖᒃᑯᐊ ᐱᖓᓱᑦ ᐊᕕᒃᑐᖅᓯᒪᓂᐅᔪᑦ ᑕᐱᕇᑦᓯᐊᖅᑐᑦ ᑕᒪᓐᓇ ᐱᔾᔪᑎᒋᓪᓗᒍ.” ᓯᕗᓕᖅᑎ ᐱᓐᑎ ᐅᖃᖅᑲᐅᔪᖅ ᕙᐃᑦᕼᐅᐊᔅᒥᑦ. “ᐱᑕᖃᖅᑎᓐᓇᒍ ᓄᑖᓂ ᑮᓇᐅᔭᖅᑑᑎᒃᓴᓂᒃ ᐋᖅᑭᐅᒪᑎᑦᓯᔪᓐᓇᔾᔮᖏᓐᓇᑦᑕ ᐱᔨᑦᓯᕋᐅᑎᒋᕙᒃᑕᑦᑎᓐᓂᒃ ᒫᓐᓇᐅᔪᖅ, ᐊᑐᓕᖅᑎᑦᓯᔪᓐᓇᔾᔮᒐᑕᓗ ᓄᑖᒥᒃ ᐊᖏᕈᑕᐅᔪᒥᒃ.” ᐱᔾᔪᑎᒋᓪᓗᒍ ᑭᐅᔭᐅᓯᒪᙱᓐᓂᖏᑦ ᑲᑎᒪᖃᑎᖃᕈᒪᓂᖏᓐᓄᑦ ᑲᓇᑕᐅᑉ ᐊᖓᔪᖅᑳᒻᒪᕆᐊᓂᒃ, ᓯᕗᓕᖅᑎ ᑳᒃᕖ ᐊᒻᒪᓗ ᐅᑲᓕᖅ ᐅᑎᖅᑲᐅᔪᖅ ᐋᑐᕚᒧᑦ ᐅᖃᕆᐊᒃᑲᓐᓂᕆᐊᖅᑐᖅᑐᑎᒃ ᑕᒪᑐᒪ ᑐᐊᕕᕐᓇᕐᓂᖓᓂᒃ ᐃᓱᒫᓘᑎᖏᑦᑕ. ᐊᒻᒪᑦᑕᐅᖅ, ᓇᓗᓇᐃᖅᑕᐅᓯᒪᔪᒥᒃ ᓴᖅᑭᑎᑦᑎᓯᒪᙱᒻᒪᑕ ᒐᕙᒪᑐᖃᒃᑯᑦ, ᑖᒃᑯᐊ ᓯᕗᓕᖅᑏᑦ ᐊᖓᔪᖅᑲᐅᑎᖁᑎᒥᓂ ᐋᖅᑐᕚᒦᑎᑦᑎᔪᑦ ᑕᐃᒪᙵᓂᒃ ᕕᕝᕗᐊᕆ 5,-ᒥ ᑲᑎᒪᓚᐅᖅᑎᓪᓗᒋᑦ ᑲᓇᑕᒥ ᒥᓂᔅᑕᐅᔪᑦ ᓯᕗᓕᖅᑎᐅᔪᑦ. “ᐅᒡᒍᐊᕐᓇᖅᐳᖅ, ᓲᕐᓗ ᑕᒪᓐᓇ ᓴᖅᑭᓯᒪᔪᖅ ᐅᑭᐅᖅᑕᖅᑐᒥ ᑐᓴᕈᑕᐅᙱᒻᒪᑦ ᒐᕙᒪᑐᖃᒃᑯᓐᓄᑦ. ᑕᒫᓃᓐᓂᐊᖅᑐᒍᑦ ᑕᒫᓂ ᐱᓇᓱᐊᕈᓯᕐᒥ ᐊᓯᔾᔩᒐᓱᐊᖅᑎᓪᓗᒋᑦ ᒐᕙᒪᒃᑯᑦ ᐃᓱᒪᖏᓐᓂᒃ ᐊᒻᒪᓗ ᑭᐳᒍᒪᓪᓗᒍ ᖁᔭᓈᖅᑕᐅᓯᒪᔫᔮᕐᓂᖓ ᐅᑭᐅᖅᑕᖅᑑᑉ ᒫᓐᓇᐅᔪᖅ ᓴᖅᑭᓯᒪᔪᑦ” ᓯᕗᓕᖅᑎ ᐅᑲᓕᖅ ᐅᖃᖅᑲᐅᔪᖅ. “ᐅᖃᓕᒪᒍᓐᓇᑦᓯᐊᓕᖅᑐᒍᑦ ᒪᓂᒪᔪᒍᑦ, ᖃᖓᑐᐃᓐᓇᖅ, ᓇᒥᑐᐃᓐᓇᖅ, ᐊᑑᑎᖃᖅᑐᓂᒃ ᓴᖅᑭᑎᑕᐅᔪᖃᕐᓂᐊᖅᐸᑦ,” ᓯᕗᓕᖅᑎ ᑳᒃᕖ ᐅᖃᖅᑲᐅᔪᖅ. ᐆᒃᑑᑎᒋᓗᒋᑦ ᐊᒃᓱᕉᑕᐅᔪᑦ ᓴᖅᑭᓯᒪᔪᑦ ᑲᓇᑕᐅᒥᐅᓄᑦ ᐅᑭᐅᖅᑕᖅᑐᒥ ᐃᓚᖃᖅᑐᑦ:
ᐊᓂᑦ ᕘᔅᕗᐊ ᑐᓴᒐᒃᓴᓕᕆᔨ ᐊᓪᓚᒡᕕᐊ ᓯᕗᓕᖅᑎᐅᑉ ᓄᓇᕗᑦ ᒐᕙᒪᖏᑦ ᐅᖃᓘᑖ: (867) 975-1317 613-223-9890 ᑐᕉ ᕕᓕᐊᒻᔅ ᑐᓴᒐᒃᓴᓕᕆᔩᑦ ᐊᓪᓚᒡᕕᐊ ᓯᕗᓕᖅᑏᑦ ᓄᓇᑦᓯᐊᑉ ᒐᕙᒪᖏᑦ ᐅᖃᓘᑖ: (867) 669-2304 ᐋᓐᑐᕆᐊ ᕙᒃᓕ ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᓂᖅ ᐊᐅᓚᑦᑎᔩᑦ ᑲᑎᒪᔨᖏᑦᑕ ᐊᓪᓚᒡᕕᐊ ᔪᑳᓐ ᒐᕙᒪᖏᑦ ᐅᖃᓘᑖ: (867) 667-5270 |