 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ(ᕕᕝᕗᐊᕆ 12, 2003) - ᓂᐅᕕᖅᑕᐅᖃᑦᑕᕐᓂᖏᑦ ᓄᓇᕗᒥ ᕿᓰᑦ ᐅᑎᖅᑎᑦᓯᕙᓪᓕᐊᔪᖅ ᓇᑦᓯᓕᕆᓂᕐᒥᑦ, ᐅᖃᖅᑲᐅᔪᖅ ᐃᑯᐱᒃᑐᓕᕆᔨᒃᑯᑦ ᒥᓂᔅᑕᖓᑦ ᐅᓛᔪᒃ ᐊᑭᓱᒃ. ᐅᑎᖅᐸᓪᓕᐊᓂᖓ ᓇᓗᓇᕈᓐᓃᖅᐸᓪᓕᐊᔪᑦ ᓄᓇᕗᒥ ᓇᑦᓯᕐᓂᒃ ᓂᐅᕈᑎᖃᕐᓂᖅ ᑎᓰᕙᒥ 2002-ᒥ ᐊᑭᑦᑐᕋᐅᑎᔪᓄᑦ ᓂᐅᕕᕋᓱᐊᖅᑐᓄᑦ ᓇᓕᑭᑎᓱ ᕼᖑᓯ, ᐋᓐᑎᐅᕆᔪᒥ ᐅᖃᖅᑲᐅᔪᖅ ᒥᓂᔅᑕ ᐊᑭᓱᒃ. ᓄᓇᕗᒥ ᕿᓰ ᓂᐅᕈᑕᐅᔪᑦ ᐊᑭᖃᕋᔪᓕᖅᑐᑦ $63 ᐊᑕᐅᓯᖅ ᕿᓯᒃ ᑎᓰᕝᕙᐅᓚᐅᖅᑐᒥ, ᓴᓂᐊᓂᒃ ᐊᑭᓕᐅᑕᐅᒐᔪᓚᐅᖅᑐᑦ $20 ᑕᒪᒃᑯᐊ ᐊᕐᕌᒍᐃᑦ 1990-ᐊᑐᖅᑎᓪᓗᒋᑦ. ᑲᑎᑦᑐᒋᑦ 2002-ᒥ ᓂᐅᕈᑕᐅᔪᑦ ᖄᖏᓚᐅᖅᑐᑦ $500,000 ᐊᒻᒪᓗ ᒪᕐᕈᐃᖅᑐᓂ ᐊᖏᓪᓕᕚᓪᓕᑲᓴᒃᑐᖅ 2001-ᒥ ᐊᑭᑦᑐᕋᐅᑎᓂᐅᓚᐅᖅᑐᒥ ᓂᐅᕕᕋᓱᐊᖅᑐᓄᑦ. ᐊᕐᕌᓂ ᑭᒡᒐᖅᑐᐃᔪᖅ ᓴᒪᓐᓇ ᖁᑦᑎᖕᓂᖅᐹᖑᓂᖓᓂᒃ ᐊᕐᕌᒍᐃᑦ ᖁᓖᑦ ᐊᑐᖅᑎᓪᓗᒋᑦ ᕿᓯᖕᓂᑦ ᓂᐅᕈᑎᖃᕐᓂᖅ. “ᖁᕕᐊᓱᒻᒪᕆᒃᑐᒍᑦ ᑕᑯᒋᐊᒃᓴᖅ ᑲᔪᓯᑎᑕᐅᓂᖏᓐᓂᒃ ᓄᓇᕗᒥ ᕿᓰᑦ ᓂᐅᕈᑕᐅᖃᑦᑕᕐᓂᖏᑦ ᐊᑭᑦᑐᖅᑕᐅᕙᒃᑐᑎᒃ ᓂᐅᕕᕋᓱᐊᖅᑐᓂᒃ ᐊᑭᑦᑐᕋᐅᑎᓪᓗᑎᒃ ᐊᕐᕌᒍᑕᒫᑦ ᐊᒥᕐᓂᒃ ᓂᐅᕕᕋᓱᐊᕐᓂᓐᐅᕙᒃᑐᓂ. ᑕᒪᑐᒪ ᐊᐅᓚᑦᓯᐊᕐᓂᖓ ᓴᖅᑭᑎᑕᐅᓯᒪᔪᖅ ᐊᕐᕌᒍᒐᓴᖕᓂᑦ ᐊᑎᖅᑎᑦᓯᒐᓱᐊᖅᓯᒪᓂᖓ ᓇᑦᓯᓕᕆᓂᕐᒥᑦ ᓄᓇᕗᑦ,” ᒥᓂᔅᑕ ᐊᑭᓱᒃ ᐅᖃᖅᑲᐅᔪᖅ. “ᑕᒪᒃᑯᐊ ᓂᐅᕕᖃᑦᑕᕐᓃᑦ ᓴᖅᑭᑉᐸᓪᓕᐊᓂᖏᑦ ᐊᖑᓇᓱᒃᑎᓂᒃ ᑮᓇᐅᔭᓕᐅᕈᑕᐅᔪᓐᓇᖅᓯᒪᔪᖅ, ᐋᖅᑭᐅᒪᑎᑕᐅᖏᓐᓇᖅᑐᓂ ᐃᓕᖅᑯᓯᑐᖃᒃᑯᑦ ᐃᓅᒐᓱᐊᕐᓂᖅ.” ᓄᓇᕗᒥ ᓇᑦᓰᑦ ᐊᑭᖏᑦ ᐅᓄᖅᓯᕙᓪᓕᐊᓯᒪᖕᒪᑕ ᑕᐃᒪᙵᓂᒃ ᐃᑯᐱᒃᑐᕆᔨᒃᑯᑦ ᐊᑐᓕᖅᑎᑦᑎᓚᐅᖅᓯᒪᖕᒪᑕ ᓇᑦᓰᑦ ᕿᓯᖏᓐᓂᒃ ᓂᐅᕕᖃᑦᑕᕐᓂᖅ ᐊᒥᕐᓕᖕᓂᖅ ᓂᐅᕕᖃᑦᑕᕈᑎᑎᒍᑦ 1995-ᒥ. ᐃᓚᐅᓪᓗᓂ ᑖᒃᑯᓂ ᐊᒥᓕᖕᓂᑦ ᐊᑭᑦᑐᕋᐅᑎᓂᕐᒧᑦ ᑲᑐᔾᔨᖃᑎᒌᑦ, ᓄᓇᕗᑦ ᓴᖅᑭᑦᑎᓚᐅᕐᒪᑕ ᓂᐅᕈᑎᒋᒐᓱᐊᖅᑐᒋᑦ ᓈᒻᒪᒃᑐᓂᒃ ᐊᒥᓲᓂᖏᑦ ᓂᐅᕕᕈᒪᔪᓄᑦ. ᑕᒪᒃᑯᐊ ᐊᑭᑦᑐᕋᐅᑎᔪᑦ ᑲᔪᓯᓯᒪᔪᖅ ᓴᖅᑭᔮᖅᑎᑦᓯᓪᓗᓂ ᓄᓇᕗᒥ ᕿᓰᑦ ᐱᐅᔪᒻᒪᕆᐅᓂᖏᓐᓂᒃ ᓴᖅᑭᑎᑕᐅᔪᑦ ᓄᓇᖃᖅᑳᖅᓯᒪᔪᓄᑦ. ᑕᒫᓃᑦᑐᑦ 10,000 ᓄᓇᕗᒥ ᕿᓰᑦ ᐊᐅᓪᓚᖅᑎᑕᐅᓚᐅᖅᑐᑦ 2002-ᒥ ᐊᑭᑦᑐᕋᐅᑎᔪᓄᑦ. ᒪᓕᒃᑐᒋᑦ ᐱᒍᒪᓂᖏᑦ ᑕᕆᐅᑉ ᐊᑭᐊᓂᒥᐅᑦ ᓄᓇᕗᑦ ᕿᓯᖏᓐᓂᒃ, ᒪᕐᕉᒃ ᑎᓐᒫᒥᐅᑦ (ᕈᕿᓴᒪᖑᑭᓄ) ᓂᐅᕕᖅᓯᒪᔪᑦ ᐅᖓᑖᓄᑦ 90-%5-ᖏᓐᓂᒃ ᑕᒄᑯᐊ ᕿᓰᑦ ᓂᐅᕈᑕᐅᓚᐅᖅᑐᑦ ᑎᓰᕝᕙᒥ. ᑕᒪᓐᓇ ᐅᑎᖅᑎᒃᑲᓐᓂᕈᒪᓪᓗᒍ ᓂᐅᕈᑎᖃᖃᑦᑕᕐᓂᖅ, ᓴᖅᑭᑦᑎᕙᓪᓕᐊᓗᓂ ᐱᐅᓂᖅᐹᓂᒃ ᕿᓯᑦᓯᐊᕙᖕᓂᑦ ᑕᒪᒃᑯᓄᖓ ᓂᐅᕕᖅᑎᐅᕙᒃᑐᓄᑦ, ᐃᑯᐱᒃᑐᓕᕆᔨᒃᑯᑦ ᓴᖅᑭᑎᑦᑎᓚᐅᖅᑐᑦ ᓄᑖᓂᒃ ᓇᓗᓇᐃᔭᐃᔾᔪᑎᓂᒃ ᓇᓪᓕᐊᒃ ᕿᓰᑦ ᐱᐅᓂᖅᓴᐅᓂᖏᓐᓂᒃ ᐱᐅᙱᓐᓂᖅᓴᐅᓂᖏᓐᓄᓪᓗ ᒪᐃ 2002-ᒥ. ᐊᑭᓖᑐᐃᓐᓇᖃᑦᑕᕋᓂ $30-ᓂᒃ, ᐊᑭᓕᐅᑕᐅᕙᓚᐅᖅᑐᖅ ᐊᖑᓇᓱᒃᑎᓄᑦ ᐊᑐᓂ ᕿᓯᖕᓄᑦ, ᑕᒪᓐᓇ ᓄᑖᖅ ᐊᑐᖅᑕᐅᔪᖅ ᐊᔾᔨᒌᙱᑦᑐᓂᒃ ᐊᑭᓕᖅᑕᐅᔾᔪᑕᐅᕙᒃᑐᖅ ᒪᓕᒃᑐᒋᑦ ᐱᐅᓂᖏᑦ, ᐊᖏᓂᖏᓪᓗ. ᐊᑭᖏᑦ ᑕᒫᓂᖃᑦᑕᖅᑐᑦ $25 ᐊᑭᑭᓐᓂᖅᐹᖑᓪᓗᓂ, ᐱᐅᓂᖅᐹᒧᑦ ᑎᑭᖃᑦᑕᖅᓱᓂ $60 ᐊᑕᐅᓯᕐᒧᑦ ᕿᓯᖕᒧᑦ. “ᑕᒪᓐᓇ ᓄᑖᖅ ᓇᓗᓇᐃᔭᐃᔾᔪᑦ ᓴᖅᑭᑎᑦᑎᕙᒃᑐᖅ ᓂᐅᕕᖅᑎᓄᑦ ᐱᐅᔪᒻᒪᕆᖕᓂᑦ ᕿᓯᖕᓂᑦ ᐊᒻᒪᓗ ᑕᒪᑐᒥᖓ ᓇᑦᓯᓕᕆᓂᕐᒥᑦ ᑮᓇᐅᔭᓕᐅᖅᑎᑦᓯᕙᓪᓕᐊᓪᓗᑎᒃ ᐊᖑᓇᓱᒃᑏᑦ ᐱᓕᕆᓂᖏᑎᒍᑦ,” ᒥᓂᔅᑕ ᐊᑭᓱᒃ ᐅᖃᖅᑲᐅᔪᖅ. ᓇᑦᓯᕋᓱᐊᕐᓂᖅ ᐊᑕᓂᖃᒻᒪᕆᖕᒪᑦ ᐃᓄᐃᑦ ᐃᓕᖅᑯᓯᖏᓐᓄᑦ ᐊᒻᒪᓗ ᑖᒃᑯᐊ ᓄᓇᕗᑦ ᒐᕙᒪᖏᑦ ᐊᐅᓚᑦᓯᓂᖃᑦᓯᐊᕈᒪᔪᑦ ᑕᒪᓐᓇ ᐋᖅᑭᐅᒪᑦᓯᐊᕈᓐᓇᖁᓪᓗᒍ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ, ᐅᖃᕐᕕᒋᓗᒍ: ᑭᐅᕆ ᒪᑲᓚᔅᑭ ᑐᓴᒐᒃᓴᓕᕆᓂᕐᒧᑦ, ᐊᐅᓚᑦᑎᔨ ᐃᑯᐱᒃᑐᓕᕆᔨᒃᑯᑦ ᓄᓇᕗᑦ ᒐᕙᒪᖏᑦ ᐅᖃᓘᑖ: (867) 975-5929 ᓱᑲᑦᑐᒃᑯᑦ: (867) 975-5980 ᖃᕆᓴᐅᔭᒃᑯᑦ: kmccluskey@gov.nu.ca |