 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᐋᒡᒌᓯ 6, 2003)- 21ᖑᓚᐅᖅᑐᑦ ᑐᓵᔩᑦ ᑐᑭᓕᐅᖅᑎᓪᓗ, ᐅᖃᐅᓯᓕᕆᔩᑦ ᐊᒻᒪᓗ ᐃᓐᓇᕆᔭᐅᔪᑦ ᓄᓇᕗᒻᒥᓕᒫᕐᒥᙶᖅᓯᒪᓚᐅᖅᑐᑦ ᐋᖅᑭᒃᓯᓚᐅᕐᒪᑕ 80 ᐅᖓᑖᓃᑦᑐᓂᒃ ᐅᖃᐅᓯᕐᓂᒃ ᐃᓄᒃᑎᑐᑦ ᐃᓄᐃᓐᓇᖅᑐᑎᑐᓪᓗ ᑐᑭᒃᓴᖏᓂᒃ ᖃᓪᓗᓛᑎᑐᑦ ᐅᖃᖅᑕᐅᓯᒪᔪᓂᒃ ᐊᒻᒪᓗ ᑎᑎᕋᖅᑕᐅᓯᒪᔪᓂᒃ ᐊᑐᖅᑕᐅᖃᑦᑕᖅᑐᑦ ᐅᖃᐊᓰᑦ ᑲᑎᖅᓱᐃᑎᓪᓗᒋᑦ ᐊᒻᒪᓗ ᑎᑎᕋᐃᕙᓪᓕᐊᑎᓪᓗᒋᑦ ᑭᒃᓕᓯᓂᐊᖅᑐᓕᕆᓂᕐᓂᒃ. ᑕᒪᓐᓇ ᐱᓕᕆᐊᖑᖕᒪᑦ ᐃᓕᖅᑯᓯᓕᕆᔨᒃᑯᓐᓂ ᐊᐃᑉᐸᖃᖅᖢᑎᒃ ᓄᓇᕗᒻᒥ ᑭᒃᓕᓯᓂᐊᖅᑏᑦᑯᓐᓂ (ᓄᓇᕗᒻ ᒐᕙᒪᒃᑯᖏᑕ ᑭᒃᓕᓯᓂᐊᖅᑐᓕᕆᔨᒃᑯᖏᑦ) ᒫᓐᓇᐅᓚᐅᖅᑐᖅ ᑲᑎᔾᔪᑎᐅᓚᐅᖅᑐᒥᒃ ᑕᒪᑐᒧᖓ ᑐᑭᓕᐅᕆᒋᐊᕐᓂᕐᒧᑦ. ᐃᓕᖅᑯᓯᓕᕆᔨᒃᑯᑦ ᑐᓐᓂᖅᓴᐃᓂᐊᕐᒪᑕ ᐊᑐᖁᔭᐅᔪᓂᒃ ᑐᑭᓕᐅᖅᑕᐅᓯᒪᓕᖅᑐᓂᒃ ᐊᒻᒪᓗ ᐊᐱᖅᓱᖅᐸᓪᓕᐊᓂᐊᖅᖢᑎᒃ ᖃᓄᖅ ᑖᒃᑯᐊ ᐃᓱᒪᒋᔭᐅᔭᕆᐊᒃᓴᖏᓐᓂᒃ ᐅᖃᐅᓯᓕᕆᔨᐅᔪᓂᒃ ᐃᓄᓕᒫᓂᒃᓗ ᐊᒻᒪᓗᑦᑕᐅᖅ ᐃᓐᓇᐃᑦ ᒪᒃᑯᒃᑐᓪᓗ ᑲᑎᒪᔨᖏᓐᓂᒃ. ᐊᑐᖁᔭᐅᔪᑦ ᑐᑭᓕᐅᖅᓯᒪᔪᑦ ᖃᐅᔨᓴᖅᑕᐅᓂᐊᕐᒥᖕᒪᑕ ᐃᖅᑲᓇᐃᔭᖅᑎᒋᔭᐅᔪᓂᒃ ᐅᖃᐅᓯᓕᕆᔨᒃᑯᓐᓄᑦ ᓄᓇᕗᑦ ᒐᕙᒪᒃᑯᖏᓐᓂᒃ ᖃᐅᔨᒋᐊᕈᑕᐅᓗᑎᒃ ᑕᐃᒪᓐᓇᑎᒋ ᐊᑑᑎᖃᑦᑎᐊᕐᓂᐊᕆᐊᒃᓴᖏᓐᓂᒃ ᑐᑭᓕᐅᖅᐸᓪᓕᐊᑎᓪᓗᒋᑦ ᑎᑎᕋᖅᑕᐅᔭᕆᐊᓕᖕᓂᒃ ᐱᔾᔪᑎᒋᓪᓗᒍ ᑭᒃᓕᓯᓂᐊᖅᑐᓕᕆᓃᑦ. ᐊᑐᖃᔭᐅᔪᑦ ᑐᑭᓕᐅᖅᑕᐅᓯᒪᔪᑦ ᐱᐅᒋᔭᐅᒍᑎᒃ, ᐃᓚᓕᐅᔾᔭᐅᓂᐊᖅᑐᑦ ᐊᓱᐃᓛᒧᑦ ᖃᕆᑕᐅᔭᒃᑯᑦ ᑐᑭᓕᐅᕐᕕᖓᓄᑦ, ᓄᓇᕗᒻᒥ ᐅᖃᐅᓯᕐᓄᑦ ᓄᐊᑦᑎᕕᒃ ᖃᕆᑕᐅᔭᐅᑉ ᐃᓗᐊᓃᑦᑐᖅ ᑕᑯᔭᐅᒋᐊᕕᓕᒃ ᐅᕙᓂ (www.asuilaak.ca). ᐃᓕᖅᑯᓯᓕᕆᔨᒃᑯᑦ ᐊᔾᔨᓕᐅᖅᓯᓂᐊᖅᑐᑦ ᑐᓐᓂᖅᓴᐃᓗᑎᒃᓗ ᑐᑭᓕᐅᖅᑕᐅᓯᒪᓕᖅᑐᓂᒃ ᑖᒃᑯᓄᖓ ᐃᓄᓕᒫᓄᖅ ᐱᔭᕇᖅᑕᐅᓯᒪᓕᕈᑎᒃ. ᑕᒪᓐᓇ ᒪᕐᕈᒋᔭᐅᓕᕐᒪᑦ ᑲᑎᔾᔪᑎᐅᓪᓗᓂ ᑐᑭᓕᐅᕆᒋᐊᕐᓂᕐᒧᑦ ᐃᓕᖅᑯᓯᓕᕆᔨᒃᑯᓐᓂᒃ ᐱᒋᐊᖅᑕᐅᓯᒪᓪᓗᓂ ᑕᒪᑐᒪᓂ ᐊᕐᕌᒍᒥ. ᑕᐃᒪᓐᓇᑲᓴᑦᑎᐊᖅ ᑲᑎᔾᔪᑎᖃᓚᐅᕐᒥᖕᒪᑕ ᑭᓯᐊᓂ ᑮᓇᐅᔭᓕᕆᓂᕐᒥᒃ ᐱᔾᔪᑎᖃᖅᖢᑎᒃ ᒪᐃᖑᑎᓪᓗᒍ ᐃᖃᓗᖕᓂ. ᐊᑐᖁᔭᐅᔪᓪᓕ ᑕᒪᑐᒧᖓ ᓱᓕ ᑕᑯᓇᒃᑕᐅᕙᓪᓕᐊᖕᒪᑕ. ᐃᓕᖅᑯᓯᓕᕆᔨᒃᑯᑦ ᑲᔪᓯᑎᑦᑏᓐᓇᕐᓂᐊᖅᑐᑦ ᑲᑎᔾᔪᑎᒋᔭᐅᕙᒃᑐᓂᒃ ᐊᒻᒪᓗ ᐸᕐᓇᒃᐸᓪᓕᐊᓕᕇᖅᖢᑎᒃ ᑲᑎᔾᔪᑎᐅᒃᑲᓐᓂᓛᖅᑐᒥᒃ, ᐅᑐᐱᕆᐅᓛᖅᑐᒥᒃ. ᐊᑐᓕᖁᔭᐅᔪᖅ ᑐᑭᓕᐅᖅᑕᐅᓯᒪᔪᑦ ᑕᑯᔭᐅᒋᐊᕈᓐᓇᖅᑐᑦ ᒐᕙᒪᒃᑯᑦ ᖃᕆᓴᐅᔭᒃᑯᑦ ᑐᕌᕈᑎᖓᓂᒃ ᐅᕙᓂ www.gov.nu.ca. ᑕᕐᕋᓕᐅᖅᑕᐅᓯᒪᔪᑦ ᐊᒻᒪᓗ ᑐᕆᐊᒃᑲᓐᓂᕈᑏᑦ ᐱᔭᐅᔪᓐᓇᕐᒥᔪᑦ ᑐᓴᕆᐊᕐᕕᐅᒍᓂ ᐅᓇ: ᐱᐊᓂ ᕋᒻᐴᓪᑦ ᑐᓴᖅᑕᐅᕙᓪᓕᐊᔭᕆᐊᖃᖅᑐᓂᒃ ᑲᒪᔨ ᐃᓕᖅᑯᓯᓕᕆᔨᒃᑯᑦ ((867) 975-5531 ᖃᕆᑕᐅᔭᒃᑯᑦ: prumbolt@gov.nu.ca |