 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᓇᐅᔮᓂ ᓄᓇᕗᑦ, ᐋᒡᒌᓯ 23, 2003 – ᓯᕗᓕᐅᖅᑎ ᐹᓪ ᐅᑲᓕᖅ ᓇᐅᔮᓂ ᐅᓪᓗᒥ ᐊᓕᐊᓇᐃᒍᓱᖃᑕᐅᔪᖅ ᐊᑎᓕᐅᕇᕐᓂᖏᓐᓄᖅ ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐃᑲᔫᓯᐊᕈᑎᒃᓴᖏᓐᓄᑦ ᐊᖏᖃᑎᒌᒍᑎᒥᒃ ᐱᒋᐊᕈᑎᐅᓂᐊᖅᑐᒥᒃ ᐅᒃᑯᓯᒃᓴᓕᐅᑉ ᒥᙳᐃᖅᓯᕐᕕᖓᓂᒃ. “ᓄᓇᕗᑦ ᒐᕙᒪᒃᑯᖏᑦ ᐊᓕᐊᓇᐃᒍᓱᒃᑐᑦ ᐃᓚᐅᔪᓐᓇᕐᓂᖏᓐᓄᑦ ᑕᒪᑐᒥᖓ ᐊᖏᖃᑎᒌᒍᑎᒥᒃ, ᓴᖅᑭᑎᑦᑎᔾᔪᑎᐅᓂᐊᕐᒪᑦ ᑲᔪᓰᓐᓇᕐᓂᐊᖅᑐᒥᒃ ᓴᐳᔾᔨᔾᔪᑎᐅᓂᐊᖅᑐᖅ ᐊᕙᑎᒋᔭᑐᖃᑦᑎᓐᓂᒃ ᐃᓄᖕᓂᒃ ᐆᒪᑎᑦᑏᓐᓇᖅᑐᒥᒃ ᐊᕐᕌᖑᓄᑦ ᐅᓄᖅᑐᐊᓗᖕᓄᑦ. ᓄᓇᕗᒻᒥᐅᓂᓛᒃ ᐅᐱᒍᓱᑦᑎᐊᕐᒪᑕ ᐆᒪᔪᕆᔭᑦᑎᓐᓂ ᐊᒻᒪᓗ ᐱᖅᑯᓯᕆᔭᑦᑎᓐᓂ, ᓴᙱᓪᓗᓂᓗ ᐱᓕᕆᓂᕆᔭᖏᑦ ᓄᓇᒋᔭᑦᑎᓐᓂ ᐊᒻᒪᓗ ᓄᓇᑦᑕ ᐱᖁᑎᒋᔭᖏᓐᓂᒃ, ᓄᓇᓕᖏᓐᓂᒃ, ᐆᒪᔪᖏᓐᓂᒃ ᐊᒻᒪᓗ ᐊᒥᒐᖏᑦᑎᐊᖅᑐᓂᒃ ᐱᒻᒪᕆᕐᔪᐊᓂᒃᓗ ᐊᑐᖅᓯᒪᔭᑦᑎᓐᓂ,” ᐅᑲᓕᖅ ᐅᖃᖅᑐᖅ. ᓯᕗᓕᐅᖅᑎ ᐃᖃᓗᖕᓃᓚᐅᕐᒪᑦ ᐃᓚᐅᔭᖅᑐᖅᖢᓂ ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐃᑲᔫᓯᐊᕈᑎᒃᓴᖏᓐᓄᑦ ᐊᖏᖃᑎᒌᒍᑎᒥᒃ ᐊᑎᓕᐅᖅᓯᓂᖏᓐᓄᑦ ᐊᓕᐊᓇᐃᒍᓱᒃᖢᑎᒃ ᑲᓇᑕᐅᑉ ᓯᕗᓕᐅᖅᑎᕐᔪᐊᖓᓂᒃ ᔮᓐ ᑯᕆᑦᑎᐊᓐᒥᒃ ᐃᓚᖃᖅᖢᓂ ᐊᒻᒪᓗ ᑭᕙᓪᓕᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖏᔪᖅᑳᖓᓂᒃ ᑐᖑᓚ ᓵᓐᑎᒥᒃ. ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐃᑲᔫᓯᐊᕈᑎᒃᓴᖏᓐᓄᑦ ᐊᖏᖃᑎᒌᒍᑎ ᐃᓂᑖᖅᑎᑦᑎᓂᐊᕐᒪᑦ ᓴᖅᑭᑦᑎᒋᐊᕐᓂᕐᒥᒃ ᑲᓇᑕᐅᑉ 41ᕆᓕᕐᓗᓂᐅᒃ ᒥᕐᖑᐃᖅᓯᕕᒃᔪᐊᖅ. ᓯᕗᓕᐅᖅᑎ ᐅᔾᔨᕈᓱᑦᑎᐊᖅᑐᖅ ᐊᒃᓱᕈᖅᖢᓂ ᑭᕙᓪᓕᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑕ ᐋᔩᖃᑎᒋᔨᒋᔭᖓᓂᒃ ᑕᐃᕕᑦ ᐊᒃᓘᑲᕐᒥᒃ ᐊᒻᒪᓗ ᐊᓕᐊᓇᐃᒋᑦᑎᐊᕐᓂᕋᖅᖢᓂᐅᒃ ᑲᓇᑕᐅᑉ ᓯᕗᓕᐅᖅᑎᕐᔪᐊᖓᑕ ᐃᓚᐅᓂᕆᑦᑎᐊᖅᑕᖓ ᐊᕙᑎᒋᔭᑦᑎᓐᓄᑦ. “ᐃᑲᔪᖅᑐᐃᓂᖅ ᐅᓪᓗᒥᑐᑦ ᐃᑲᔪᖅᑐᐃᑦᑎᐊᕐᒪᑦ ᓄᓇᕗᒻᒧᑦ ᐊᒻᒪᓗ ᐃᑲᔪᖅᑐᐃᑦᑎᐊᕆᓪᓗᓂ ᑲᓇᑕᒧᑦ. ᐊᓕᐊᓇᐃᒍᓱᒋᐊᖅᑕ ᐊᕐᕌᒍᓄᑦ ᐅᓄᖅᑐᐊᓗᖕᓄᑦ ᐃᓄᐃᑦ ᐱᖅᑯᓯᑐᖃᖏᓐᓂᒃ, ᐊᓕᐊᓇᐃᒍᓲᑎᓗᑎᒃᑯᓪᓗ ᓄᓇᖅᐸᒋᔭᖓ, ᖃᐃᖅᓱᖏᑦ, ᐃᓐᓈᓗᖏᑦ ᐊᒻᒪᓗ ᐱᐅᔪᒻᒪᕆᐊᓗᐃᑦ ᓄᓇᖁᑎᖏᑦ ᐅᒃᑯᓯᒃᓴᓕᖕᒦᑦᑐᑦ ᐃᓕᓴᕆᔭᐅᓂᐊᓕᕐᒪᑕ ᐱᒻᒪᕆᕐᔪᐊᖑᓗᑎᒃ ᑲᓇᑕᒥᐅᓕᒫᓄᑦ,” ᓯᕗᓕᐅᖅᑎ ᐅᖃᖅᑐᖅ. “ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐃᑲᔫᓯᐊᕈᑎᒃᓴᖏᓐᓄᑦ ᐊᖏᖃᑎᒌᒍᑎ ᒪᓕᒃᑎᐊᖅᑎᑦᑎᖕᒪᑦ ᓄᓇᕗᒻᒥ ᓄᓇᖃᕐᓂᕐᒧᑦ ᐊᖏᖃᑎᒌᖑᑎᖓᓂᒃ ᐊᒻᒪᓗ ᑐᒃᓯᕋᖅᑕᐅᓯᒪᔪᒧᑦ ᓄᓇᕗᑦ ᐆᒪᔪᖏᓐᓄᑦ ᒪᓕᒐᕐᒥᒃ,” ᐅᖃᖅᑐᖅ ᐃᑯᐱᒃᕕᓕᕆᔨᒃᑯᑦ ᒥᓂᔅᑕᖓᑦ ᐅᓛᔪᒃ ᐊᑭᓱᒃ ᐱᓕᕆᕝᕕᒋᔭᖓ ᐋᔩᖃᑎᖃᓵᓚᐅᖅᑐᖅ ᐊᑭᓴᖅᑐᐃᓪᓗᓂ ᓄᓇᕗᑦ ᒐᕙᒪᒃᑯᖏᓐᓂᒃ. “ᐊᓕᐊᓇᐃᒍᓱᑦᑎᐊᖅᑐᖓ ᓯᖅᑭᑦᑏᔪᓐᓇᕋᑦᑕ ᐱᒋᐊᖅᑕᑦᑎᓐᓂ, ᐊᒻᒪᓗ ᐊᓯᖏᓐᓂᒃ ᐱᒻᒪᕆᐅᖕᒥᔪᓂᒃ ᐱᒋᐊᖅᑕᑦᑎᓐᓂ,” ᐊᑭᓱᒃ ᐅᖃᖅᑐᖅ. ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐃᑲᔫᓯᐊᕈᑎᒃᓴᖏᓐᓄᑦ ᐊᖏᖃᑎᒌᒍᑎ ᐅᑯᐊᖑᔪᑦ:
ᒥᕐᖑᐃᖅᓯᕕᐅᓂᐊᖅᑐᖅ ᐊᑎᖃᖅᑎᑕᐅᔪᖅ ᐅᔭᕋᐃᑦ ᓴᓇᙳᖅᑕᐅᓲᑦ ᐊᑎᖓᓂᒃ ᓇᓂᔭᐅᕙᒃᑐᓂᒃ ᑕᐃᑲᓂ. ᐱᐅᔪᒻᒪᕆᐅᓘᔪᖅ ᓄᓇᖓ ᐊᒻᒪᓗ ᓄᓇᑦᑎᐊᕙᒋᔭᐅᓪᓗᓂ ᐅᓄᖅᑐᓄᑦ ᑐᒃᑐᓄᑦ, ᓇᓄᕐᓄᑦ ᐊᒻᒪᓗ ᐅᒥᖕᒪᓄᑦ. -30- ᑕᒪᑐᒧᖓ ᑐᓴᒃᑲᓐᓂᕈᒪᒍᔅᓯ ᑐᓴᕆᐊᕐᕕᒃ ᐅᓇ: ᓃᓅ ᕕᑦᓱᓂᐅᔅᑭ ᓄᓇᕗᑦ ᒐᕙᒪᒃᑯᖏᑕ ᑐᓴᐅᒪᑎᑦᑎᔨᖓ (867) 975-6001 |