 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᐊᐅᒡᒍᓯ 11, 2003) - ᐲᑕ ᕿᓚᕝᕙᖅ ᒐᕙᒪᓕᕆᔩᑦ ᐃᖏᕐᕋᖃᑦᑕᐅᑎᓕᕆᔩᓪᓗ ᒥᓂᔅᑕᖓ, ᐅᐱᒍᓱᒻᒪᕆᓚᐅᕐᐳᖅ ᐃᓕᒌᓂᒃ ᓄᓇᕗᒻᒥᒃ ᑭᒡᒐᖅᑐᐃᔪᓂᒃ 2003-ᒥ ᐅᐊᓕᓂᕐᒥᐅᑦ ᑲᓇᑕᒥ ᐊᐅᔭᒃᑯᑦ ᐱᓐᖑᐊᓂᕐᔪᐊᕆᓚᐅᖅᑕᖓᓄᑦ. “ᐅᐱᒍᓱᒻᒪᕆᑉᐳᒍᑦ ᓄᓇᕗᒻᒥ ᐃᓕᒌᑦ ᐱᓐᖑᐊᓂᕐᒨᕈᓐᓇᓚᐅᕐᓂᖏᓐᓂᒃ,” ᐅᖃᖅᑐᖅ ᕿᓚᕝᕙᖅ. “ᐃᓕᒌᑦ ᐃᖅᑲᓇᐃᔭᖅᑐᒻᒪᕆᐅᖃᑦᑕᓚᐅᕐᒪᑕ ᐱᓇᓱᐊᖅᑐᒻᒪᕆᐅᓪᓗᑎᒃ ᑕᐃᒪᐃᓚᐅᕐᓂᖏᓐᓄᓪᓗ ᑕᒪᓐᓇ ᐊᓚᒃᑲᐅᒪᓚᕿᕗᖅ ᐱᓐᖑᐊᕐᓂᒥᓂᖏᓐᓄᑦ. ᓄᓇᕗᒻᒥᐅᓕᒫᓃᓐᖔᕐᓗᖓ, ᐅᐱᒋᕙᒃᑲ ᐱᓐᖑᐊᖅᑎᖁᑎᕗᑦ ᐱᓐᖑᐊᓯᐊᖅᑐᒻᒪᕆᐊᓘᓚᐅᕐᓂᖏᓐᓄᑦ ᑭᒡᒐᖅᑐᐃᓚᐅᕐᓂᖏᓐᓄᓪᓗ ᓄᓇᕗᒻᒥᒃ.” ᓄᓇᕗᒻᒦᒑᖅᑐᑦ ᒪᕐᕉᓕᖅᑲᖓᓚᐅᖅᑐᑦ ᐱᓐᖑᐊᖅᑏᑦ-ᐊᓇᐅᓕᒑᖅᑐᑦ ᕚᑦᒥᓐᑕᓐ ᐹᔪᓪᓗ. ᐊᓇᐅᓕᒑᖅᑐᑦ ᐱᓐᖑᐊᖅᑎᖏᑦ ᓵᓚᖃᕋᓱᐊᖅᑎᓪᓗᒋᑦ ᐊᕐᕕᓂᓕᕆᔭᐅᓚᐅᖅᑐᑦ ᐱᓐᖑᐊᖅᑎᓄᑦ. ᐹᔩᑦ ᓵᓚᖃᕋᓱᐊᕐᓂᕐᒥᓂᒃ ᐱᓇᓱᐊᕈᓯᕐᒥ ᐹᖃᑕᐅᖃᑦᑕᖅᑐᑎᒃ ᐊᔪᓐᖏᑐᒻᒪᕆᐊᓘᓚᐅᕐᐳᑦ ᐱᖓᓱᓂᒃ ᐅᔭᒥᑦᑖᕋᓱᐊᖃᑕᐅᓪᓗᑎᒃ ᐊᓱᐃᓛᒃ ᐅᔭᒥᑦᑕᐅᓯᒪᓕᖅᑐᑎᒃ ᓯᐅᕕᕆᒥᒃ ᐱᔭᕇᓚᐅᖅᐳᑦ 57-ᓂᒃ ᐅᖁᒪᐃᓐᓂᓖᑦ ᐹᑎᓪᓗᒋᑦ. ᔮᓂ ᐃᑦᑐᖅ ᓴᓪᓕᕐᓃᓐᖔᖅᑐᖅ ᓯᐅᕕᕆᒥᒃ ᐅᔭᒥᑦᑕᐅᓚᐅᖅᑐᖅ ᓵᓚᖃᐅᑎᒐᓱᐊᖅᑐᒻᒪᕆᐅᓚᐅᖅᑎᓪᓗᒋᑦ ᖃᓂᒌᑦᑐᒻᒪᕆᐅᓪᓗᑎᒃ ᐅᓇᑕᕐᓂᕐᒥᓐᓄᑦ ᒎᓗᑖᕋᓱᐊᕐᓂᕐᒧᑦ ᑭᖑᓪᓕᐹᖅᓱᓕᖅᑎᓪᓗᒋᑦ ᐅᖁᒪᐃᓐᓂᖃᑎᒌᑦ ᐱᓐᖑᐊᑎᓪᓗᒋᑦ. ᓯᕗᓪᓕᐹᑦᓯᐊᒥ ᓄᓇᕗᒻᒥ ᐅᔭᒥᑦᑖᖅᑐᖃᕆᐅᖅᑐᖅ ᐅᐊᓕᓂᕐᒥ ᑲᓇᑕᒥ ᐱᓐᖑᐊᓂᕐᔪᐊᒥ. ᓵᓚᒃᓴᕋᓱᐊᕐᓂᖅ ᓯᕗᓪᓕᕐᐹᖅ ᓄᓇᕗᒻᒥᐅᑦ ᐱᓐᖑᐊᖃᑕᐅᒋᐅᖅᑎᓪᓗᒋᑦ ᐅᐊᓕᓂᕐᒥᐅᑦ ᑲᓇᑕᒥ ᐱᓐᖑᐊᓂᕐᔪᐊᖓᓄᑦ ᐊᐅᔭᒃᑯᑦ. ᐱᓐᖑᐊᓂᕐᔪᐊᖅ ᓄᖅᑲᓚᐅᖅᑐᖅ ᐊᐅᒡᒍᓯ 10, 2003-ᒥ. ᑐᑭᓯᒋᐊᒃᑲᓐᓂᕈᓐᓇᖅᑐᑎᑦ, ᐅᖄᓚᓗᑎᑦ: ᑦᓵᑦ ᐊᕋᒻᕙᕈ ᓄᓇᕗᑦ ᐱᓐᖑᐊᖅᑎᖏᑕ ᐱᓇᓱᐊᖅᑕᖏᓐᓄᑦ ᐃᖅᑲᓇᐃᔭᖅᑎ ᐅᖄᓚᐅᑖ: (867) 975-5372 |