 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᐊᐅᒡᒍᓯ 11, 2003)-ᐊᑦᓱᕈᐊᖃᖅᑐᓂ ᐱᔪᓐᓇᖁᔨᓪᓗᓂ ᓯᕗᓕᖅᑎ ᐹ ᐅᑲᓕᖅ ᐃᖅᑲᓇᐃᔭᒻᒪᕆᓐᓂᖓᓄᓪᓗ ᐃᑯᕕᒡᕕᓕᕆᔨᒃᑯᑦ ᒥᓂᔅᑕᖓ ᐅᓛᔪᒃ ᐊᑭᓱᒃ ᒥᐊᓕᒐᐃᑦ ᓄᖅᑲᑎᑦᓯᓯᒪᑎᓪᓗᒋᑦ ᓄᓇᕗᒻᒦᖔᖅᑐᑦ ᑐᑐᑦᒥᓃᑦ ᐅᒥᒻᒪᐃᓪᓗ ᓂᕿᖏᑦ ᓂᐅᕐᕈᑎᖃᕈᓐᓇᕐᓯᓂᖓ ᐊᑭᒋᕙᐅᒃ ᐱᓇᓱᐊᕐᓂᖓᑕ. ᒥᐊᓕᒐᕐᓄᑦ ᓂᐅᕐᕈᑎᖃᕈᓐᓇᖃᑦᑕᕐᓂᐊᓕᕆᕗᑦ ᓄᓇᕗᒻᒦᖔᖅᑐᓂᒃ ᓂᕿᓂᒃ ᒥᐊᓕᒐᒃᑯᑦ ᒐᕙᒪᖏᑦ ᒪᑐᐃᕐᓯᑲᓐᓂᑎᓪᓗᒋᑦ ᐃᓚᐃᓐᓇᖏᓐᓄᑦ ᑭᓪᓕᓕᐊᖑᓯᒪᔪᒃᑯᑦ ᓂᐅᕐᕈᑎᖃᖃᑦᑕᓂᕐᒧᑦ ᑲᓇᑕᒦᓐᖔᖅᑐᓂᒃ ᐃᒻᒧᑦᓯᐅᒐᐃᑦ ᓂᕿᖏᓐᓂᒃ ᓴᓇᖃᑦᑕᖅᑐᓄᑦ, ᐃᓚᒋᔭᐅᓪᓗᑎᒃ ᑐᑦᑐᒥᓃᑦ ᐅᒥ`ᖕᒪᐃᓪᓗ ᓂᕿᖏᓐᓂᒃ ᓴᓇᖃᑦᑕᖅᑐᑦ. ᐅᑲᓕᖅ ᑲᑎᖃᑎᖃᕋᑖᓚᐅᕐᒪᑦ ᒥᐊᓕᒐᒃᑯᓐᓄᑦ ᑭᒡᒐᑐᖅᑎᒻᒪᕆᒻᒥᒃ ᐹ ᓯᓘᑦᓯᒥᒃ ᐅᖃᕆᐊᖅᑐᖅᑐᓂ ᐃᓱᒫᓘᑎᒋᔭᒥᓂᒃ ᓄᖅᑲᖅᑎᑕᐅᓯᒪᓂᐅᔪᒧᑦ ᓇᓗᓇᐃᕆᒋᐊᖅᑐᖅᑐᓂ ᓲᖅ ᓄᓇᕗᒻᒦᖔᖅᑐᑦ ᓂᖀᑦ ᐊᔾᔨᐅᖏᑦᑐᒃᑯᑦ ᑲᒪᒋᔭᐅᒋᐊᖃᕐᒪᖔᑕ ᖃᓗᓈᓃᓐᖔᖅᑐᑦ ᐃᒻᒧᑦᓯᐅᒐᐃᑦ ᓂᕿᖏᑕ ᓴᓂᐊᓂ. “ᖁᕕᐊᓱᒻᒪᕆᑉᐳᖓ ᒥᐊᓕᒐᕐᒧᑦ ᑭᒡᒐᖅᑐᖅᑎᒻᒪᕆᒃ ᐅᖃᐅᓯᖃᕈᓐᓇᓚᐅᕐᒪᑦ ᖃᓄᐃᓐᓂᐅᔪᓂᒃ ᖃᐅᔨᑎᑦᓯᑎᒍᑎᒋᓚᐅᖅᑕᑎᓐᓂᒃ ᑖᑦᓱᒥᖓ ᐊᔾᔨᐅᖏᓐᓂᖏᓐᓂᒃ ᐱᐅᔪᒻᒪᕆᐅᓂᖏᓐᓂᒃ ᑐᑦᑐᒥᓃᑦ ᐅᒥᖕᒪᐃᓪᓗ ᓂᕿᖏᑦ ᓄᓇᕗᒻᒦᖔᖅᑐᑦ. ᑕᒪᓐᓇ ᓄᓇᕗᑦ ᐃᓕᓴᕆᔭᐅᓂᖓ ᐱᒻᒪᕆᐊᓘᕗᖅ ᖁᕕᐊᓇᖅᑐᓂᓗ ᑐᓴᕐᓂᖅᑐᖅ ᒪᑭᒪᔾᔪᑎᑦᑎᓐᓄᑦ ᐱᕙᓪᓕᐊᔪᓕᕆᓂᕐᒧᓪᓗ,” ᐅᖃᖅᑐᖅ ᐅᑲᓕᖅ. ᓯᕗᓕᖅᑎᐅᑉ ᑲᑎᖃᑎᖃᕐᓂᕆᓚᐅᖅᑕᖓ ᒥᐊᓕᒐᕐᒧᑦ ᑭᒡᒐᑐᖅᑎᒻᒪᕆᒻᒥᒃ ᔪᓚᐃ 14, 2003-ᒥ ᐱᒋᐊᕈᑕᐅᓚᐅᕐᒪᑦ ᑲᒪᒋᔭᐅᓕᖅᑐᓂ ᓄᓇᕗᑦ ᒐᕙᒪᖓᓄᑦ ᓄᖅᑲᖅᑎᑕᐅᓯᒪᖁᔨᒍᓐᓃᓂᕐᒧᑦ ᓄᓇᕗᑦ ᓂᕐᔪᑎᖏᑕ ᓂᕿᖏᓐᓂᒃ. “ᑕᒪᓐᓇ ᓄᓇᕗᑦ ᓴᓚᒃᓴᐅᑎᒋᔭᖓ ᐊᖏᔪᒻᒪᕆᐊᓘᕗᖅ. ᐃᑯᐱᒡᕕᓕᕆᔨᒃᑯᑦ ᓯᕗᓕᖅᑎᓗ ᐅᑲᓕᖅ ᐃᖅᑲᓇᐃᔮᓕᒻᒪᕆᐊᓘᓚᐅᕐᒪᑎᒃ ᐱᖓᓲᕋᑖᖅᑐᓂᒃ ᑕᖅᑭᓂᒃ ᓄᖅᑲᖅᑎᑕᐅᓯᒪᖁᔨᒍᓐᓃᓂᕐᒧᑦ. ᒥᐊᓕᒐᒃᑯᑦ ᒐᕙᒪᖓ ᐅᖃᐅᓯᖃᓪᓗᐊᑕᓚᐅᕐᓂᑯᖓᓄᑦ ᓇᓗᓇᐃᕆᓪᓗᓂ ᓄᓇᕗᒻᒥ ᑐᑦᑐᖏᓐᓂᒃ ᐅᒥᖕᒪᐃᓪᓗ ᓂᕿᖏᓐᓂᒃ ᓂᕐᔪᑎᓂ ᐊᕿᐊᕈᑦᓵᖃᕐᓱᑎᓪᓗ ᓂᕆᓚᐅᖅᓱᑎᒃ ᑕᒧᐊᒃᑲᓐᓂᓲᖑᒻᒪᑕ ᓂᕿᖏᑦ ᓂᐅᕕᐊᑦᓴᐅᖃᑕᐅᒍᓐᓇᓕᕐᒥᔪᑦ ᓄᖅᑲᖅᑎᑕᐅᓯᒪᔪᓂᒃ, ᖃᐅᔨᓇᖅᑐᖅ ᐃᖅᑲᓇᐃᔭᕐᓂᕆᖃᑦᑕᖅᑕᖓ ᒐᕙᒪᑦᑕ ᓇᓗᓇᓐᖏᓚᖅ ᐊᒃᑐᐃᓂᖃᒻᒪᕆᒋᐊᖓ ᐱᔾᔪᑕᐅᔪᒥᒃ,” ᐅᖃᖅᑐᖅ ᐊᑭᓱᒃ. ᒥᐊᓕᒐᒃᑯᑦ ᒐᕙᒪᖓ ᓄᖅᑲᑎᑦᓯᓚᐅᕐᓯᒪᒻᒪᑦ ᑲᓇᑕᒦᓐᖔᖅᑐᓕᒫᓂᒃ ᐊᕿᐊᕈᑦᓵᓖᑦ ᓂᕆᓚᐅᖅᑕᒥᓐᓂᒃ ᑕᒧᐊᒃᑲᓐᓂᓲᑦ ᓂᕿᖏᓐᓂᒃ ᓂᕿᓕᐅᕐᓯᒪᔪᓂᓪᓕᓗ ᒪᐃ 21, 2003-ᒥ ᖃᐅᔨᓚᐅᖅᑎᓪᓗᒋᑦ ᐊᑕᐅᓯᕐᒥᒃ ᐋᓐᓂᐊᔪᒥᓂᐅᑉ ᓂᕿᖓᓂᒃ ᖃᓪᓗᓈᑎᑐᑦ ᑕᐃᒎᓯᓕᒃᕐ ᐴᕙᐃᓐ ᔅᐸᒡᓂᕗᐊᒻ ᐃᓐᓯᕙᐅᐸᑎ, ᑕᐃᒍᓯᖃᖃᑦᑕᕐᒥᔪᖅ ᐃᒻᒧᑦᓯᐅᒐᐃᑦ ᓯᓇᐅᓐᖓᑦᓯᒪᔪᑦ, ᐆᒪᔪᓕᐅᕐᕕᓐᓂᒃ ᐊᐅᕘᑕᒥ. ᑐᑦᑐᐃᑦ ᐅᒥᖕᒪᐃᓪᓗ ᑕᒪᒃᑮᑦ ᐊᕿᐊᕈᑦᓵᖃᕐᒪᑎᒃ (ᐆᒪᔪᐃᑦ ᐊᕿᐊᕈᓖᑦ ᐊᑕᐅᓯᐅᓐᖏᑦᑐᒥᒃ), ᐱᔾᔪᑕᐅᓪᓗᓂ ᓄᓇᕐᔪᐊᑉ ᑭᓪᓕᓕᐅᖅᑕᐅᓯᒪᓂᖓᑕ ᐊᓯᐊᓄᑦ ᐊᐅᓪᓚᖅᑎᑕᐅᒍᓐᓇᐃᓪᓕᑎᑕᐅᓯᒪᖃᑕᐅᓚᕿᓚᐅᖅᑐᑦ. ᐅᑲᓕᖅ ᖁᔭᓕᓪᓗᓂ ᓂᓪᓕᐊᓚᐅᖅᑐᖅ ᐃᑲᔪᕐᓂᖓᓄᑦ ᐃᖅᑲᓇᐃᔭᕐᓂᖓᓄᓪᓗ ᓯᓘᑦᓯ ᒐᕙᒪᑐᖃᒃᑯᓪᓗ, ᐊᕕᑦᑐᕐᓯᒪᓂᐅᔪᓄᓪᓗ ᑏᕆᑐᐊᕆᓄᓪᓗ ᒐᕙᒪᖏᑕ ᓯᕗᓕᖅᑎᖏᓐᓂᒃ ᐃᑲᔪᕐᓂᖃᓚᐅᕐᒪᑕ ᓄᖅᑲᖅᑎᑕᐅᓯᒪᒍᓐᓃᕐᓂᖓᓄᑦ. ᓄᖅᑲᖅᑎᑕᐅᓯᒪᑎᓪᓗᒋᑦ ᐊᒃᑐᖅᑕᐅᓯᒪᓂᖃᓚᐅᕐᒪᑦ ᑭᕙᓪᓕᕐᒥᒃ ᓂᕿᓕᕆᔩᑦ ᑲᖏᕐᖠᓂᕐᒥ ᕿᑎᕐᒥᐅᓪᓗ ᓂᖀᑦ ᐃᖃᓗᒃᑑᑦᑎᐊᒥ. $500,000-ᓃᒐᓚᑦᑐᑦ ᓄᓇᕐᔪᐊᒥ ᑭᓪᓕᓕᐅᖅᑕᐅᓯᒪᔫᑉ ᐊᓯᐊᓄᑦ ᓂᐅᕐᕈᑎᑦᓴᒫᑦ ᐊᔪᕐᓯᓯᒪᓚᐅᖅᐳᑦ 20-ᓗ ᐃᖅᑲᓇᐃᔮᖑᔪᑦ ᐅᓗᕆᐊᓇᖅᑐᒦᓐᓂᖃᓕᓚᐅᖅᐳᑦ. ᑐᑦᑐᒥᓂᓕᒫᑦ ᐅᒥᖕᒪᐃᓪᓗ ᓂᕿᖏᑦ ᓴᓇᔭᐅᓯᒪᔪᑦ ᓄᓇᕗᒻᒥ ᑲᑎᖅᓱᖅᑕᐅᖃᑦᑕᖅᑐᑦ ᓂᕐᔪᑎᓃᓐᖔᑐᓂᒃ ᐊᓯᓂᒃ ᓄᓇᒥ ᐃᓅᖃᓐᖏᑦᑐᒦᓐᖔᖅᑐᑦ ᐆᒪᔪᓄᓪᓗ ᐊᒃᑐᐊᓂᖃᓐᖏᓯᐊᖅᑐᑦ ᖃᓂᒋᔭᐅᓐᖏᓯᐊᖅᑐᑎᒃ ᓲᕐᓗ ᐃᒻᒧᑦᓯᐅᒐᕐᓄᑦ, ᐃᓐᓇᕈᕐᒥᐅᑕᓄᑦ ᓰᐱᓄᑦ ᓰᐱᑐᐃᓐᓇᓄᓪᓗ. -30- ᑐᑭᓯᒋᐊᒃᑲᓂᕐᕕᑦᓴᖅ: ᑭᐅᕆ ᒪᒃᓘᔅᑭ ᑐᓴᖃᑦᑕᐅᑎᓕᕆᓂᕐᒧᑦ ᐊᐅᓚᑦᓯᔨ ᐃᑯᐱᒡᕕᓕᕆᔨᒃᑯᑦ, ᓄᓇᕗᑦ ᒐᕙᒪᖓ ᐅᖄᓚᐅᑖ: (867) 975-5929 ᓱᒃᑲᔪᒃᑰᕈᑎᖓ: (867) 975-5980 ᖃᕆᓴᐅᔭᒃᑯᑦ ᑐᕌᕈᑖ: kmccluskey@gov.nu.ca |