 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ (ᐊᐅᒡᒍᓯ 11, 2003)- ᐅᑭᐅᓐᓄᑦ ᒪᕐᕉᓐᓄᑦ ᑐᓂᖅᑕᓂᐊᖅᑏᑦ ᓴᒡᒐᖃᑦᑕᓚᐅᖅᑐᑦ ᐃᒡᓗᓕᒻᒥ ᓇᕝᕚᓚᐅᖅᐳᑦ 500-ᖏᓐᓃᑦᑐᓂᒃ ᐱᖁᑎᑐᖃᒥᓂᕐᓂᒃ ᑕᐃᑲᓂᒥᐅᓂᒃ ᒪᒃᑯᑦᑐᓂᒃ ᐊᕐᕕᓂᓕᓐᓂᒃ ᑐᑭᓯᑎᑦᓯᒋᐊᒃᑲᓐᓂᕈᓐᓇᕈᑕᐅᓚᐅᖅᑐᑦ ᓯᕗᓕᒥᓂᖏᑕ ᒥᑦᓵᓄᑦ. ᐃᑦᑕᕐᓂᓴᕐᓂᐊᖅᑐᑦ ᓴᒡᒐᖅᑐᑦ ᑲᒪᔨᖃᓚᐅᖅᐳᑦ ᐃᓕᖅᑯᓯᓕᕆᔨᒃᑯᓐᓂᒃ. 500-ᓃᑦᑐᑦ ᐱᖁᑎᑐᖃᕕᓃᑦ ᓴᓇᕐᕈᑎᒥᓃᓐᓇᐅᒐᓚᓚᐅᖅᑐᑦ ᐅᔭᕋᐅᓪᓗᑎᒃ ᓇᐅᒃᑯᑎᒥᓂᖅᑕᖃᖃᑦᑕᓚᐅᕐᒥᔪᖅ ᐊᖑᕕᒐᒥᓂᕐᓂᓪᓗ, ᒥᖅᑯᑎᒥᓃᑦ ᐊᓯᖏᓪᓗ ᓴᐅᓂᒥᓃᑦ ᑑᒑᒥᓃᓪᓗ ᓴᓇᐅᒐᐃᑦ. “ᖁᕕᐊᓱᒻᒪᕆᑉᐳᖓ ᑕᕝᕙᓂ ᐊᕐᕌᒍᑦᑎᓐᓂ ᒪᒃᑯᑦᑐᑦ ᐃᓚᒋᔭᐅᒍᓐᓇᑲᓐᓂᓚᐅᕆᐊᖏᑦ, ᐱᓕᕆᑦᓯᐊᑐᒻᒪᕆᐊᓘᓚᐅᕐᒪᑕ ᓱᕐᕋᐅᑎᓪᓗᐊᖅᑐᑎᒃ. ᑲᔪᖏᖅᓴᕆᐊᒃᑲᓐᓂᖃᑦᑕᕆᐊᖃᕋᑦᑎᒍ ᒪᒃᑯᑦᑐᖁᑎᕗᑦ ᖃᐅᔨᒪᖁᓪᓗᒋᑦ ᐱᖅᑯᓯᑦᑎᓐᓂᒃ. ᐃᓚᒋᔭᐅᓚᐅᕐᓂᖏᑦ ᐱᓕᕆᐊᖑᔪᒧᑦ ᐃᓕᑉᐸᓪᓕᕈᑎᒻᒪᕆᒋᖃᑦᑕᕐᒪᐅᒃ ᖃᐅᔨᒪᔭᕆᐊᓕᖏᓐᓂᒃ ᐃᓕᑉᐸᓪᓕᕈᑎᒋᓪᓗᒋᓪᓗ ᐃᑦᑕᕐᓂᓴᓕᕆᓂᕐᒨᖓᔪᓂᒃ ᐃᓕᒍᑎᒋᓪᓗᒋᓪᓗ ᓄᓇᕗᒻᒥ ᖃᓄᐃᖃᑦᑕᕐᓂᒥᓂᐅᔪᓂᒃ ᑲᒪᒋᓪᓚᕆᓪᓗᑎᒃ,” ᐅᖃᖅᑐᖅ ᕿᓚᕝᕙᖅ. ᔪᓚᐃ 2003-ᒥ, 10-ᖑᓪᓗᑎᒃ ᐃᖅᑲᓇᐃᔭᖅᑐᑦ ᑐᑭᒧᐊᑦᑎᑦᓯᔨᖃᖅᑐᑎᒃ ᑕᒡ ᔅᑕᓐᑎᓐᒥᒃ, ᐃᓕᖅᑯᓯᓕᕆᔨᒃᑯᓐᓂ ᐃᑦᑕᕐᓂᓴᓕᕆᓂᕐᒧᑦ ᑐᑭᒧᐊᑦᑎᑦᓯᔨ, ᓴᒡᒐᑎᑦᓯᖃᑦᑕᓚᐅᕐᒪᑕ 16-ᓂᒃ ᑐᐱᕐᕕᒥᓂᕐᓂᒃ. ᐅᑭᐅᒃ ᒪᕐᕉᒃ ᓴᒡᒐᓇᕐᓂᖓᓂ ᐃᖅᑲᓇᐃᔭᖃᑦᑕᖅᑐᑎᒃ, ᖃᐅᔨᓴᖅᑏᑦ ᓴᒡᒐᓚᐅᖅᐳᑦ 30-ᓂᒃ ᓴᒡᒐᕐᕕᖃᓚᐅᖅᐳᑦ ᐱᖓᓱᓂ ᓄᓇᓕᖃᕐᕕᒥᓂᕐᓂ. ᓴᒡᒐᑎᓪᓗᒋᑦ ᓇᕝᕚᖃᑦᑕᓚᐅᕐᒥᔪᑦ ᐊᒥᓱᒻᒪᕆᐊᓗᓐᓂᒃ ᑕᐅᓴᑎᖏᓐᓃᑦᑐᓂᒃ ᓴᐅᓂᒥᓂᕐᓂᒃ, ᐱᓗᐊᖅᑐᒥ ᓇᑦᓰᑦ ᑎᒻᒥᐊᓪᓗ ᓴᐅᓂᒥᓂᖏᓐᓂᒃ. ᖃᐅᔨᓴᕈᑎᒃᑯᑦ ᖃᐅᔨᓴᖅᑕᐅᓂᖏᑦ ᓇᓗᓇᐃᖅᑕᐅᒍᑎᒋᓚᐅᖅᑕᖏᑦ ᓄᓇᓕᖃᕐᕕᒥᓂᐅᒋᐊᖏᑦ 3000 4000 ᐅᑭᐅᑦ ᓈᓕᖅᑐᑦ ᐃᓄᖃᓚᐅᖅᑐᒥᓂᐅᒋᐊᖓ. ᓴᒡᒐᓚᐅᖅᑎᓪᓗᒋᑦ, ᐃᓕᖅᑯᓯᓕᕆᔨᒃᑯᑦ ᐊᓪᓚᕝᕕᖓ ᐃᒡᓗᓕᒻᒥ ᒪᑐᐃᖓᑎᑦᓯᓚᐅᖅᑐᑦ ᑭᒃᑯᑐᐃᓐᓇᕐᓄᑦ ᐅᐸᒐᑦᓴᐅᓪᓗᑎᒃ ᐱᓕᕆᐊᖑᔪᖅ ᑲᔪᓯᑦᓯᐊᓚᐅᖅᑎᓪᓗᒍ ᑕᑯᖅᑯᔾᔨᒍᒪᓪᓗᑎᒃ ᓄᓇᖅᑲᑎᒌᓄᑦ. ᐃᓐᓇᐃᑦ ᐃᓚᖏᑦ ᑕᐃᑲᓂᒥᓂᐅᑦ ᑕᑯᔭᖅᑐᖃᑕᐅᓚᐅᕐᒪᑕ ᒪᑐᐃᖓᑎᑕᕐᒧᑦ ᐅᖃᐅᓯᖃᕈᓐᓇᖃᑦᑕᓚᐅᖅᑐᑦ ᖃᓄᐃᑦᑑᒍᓯᖏᓐᓂᓪᓗ ᐱᖁᑎᑐᖃᒥᓃᑦ ᖃᐅᔨᒃᑲᐃᒋᐊᕈᑎᒋᖃᑦᑕᖅᑐᒋᓪᓗ ᑭᓲᓂᖏᓐᓂᒃ. ᐱᖁᑎᑐᖃᒥᓃᑦ ᐊᓯᖏᓪᓗ (ᓴᐅᓂᒥᓃᑦ) ᖃᐅᔨᓵᖑᓂᐊᖅᑐᑦ ᐅᑭᐅᕐᒥ ᑕᒪᑐᒪᓂ ᑐᓴᕈᑎᓕᐅᕈᑕᐅᓂᐊᕆᓪᓗᑎᓪᓗ. ᑐᑭᓯᒋᐊᒃᑲᓂᕐᕕᑦᓴᖅ, ᐅᖄᓚᓗᑎᑦ: ᐱᐊᓂ ᕌᒻᕘᑦ ᑐᓴᐅᒪᖃᑦᑕᐅᑎᓕᕆᔩᑦ ᐊᖏᔪᖅᑳᖓ ᒐᕙᒪᒃᑯᑦ ᐃᓕᖅᑯᓯᓕᕆᔨᖏᓐᓂ ((867) 979-5531 ᖃᕆᓴᐅᔭᒃᑯᑦ : prumbolt@gov.nu.ca |