 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ, ᐊᐃᐳᕆ 4, 2003 - ᓄᓇᕗᑦ ᒐᕙᒪᖏᑦᑕ ᐊᐅᓚᑦᑎᔨᖏᑦ ᒥᓂᔅᑕᖏᑦ ᓄᒃᑎᕋᖅᑕᐅᓂᖏᑦ ᐃᓚᒋᐊᖅᑕᐅᔪᑦ ᑎᒃᑯᐊᖅᑕᐅᒋᐊᒃᑲᓐᓂᖅᑐᑎᒃ ᑐᒡᓕᖏᑦ ᒥᓂᔅᑕᐃᑦ ᐊᒻᒪᓗ ᐃᑲᔪᖅᑎᖏᑦ ᑐᒡᓕᖏᑦᑕ ᒥᓂᔅᑕᐃᑦ ᑕᒪᒃᑯᐊ ᐃᖅᑲᓇᐃᔮᒃᓴᑦ ᐃᑲᔪᖅᑎᒌᒍᑕᐅᖁᓪᓗᒋᑦ ᐊᒻᒪᓗ ᒪᓕᒃᑕᐅᖁᓪᓗᒋᑦ ᑐᕌᒐᓕᐊᕆᔭᐅᓚᐅᖅᑐᑦ ᑭᖓᐅᒻᒥ. ᐃᓕᒋᐊᖅᑕᐅᓂᖏᑦ ᓄᑖᑦ ᐱᓕᕆᐊᖑᓂᐊᖅᑐᑦ ᐊᖓᔪᖅᑲᐅᑎᓄᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂ ᒪᓕᒃᑐᑦ ᓯᕗᓕᖅᑎ ᐹᓪ ᐅᑲᓕᐅᑉ ᐱᑕᖃᖅᑎᑦᑎᓂᐊᖅᓯᒪᔭᖓᓂᒃ ᐊᔾᔨᖐᙱᑦᑐᓂᒃ ᖃᐅᔨᒪᓂᖃᐅᖁᓪᓗᒋᑦ ᐊᒻᒪᓗ ᐃᓕᓐᓂᐊᖅᑎᑕᐅᖁᓪᓗᒋᑦ ᐃᓄᐃᑦ ᐊᐅᓚᑦᑎᔨᐅᔪᑦ. “ᐊᑐᕈᒪᑦᓯᐊᕋᒃᑭᑦ ᐊᑑᑎᖃᕐᓂᖏᑦ ᕿᖓᐅᒻᒥ ᑐᑭᒧᐊᒍᑎᓕᐊᖑᓚᐅᖅᑐᑦ ᐊᖅᑯᑎᒋᓗᒋᑦ ᐱᕈᖅᐸᓪᓕᐊᔾᔪᑎᒋᓗᒋᑦ ᒐᕙᒪᒃᑯᓐᓄᑦ ᓴᖅᑭᔮᖅᑎᑦᑎᔪᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᑕᒪᒃᑯᐊ ᐊᓯᔾᔨᐅᑕᐅᔪᑦ ᐃᑲᔫᑎᓂᐊᖅᑐᑦ ᓴᖅᑭᑎᑦᑎᕙᓪᓕᐊᑎᓪᓗᑕ ᑐᕌᖅᑕᑦᑎᓐᓂᒃ ᐱᕈᖅᐸᓪᓕᐊᑎᓪᓗᒋᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᒪᓕᖁᓪᓗᒋᑦ ᐃᓄᓕᒫᓂᒃ ᐱᔨᑦᓯᖅᑕᒥᓂᒃ,” ᐅᖃᖅᑲᐅᔪᖅ ᓯᕗᓕᖅᑎ ᐅᑲᓕᖅ. ᑖᒃᑯᐊ ᐊᓯᔾᔨᐅᑕᐅᔪᑦ ᑐᓕᖏᓐᓄᑦ ᒥᓂᔅᑕᐃᑦ ᐅᑯᐊᖑᔪᑦ: ᐲᑕ ᓯᑳᑦ ᓅᓐᓂᐊᖅᑐᖅ ᐱᓕᕆᐊᒥᓂᒃ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎ ᐱᓕᕆᐊᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᑦ ᑎᒍᓯᓗᓂ ᐊᖓᔪᖅᑳᖑᓂᕐᒥᑦ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᐹᒻ ᕼᐊᐃᓐᔅ ᓅᓐᓂᐊᖅᑐᖅ ᐃᓂᒥᓂᒃ ᐊᖓᔪᖅᑳᖑᓂᕐᒥᓂᒃ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᑎᒍᓯᓗᓂ ᐱᓕᕆᐊᖓᓂᒃ ᑐᒡᓕᐊᑕ ᒥᓂᔅᑕᐅᑉ ᐃᓕᓐᓂᐊᖅᑐᓕᕆᔨᒃᑯᓐᓄᑦ. ᐊᓪᓚᒃᑎᐊᑦ ᐊᐅᓚᑦᑎᔩᑦ ᐊᒻᒪᓗ ᑐᒡᓕᐊ ᒥᓂᔅᑕᐅᑉ ᐊᐅᓚᑦᑎᔨᓄᑦ, ᒐᕙᒪᐅᖃᑎᒌᓕᕆᔨᓄᓪᓗ ᐋᓐ ᑯᕌᐳᑦ ᓅᓐᓂᐊᖅᑐᖅ ᐃᓂᒥᓂᒃ. ᑭᓯᐊᓂ ᑲᔪᓯᓂᐊᖅᑐᖅ ᐱᔨᑦᓯᖅᑎᐅᓂᕐᒥᓂᒃ ᒐᕙᒪᒃᑯᓐᓄᑦ ᑐᒡᓕᕆᔭᐅᑲᐃᓐᓇᕐᓗᓂ ᒥᓂᔅᑕᒧᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ, ᐃᓄᓕᕆᔨᒃᑯᓐᓄᓪᓗ. ᕘᓂ ᐱᓖᔅ ᐃᓚᓕᐅᑎᓂᐊᖅᑐᖅ ᓄᓇᕗᑦ ᒐᕙᒪᖏᓐᓄᑦ ᐱᒋᐊᕐᓗᓂ ᔪᓚᐃ 6, 2003 ᑐᒡᓕᕆᔭᐅᓂᐊᕐᓗᓂ ᒥᓂᔅᑕᒧᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐃᓄᓕᕆᔨᒃᑯᓐᓄᓪᓗ. ᒥᔅᑕ ᐱᓖᔅ ᓇᒃᓴᖅᑐᖅ ᑖᑦᓱᒧᖓ ᐃᓂᒧᑦ, 22-ᓂᒃ ᐃᖅᑲᓇᐃᔭᖅᓯᒪᓂᕐᒥᓂᒃ ᑐᑭᒧᐊᒃᑎᑦᑎᔨᐅᓪᓗᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓚᐅᓪᓗᑎᒃ ᐱᔨᑦᓯᖅᑎᐅᓪᓗᓂ ᐃᑲᔪᖅᑎᐅᓂᕐᒧᑦ ᑐᒡᓕᐊᓄᑦ ᒥᓂᔅᑕᐅᑉ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒫᓂᑑᕙᒥ. ᒫᓐᓇ ᒥᔅᑕ ᐱᓖᔅ ᐊᖓᔪᖅᑳᕆᔭᐅᔪᖅ ᐊᒻᒪᓗ ᐊᓪᓚᒃᑎᒻᒪᕆᐅᓪᓗᓂ ᑖᒃᑯᓇᓂ ᑲᑐᔾᔨᖃᑎᒌᓂ Chatham-Kent Health Alliance. ᔭᓐ ᕚᓪᕝ ᓅᓐᓂᐊᖅᑐᖅ ᓄᓇᓖᑦ ᒐᕙᓚᓕᕆᔨᖏᓐᓂᒃ, ᐃᖏᕐᕋᔪᓕᕆᓂᕐᒥᓪᓗ ᐊᓪᓚᒃᑎᒻᒪᕆᐅᓕᕐᓗᓂ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ ᐊᒻᒪᓗ ᑐᒡᓕᕆᔭᐅᓗᓂ ᒥᓂᔅᑕᒧᑦ ᐊᐅᓚᑦᑎᔩᑦ, ᒐᕙᒪᐅᖃᑎᒌᓕᕆᔨᓂᓗ. ᑖᒻ ᕆᑦᔅ ᓅᓐᓂᐊᖅᑐᖅ ᐃᓕᓐᓂᐊᖅᑐᓕᕆᔨᒃᑯᓐᓂᒃ ᑎᒍᓯᓗᓂ ᓄᑖᓂᒃ ᐱᓕᕆᐊᒃᓴᓂᒃ ᑐᒡᓕᕆᔭᐅᓗᓂ ᒥᓂᔅᑕᒧᑦ ᓄᓇᓖᑦ ᒐᕙᒪᓕᕆᔨᖏᓐᓂ, ᐃᖏᕐᕋᔪᓕᕆᔨᓂᓗ. ᑖᒃᑯᐊ ᐊᓯᔾᔨᐅᑕᐅᔪᑦᖅ ᐃᑲᔪᖅᑎᖏᓐᓄᑦ ᑐᒡᓕᖏᑦᑕ ᒥᓂᔅᑕᐃᑦ ᒪᑯᐊᖑᔪᑦ: ᐃᓱᓕᑦᑎᓪᓗᒍ ᓯᐊᓐᒪᒃᑎᕆᔩᑦ ᐱᓕᕆᐊᒃᓴᖏᑦ ᑏᕕᑦ ᐊᕿᐊᕈᖅ ᓅᓐᓂᐊᖅᑐᖅ ᑮᓇᐅᔭᓕᕆᔨᒃᑯᓐᓄᑦ, ᐊᔪᕈᓐᓃᖅᓴᕆᐊᖅᑐᕐᓗᓂ ᑮᓇᐅᔭᓕᕆᓂᕐᒥᑦ ᐊᒻᒪᓗ ᓇᓗᖅᑯᑎᒍᓐᓃᕐᓂᕐᒥᑦ ᐊᒻᒪᓗ ᐃᑲᔪᖅᓱᐃᔨᐅᓗᓂ ᐱᓕᕆᖃᑎᒌᖕᓂᖏᓐᓂ ᑮᓇᐅᔭᓕᕆᔨᒃᑯᑦ, ᐊᒻᒪᓗ ᐱᓕᕆᕕᐅᔪᓕᒫᑦ ᓄᓇᕗᑦ ᒐᕙᒪᖏᓐᓂ. ᕕᒃᑕ ᑐᑐ, ᐃᓕᑕᕆᔭᐅᔾᔪᑎᖃᖅᑐᖅ Level % ᑭᓇᐅᔭᓕᕆᔨᐅᓂᕐᒥᑦ, ᓅᓐᓂᐊᖅᑐᖅ ᑮᓇᐅᔭᓕᕆᔨᒃᑯᓐᓂᒃ ᑖᒃᑯᓄᖓ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓄᓕᕆᓂᕐᒧᓪᓗ ᐃᑲᔪᕐᓂᐊᕐᓗᓂ ᑮᓇᐅᔭᓕᕆᔾᔪᑕᐅᔪᑦ ᖃᓄᐃᓕᖓᓂᖏᓐᓂᒃ ᐊᒻᒪᓗ ᐃᑲᔪᖅᓱᐃᔨᐅᓗᓂ ᐃᑲᔪᖅᑕᐅᔾᔪᑎᒋᒋᐊᖃᖅᑕᖏᓐᓂᒃ ᑖᑦᓱᒪ ᐱᓕᕆᕕᐅᔫᑉ. ᐃᑲᔪᖅᑎᐊ ᑮᓇᐅᔭᓕᕆᔨᒻᒪᕆᐅᔫᑉ ᕌᑦ ᒥᐅᑲᒻ ᓅᓐᓂᐊᖅᑐᖅ ᐃᓂᒋᔭᒥᓂᒃ ᐱᒋᐊᕐᓗᒍ ᐊᐃᐳᕈ 30, 2003. ᑖᒻ ᑖᒻᓴᓐ ᓅᓐᓂᐊᖅᑐᖅ ᐃᖅᑲᓇᐃᔭᖅᑐᓕᕆᔨᒃᑯᓐᓂᒃ ᑖᒃᑯᓄᖓ ᐃᖅᑲᖅᑐᐃᔨᓕᕆᔨᒃᑯᓐᓄᑦ ᑕᐅᑐᒐᕆᓗᐊᕐᓗᒋᑦ ᐃᑲᔪᖅᑕᐅᕕᓕᕆᔾᔪᑕᐅᔪᑦ. ᓴᐃᒪᓐ ᐊᕙ ᓅᓐᓂᐊᖅᑐᖅ ᐃᖅᑲᖅᑐᐃᔨᓕᕆᔨᒃᑯᓐᓂᒃ ᓄᑖᒧᑦ ᓴᖅᑭᑎᑕᐅᕋᑖᕐᓂᑯᒧᑦ ᐃᑲᔪᖅᑎᐅᓗᓂ ᑐᒡᓕᐊᓄᑦ ᒥᓂᔅᑕᐅᑉ ᐃᑯᐱᒃᑐᓕᕆᔨᑯᓐᓄᑦ ᖁᒡᕙᕆᐊᖁᓪᓗᒋᑦ ᐊᕕᒃᑐᖅᓯᒪᓂᐅᔪᓂ ᐊᐅᓚᔾᔪᑕᐅᔪᑦ ᒫᓐᓇᒫᖅ ᐋᖅᑭᒋᐊᖅᑕᐅᓚᐅᖅᑐᓂᒃ ᐱᓕᕆᕕᖕᒥ. ᐳᕌᑦ ᐱᕗᓪ ᓅᓐᓂᐊᖅᑐᖅ ᐃᓂᒥᓂᒃ ᓯᕗᓕᖅᑎᒧᑦ ᐊᓪᓚᒃᑎᒻᒪᕆᐅᓂᕐᒥᑦ ᓅᓪᓗᓂ ᓯᕗᓕᖅᑎᐅᑉ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᒋᓗᓂᐅᒃ ᐱᓕᕆᐊᖃᕐᓗᓂ ᖁᓪᓕᖅ ᐆᒻᒪᖅᑯᑎᓕᕆᓂᕐᒧᑦ ᑯᐊᐳᕇᓴᒃᑯᓐᓂ ᑕᐅᑐᒐᕆᓗᐊᕐᒃᓗᒋᑦ ᓄᓇᕗᑦ ᐱᓕᕆᐊᖏᑦ ᐊᑐᓕᖅᑎᑕᐅᕙᓪᓕᐊᑎᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᐅᕈᑕᐅᒋᐊᖅᑐᑦ ᑕᐃᔭᐅᔪᑦ Kyoto Accord.ᐊᐃᐳᓚᕼᐊᒻ ᑕᕐᕋᓕᒃ ᓅᓐᓂᐊᖅᑐᖅ ᐋᓐᓂᐊᖃᕐᓇᖏᑦᓕᑐᕆᔨᒃᑯᓐᓂᒃ, ᐱᓄᓕᕆᔨᒃᑯᓐᓂᓪᓗ, ᐅᑎᕐᓗᓂ ᐊᖏᕐᕋᒥᓄᑦ ᓄᓇᓕᖕᓄᑦ ᐊᕐᕕᐊᓄᑦ ᐱᖠᕆᐊᖃᕐᓂᐊᕐᓗᓂ ᑐᒡᓕᕆᔭᐅᓗᓂ ᐊᖓᔪᖅᑳᖓᓐᓄᑦ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᖓᑦᑕ. ᑏᕕᑦ ᐋᖁᐊᖅ ᓅᓐᓂᐊᖅᑐᖅ ᑖᒃᑯᓇᙵᑦ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᑖᒃᑯᓄᙵᕐᓗᓂ ᒐᕙᒪᒃᑯᑦ ᓴᓇᔪᓕᕆᔨᖏᓐᓄᑦ, ᐃᑲᔪᖅᑎᒋᔭᐅᓪᓗᓂ ᑐᒡᓕᐊᓄᑦ ᒥᓂᔅᑕᐅᑉ ᖃᕆᓴᐅᔭᓕᕆᓂᕐᒧᑦ ᐱᔨᑦᓯᕋᐅᑎᓄᑦ. ᐅᑲᓕᖅ ᐃᔨᑦᓯᐊᖅ ᓅᓐᓂᐊᖅᑐᖅ ᑐᑭᒧᐊᒃᑎᑦᑎᔨᐅᓂᕐᒥᓂᒃ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᖏᓐᓂ, ᑐᑭᒧᐊᒃᑎᑦᑎᔨᐅᓂᕐᒥᑦ ᐊᑐᐊᒐᕐᓄᑦ ᑖᒃᑯᓇᓂ ᐊᐅᓚᑦᑎᔨᓂ, ᒐᕙᒪᐅᖃᑎᒌᓕᕆᔩᓪᓗ, ᐊᖓᔪᖅᑳᖑᓂᕐᒥᓂᓪᓗ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐃᑲᔪᖅᑎᒋᔭᐅᓂᐊᓕᕐᓗᓂ ᑐᒡᓕᐊᓄᑦ ᒥᓂᔅᑕᐅᑉ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ. ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦᑕ ᓄᒃᑎᖅᑕᐅᓂᖏᑦ ᐊᑐᓕᕐᓂᐊᖅᑐᑦ ᑕᒡᕙᓂ, ᑐᖔᓂᓘᓐᓃᑦ ᐊᐃᐳᕈ 18, 2003. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ: ᐱᐅᓪ ᑭᓖ ᑐᓴᒐᒃᓴᓕᕆᔨ ᐊᓪᓚᒡᕕᐊ ᓯᕗᓕᖅᑎᐅᑉ (867) 975-5059 |