 |
|
ᐃᖃᓇᐃᔭᕐᕕᖏᑦ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᐃᖃᓗᐃᑦ, ᓄᓇᕗᑦ, ᐊᐃᐳᕈ 4, 2003 --ᓄᓇᕗᒥ ᐊᐅᓚᑦᑎᔩᑦ ᒥᓂᔅᑕᐃᑦ ᐊᓯᖏᓐᓄᒃ ᓄᒃᑎᖅᑕᐅᔪᑦ ᐱᓕᕆᐊᖏᑦᑕ, ᐃᑲᔪᖅᑎᒌᒍᓐᓇᖁᓪᓗᒋᑦ ᐱᓕᕿᐊᒃᓴᓂᒃ ᐊᒻᒪᓗ ᖁᒡᕙᕆᐊᕐᓗᒋᑦ ᒐᕙᒪᒃᑯᑦ ᓯᕗᒻᒧᐊᒃᐸᓪᓕᐊᓂᖏᑦ, ᑎᑭᒍᓱᐊᖅᑎᓪᓗᑕ ᑐᕌᒐᓕᐊᕆᔭᐅᓚᐅᖅᑐᓂᒃ ᕿᖓᐅᒻᒥ. ᓯᕗᓕᖅᑎ ᐹᓪ ᐅᑲᓕᖅ ᓅᑉᐸᓪᓕᐊᑎᑦᓯᓕᖅᑎᓪᓗᒍ ᒐᕙᒪᒃᑯᑦ ᑕᓪᓕᒪᒋᔭᖓᓐᓄᑦ ᐊᕐᕌᒍᒧᑦ, ᑕᐅᑐᒐᕆᕙᐅᖏᓐᓇᕐᓂᐊᖅᑐᑦ ᓴᖅᑭᑎᑕᐅᓂᐊᕐᓂᕋᖅᑕᐅᓚᐅᖅᑐᑦ ᓄᓇᕗᒥᐅᓄᑦ. “ᑖᓐᓇ ᒐᕙᒪᐅᔪᖅ ᓱᓕ ᐱᓕᕆᐊᖃᕋᓱᐊᖅᑐᑦ ᑐᕌᖅᑕᐅᔪᓂᒃ ᓴᖅᑭᑎᑦᓯᒍᒪᓂᕐᒥᑦ ᓄᓇᖅᑲᑎᒌᑦᓯᐊᕐᓂᕐᒥᑦ, ᐱᔭᕆᐊᑐᙱᑦᑐᓂᒃ ᐊᒻᒪᓗ ᑲᑐᔾᔨᖃᑎᒌᓂᒃ, ᓇᖕᒥᓂᖅ ᒪᑭᒪᒍᓐᓇᖅᑐᓂᒃ ᐊᒻᒪᓗ ᑲᔪᓯᓯᒪᔪᓂᒃ ᐃᓕᓐᓂᐊᖏᓐᓇᕈᓐᓇᕐᓂᕐᒥᑦ. ᓄᓇᕗᒥᐅᓄᑦ ᐅᖃᐅᔾᔭᐅᓯᒪᒐᑦᑕ ᖃᓄᐃᓕᐅᕈᓐᓇᖅᑐᓂᒃ ᒐᕙᒪᖃᕈᒪᓪᓗᑎᒃ, ᕿᓂᖅᑎᓪᓗᒋᑦ ᐋᖅᑭᒋᐊᕈᑎᒃᓴᓂᒃ ᑕᒪᒃᑯᓄᖓ ᐊᒃᓱᕈᕐᓇᖅᑐᓄᑦ. ᑕᒪᒃᑯᐊ ᐊᓯᔾᔨᐅᑕᐅᔪᑦ ᑕᑯᒃᓴᐅᑎᑦᑎᔪᑦ ᓈᓚᖕᓂᑦᑎᓐᓂᒃ ᐊᒻᒪᓗ ᑭᐅᖃᑦᑕᕐᓂᑦᑎᓐᓂᒃ,” ᐅᖃᖅᑲᐅᔪᖅ ᓯᕗᓕᖅᑎ ᐅᑲᓕᖅ. ᑖᓐᓇ ᓯᕗᓕᖅᑎ ᐅᖃᖅᓯᒪᖕᒥᔪᖅ ᐱᒻᒪᕆᐅᑎᑦᓯᓂᕐᒥᓂᒃ ᑖᒃᑯᓂᖓ ᐊᖏᕈᑕᐅᒋᐊᖃᕐᓂᖏᓐᓂᒃ ᓄᓇᕗᒧᑦ ᐆᒪᔪᓕᕆᓂᕐᒧᑦ ᐱᖁᔭᕐᔪᐊᓂᒃ ᐊᒻᒪᓗ ᐃᓚᐅᑎᑕᐅᓂᖏᑦ ᐃᓄᐃᑦ ᖃᐅᔨᒪᔭᑐᖃᖏᑦ ᒐᕙᒪᒃᑯᓐᓂ. “ᐃᓕᖅᑯᓯᓕᕆᓂᖅ, ᐅᖃᐅᓯᓕᕆᓂᖅ, ᐃᓐᓇᑐᖃᓕᕆᓂᖅ, ᐅᕕᒃᑲᓕᕆᓂᕐᓗ ᐃᑲᔪᖅᓱᖅᑕᐅᓯᒪᐃᓐᓇᕐᒪᑕ ᒥᓂᔅᑕᓕᒫᓄᑦ ᑕᒡᕙᓂ ᒐᕙᒪᒃᑯᓐᓂ. ᒫᓐᓇᒫᖅ ᓴᖅᑭᑎᑕᐅᓚᐅᕐᓂᖏᑦ ᑲᑎᒻᒪᔩᑦ ᐊᒻᒪᓗ ᑐᑦᑕᕐᕖᑦ ᑕᑯᒃᓴᐅᑎᑦᑎᔪᑦ ᑲᑐᔾᔨᖃᑎᒌᒃᑐᑕ ᐃᑲᔪᖅᓱᐃᓂᑦᑎᓐᓂᒃ ᐊᒻᒪᓗ ᖁᒡᕙᕆᐊᕆᔪᒪᓂᑦᑎᓐᓂᒃ ᐱᔨᑦᓯᕋᐅᑕᐅᔪᒥᒃ ᑕᒪᑐᒥᖓ ᐱᑕᖃᕆᐊᖃᒻᒪᕆᒃᑐᓂᒃ ᐱᓕᕆᕕᐅᔪᓂ ᒐᕙᒪᒃᑯᓂᓕᒫᖅ” ᐅᖃᖅᑲᐅᔪᖅ ᓯᕗᓕᖅᑎ ᐅᑲᓕᖅ. ᐃᓄᐃᑦ ᐊᑐᓃᖅᑐᑦ ᐊᓯᔾᔨᖅᑕᐅᔪᑦ ᐊᒻᒪᓗ ᑎᒃᑯᐊᖅᑕᐅᒃᑲᓐᓂᖅᑐᑦᖅ ᒪᓕᒃᑐᑦ ᓯᕗᓕᖅᑎᐅᑉ ᐱᓕᕆᐊᖃᕈᒪᓂᖓᓂᒃ ᕿᖓᐅᒻᒥ ᑐᑭᒧᐊᒍᑎᓕᐊᖑᓚᐅᖅᑐᓂᒃ ᑐᕌᒐᕐᓂᒃ ᖃᓄᓕᐅᕈᓘᔭᕈᑎᖃᕈᓐᓇᖅᑐᓂᒃ ᐃᓕᑉᐸᓪᓕᐊᓂᒃᑯᑦ. “ᐃᓕᓐᓂᐊᖅᑐᓕᕆᓂᖅ ᑭᒃᑯᓕᒫᓄᑦ ᐱᓕᕆᐊᕆᔭᒃᓴᐅᖕᒪᑦ. ᐱᑕᖃᖅᑎᑦᓯᒋᐊᖃᕋᑦᑕ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᖅᑯᑎᒋᒋᐊᖃᖅᑕᖏᓐᓂᒃ ᓴᖅᑭᑎᑦᑎᒐᓱᐊᖅᑎᓪᓗᒋᑦ ᐱᓕᕆᐊᒃᓴᕆᑎᑕᐅᔪᓂᒃ, ᐃᓕᓐᓂᐊᕈᑎᒃᓴᓂᒃ ᐱᕙᓪᓕᐊᑎᑦᑎᓂᕐᒥᑦ ᑎᑭᓪᓗ ᐃᖅᑲᓇᐃᔮᕇᓐᓇᕐᓂᐊᖅᑕᒥᓂᒃ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᐃᓕᓴᐃᔨᒃᓴᓂᒃ ᐃᓕᓐᓂᐊᖅᑎᑦᑎᓂᖅ,” ᐅᖃᖅᑲᐅᔪᖅ ᓯᕗᓕᖅᑎ ᐅᑲᓕᖅ. ᓂᕈᐊᖅᑕᐅᓯᒪᔪᖅ ᒪᓃᑦᑐᖅ ᑖᒻᓴᓐ ᓅᓐᓂᐊᖅᑐᑦ ᑖᒃᑯᓇᙵᑦ ᓄᓇᓖᑦ ᒐᕙᒪᓕᕆᔨᖏᓐᓂᒃ, ᐃᖏᕐᕋᔪᓕᕆᓂᕐᒥᓪᓗ ᑎᒍᓯᓗᓂ ᓄᑖᓂ ᐱᓕᕆᐊᕆᓂᐊᖅᑕᒥᓂᒃ ᑕᒡᕙᓂ ᒥᓂᔅᑕᐅᓗᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᒻᒪᓗ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ. ᓂᕈᐊᖅᑕᐅᓯᒪᔪᖅ ᐲᑕ ᕿᓚᕝᕙᖅ ᓅᓐᓂᐊᖅᑐᖅ ᐃᓕᓐᓂᐊᖅᑐᓕᕆᔨᒃᑯᓐᓂᒃ ᐱᓕᕆᐊᖃᕐᓂᐊᓕᕐᓗᓂ ᒥᓂᔅᑕᐅᓗᓂ ᐃᓕᖅᑯᓯᓕᕆᓂᖅ, ᐅᖃᐅᓯᓕᕆᓂᖅ, ᐃᓐᓇᑐᖃᓕᕆᓂᖅ, ᐅᕕᒃᑲᓕᕆᓂᕐᓗ ᐊᒻᒪᓗ ᒥᓂᔅᑕᐅᓗᓂ ᓄᓇᓖᑦ ᒐᕙᒪᓕᕆᔨᖏᓐᓄᑦ, ᐃᖏᕐᕋᔪᓕᕆᓂᕐᒧᓪᓗ. ᓂᕈᐊᖅᑕᐅᓯᒪᔪᖅ ᐅᓛᔪᒃ ᐊᑭᓱᒃ ᑎᒍᓯᐊᖏᓐᓇᕐᓂᐊᖅᑐᖅ ᐱᓕᕆᐊᕆᔭᐅᓂᖓᓂᒃ ᐃᑯᐱᒃᑐᓕᕆᔨᒃᑯᑦ. ᒫᓐᓇ ᐱᒋᐊᑲᐅᑎᒋᓗᓂ, ᑖᒃᑯᐊ ᐊᓯᔾᔨᖅᑐᖅ ᓯᕗᓕᖅᑎᐅᑉ ᐊᖓᔪᖅᑲᐅᑏᑦ ᐃᖅᑲᓇᐃᔭᖅᑎᖏᑦ ᒪᑯᐊᖑᔪᑦ: ᐃᖃᓗᖕᒥᐅᖅ ᑰᒃ ᐃᔨᑦᓯᐊᖅ ᐊᖏᕈᑎᖃᖅᑐᖅ ᐃᓂᖓᓂᒃ ᐃᑲᔪᖅᑎᒻᒪᕆᐊᑕ ᑎᑎᕋᖅᑎᒋᓪᓗᓂᐅᒃ ᓯᕗᓕᖅᑎᐅᑉ. ᐱᒋᐊᕐᓗᒍ ᐊᐃᐳᕈ 28, ᒥᔅᑕ ᐃᔨᑦᓯᐊᖅ ᐱᓕᕆᐊᕆᓕᕐᓂᐊᖅᑕᖏᑦ ᐃᓚᖃᖅᑐᑦ ᑐᓴᐅᒪᖃᑎᒌᒃᑎᑦᑎᔨᐅᓗᓂ ᒪᓕᒐᓕᐅᖅᑎᓂᒃ ᐊᒻᒪᓗ ᓄᓇᓕᖕᓂᑦ ᐊᒻᒪᓗ ᐃᓄᑦᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐃᓱᒪᒋᔭᐅᔪᑦ ᐊᐅᓚᔾᔪᑎᖏᓐᓅᖅᐸᓪᓕᐊᓗᒋᑦ ᓯᕗᓕᖅᑎᐅᑉ ᐊᓪᓚᒡᕕᐊᑕ. ᐱᐅᓪ ᑭᓖ ᐃᓚᓕᐅᑎᔪᖅ ᓯᕗᓕᖅᑎᒧᑦ ᑐᓴᒐᒃᓴᓕᕆᔨᐅᓂᐊᕐᓗᓂ. ᒥᔅᑕ ᑭᓖ ᐅᖃᖅᑎᐅᖃᑦᑕᓚᐅᖅᑐᖅ ᓰᕖᓰᒃᑯᓐᓄᑦ, ᐅᑭᐅᖅᑕᖅᑐᒥ ᓈᓚᐅᑎᖃᖅᑎᑦᑎᔩᑦ ᔫᑳᓐ ᐊᒻᒪᓗ ᐱᓕᕆᖃᑦᑕᖅᓯᒪᓪᓗᓂ ᒐᕙᒪᒃᑯᑦ ᑐᓴᒐᒃᓴᓕᕆᔨᖏᓐᓄᑦ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ ᐊᒻᒪᓗ ᑲᓇᑕᐅᑉ ᒪᓕᖓᓕᐅᕐᕕᒡᔪᐊᖓᓂ. ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ: ᐱᐅᓪ ᑭᓖ ᑐᓴᒐᒃᓴᓕᕆᔨ ᐊᓪᓚᒡᕕᐊ ᓯᕗᓕᖅᑎᐅᑉ (867) 975-5059 |