1973-ᒥ ᐃᓄᐃᑦ ᑕᐱᕇᒃ ᑲᓇᑕᒥ ᖃᐅᔨᓴᕆᐊᓕᓚᐅᖅᐳᑦ ᐃᓄᖕᓄᑦ ᓄᓇᒥᒃ ᐊᑐᕐᓂᕐᒥᒃ ᓄᓇᖃᖅᑎᓂᒡᓗ ᓇᓗᓇᕈᓐᓃᕈᑕᐅᓚᐅᖅᖢᓂᓗ ᖃᓄᖅ ᐊᖏᑎᒋᖕᒪᖔᑦ ᐃᓄᐃᑦ ᓄᓇᖃᖅᑳᖅᓯᒪᔪᑦ ᐱᖃᕐᓂᖏᓐᓂᒃ ᐅᑭᐅᖅᑕᖅᑐᒥ. ᑖᓐᓇ ᖃᐅᔨᓴᕐᓂᐅᔪᖅ ᐋᕿᒍᑕᐅᕗᖅ ᖃᐅᔨᓴᕐᓂᕐᒧᑦ ᑐᙵᕕᒋᔭᐅᔪᓄᑦ ᓄᓇᕘᒥ.

1976-ᒥ ᐃᓄᐃᑦ ᑕᐱᕇᒃ ᑲᓇᑕᒥ ᐱᓇᔫᑎᖃᓕᓚᐅᖅᐳᑦ ᓄᓇᕘᑉ ᓴᖅᑭᑕᐅᓂᖓᓂᒃ ᐃᓚᒋᔭᐅᓪᓗᓂ ᐃᓗᓕᖃᐅᑦᑎᐊᖅᑐᒥᒃ ᐊᖏᖃᑎᒌᖕᓂᕐᒧᑦ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᓂᒃ ᓄᓇᑦᑎᐊᒥ. ᓄᓇᕗᒻᒥ ᐱᓇᔪᒃᑕᐅᔪᒪᔪᑦ ᐃᒪᐃᖁᔨᕗᑦ ᑖᒃᑯᐊᒃ Beaufort Sea ᐊᒻᒪᓗ Yukon North Slope ᐃᓂᖏᒃ ᐊᑐᖅᑕᐅᖃᑦᑕᕐᓂᖏᑦ ᐃᓄᕕᐊᓗᖕᓂᑦ ᐃᓚᓕᐅᔭᐅᓯᒪᖁᔭᐅᓪᓗᑎᒃ ᓄᓇᕗᒻᒧᑦ.

ᑕᕝᕙᓂᑦᑕᐃᓐᓇᖅ ᐊᕐᕌᒍᒥ, ᐱᕙᓪᓕᐊᓂᕐᒧᑦ ᐊᔭᐅᖅᑐᖃᖅᐸᓪᓕᐊᓕᕐᓂᖓᓄᑦ ᑕᐅᕙᓂ Beaufort Sea-ᒥ, ᑖᒃᑯᐊ ᐃᓄᕕᐊᓗᐃᑦ ᓇᖕᒥᓂᖅ ᐲᖅᑎᓕᓚᐅᖅᓯᒪᔪᑦ ᐃᓄᐃᑦ ᑕᐱᕇᒃᑯᓐᓂᑦ ᐋᔩᖃᑎᖃᕈᒪᒧᑦ ᐃᓛᒃᑰᖅᑐᒥᒃ ᓄᓇᑖᕋᓱᖕᓂᕐᒧᑦ ᐊᖏᖃᑎᒌᒍᑎᒃᓴᒥᒃ.

ᑕᕝᕙᓂᑦᑕᐃᓐᓇᖅ ᓱᓕ ᐊᕐᕌᒍᒥ, ᒐᕙᒪᑐᖃᒃᑯᑦ ᓂᕈᐊᖅᑐᓕᕆᔨᒃ ᑭᒡᓕᒋᔭᐅᔪᓄᒃ ᑲᒥᓴᖏᑦ ᐃᒪᐃᖁᔨᓚᐅᖅᓯᒪᔪᑦ, ᐊᕕᒡᓗᒍ ᓄᓇᑦᑎᐊᖅ ᒪᕐᕈᐃᓕᖅᑎᓪᓗᒍ ᓂᕈᐊᕐᕕᐅᔪᓐᓇᖅᑐᓂᒃ ᒐᕙᒪᑐᖃᒃᑯᓐᓄᑦ ᐃᓂᐅᓕᖅᑎᓪᓗᒋᒃ: ᓄᓇᑦᑎᐊᖅ ᐊᒻᒪᓗ ᐅᐊᓕᓂᕐᒥᐅᑦ ᐅᑭᐅᖅᑕᖅᑐᖓ. ᑖᓐᓇ ᐊᑐᓕᖁᔭᐅᓇᔭᖅᑐᖅ ᐊᑐᓕᖅᑎᑕᐅᓚᐅᖅᓯᒪᕗᖅ 1979-ᒥ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᖅᓯᑎᓪᓗᒍ.

1980 ᐊᕐᕌᒍᑕᒫᖅᓯᐅᑎᒥᓂᒃ ᑲᑎᒪᑎᓪᓗᒋᑦ ᐅᑐᐱᕆᐅᑎᓪᓗᒍ, ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔭᖅᑐᖃᑕᐅᓯᒪᔪᑦ ᑕᒪᕐᒥᑦᑎᐊᖅ ᐊᓂᒍᖅᑎᑦᑎᓚᐅᖅᓯᒪᔪᑦ ᐱᖁᔨᕗᖔᕈᑎᒥᒃ ᐅᖃᖅᓯᒪᓪᓗᑎᒃ ᓴᖅᑭᑦᑎᖁᔨᓪᓗᑎᒃ ᓄᓇᕗᒻᒥᒃ.

1990 ᑐᙵᕕᒃᑯᑦ ᓄᓇᕗᒻᒧᑦ ᑭᒡᒐᖅᑐᐃᔪᓪᓗ ᒐᕙᒪᑐᖃᒃᑯᓐᓂᒃ ᐅᑭᐅᖅᑕᖅᑐᒧᓪᓗ ᒐᕙᒪᒋᔭᐅᔪᓂᒃ ᐊᑎᓕᐅᖃᑎᒌᓚᐅᖅᐳᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᓂᒃ ᓯᕗᓪᓕᖅᐹᖅᓯᐅᑎᓂᒃ ᐄᐳᕈ-ᖑᑎᓪᓗᒍ. ᑖᓐᓇ ᐊᖏᖃᑎᒌᒍᑎ ᐃᑲᔪᖅᑐᐃᔪᖅ ᐊᕕᒃᑕᐅᓇᔭᕐᓂᖓᓂᒃ ᓄᓇᑦᑎᐊᖅ ᐱᕕᖃᖅᑎᑦᑎᓪᓗᓂᓗ ᓂᕈᐊᕐᓂᐅᓇᔭᖅᑐᓂᒃ ᑭᒡᓕᒋᔭᐅᓇᔭᖅᑐᒧᑦ.

1992 ᔭᓄᐊᕆᒥ, ᑐᙵᕕᒃᑯᑦ ᒐᕙᒪᒃᑯᓪᓗ ᐋᔩᖅᑎᖏᑦ ᐊᖏᖃᑎᒌᓚᐅᖅᐳᑦ ᐊᖏᓂᖅᓴᒻᒪᕆᖏᓐᓄᑦ ᐃᓗᓕᖏᓐᓄᑦ ᑭᖑᓪᓕᖅᐹᖅᓯᐅᑎᐅᑉ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᐅᑉ ᓄᓇᕗᒻᒧᑦ. ᑖᓐᓇ ᐊᖏᖃᑎᒌᒍᑎ ᐃᓗᓕᖃᖅᑐᖅ ᐱᓕᕆᐊᖑᒻᒪᕆᒍᒪᔪᓂᒃ ᓴᖅᑭᑎᑦᑎᓂᐊᕐᓗᓂ ᓄᓇᕗᒻᒥᒃ ᒐᕙᒪᒋᓂᐊᖅᑕᖓᓂᒡᓗ, ᑕᒪᓐᓇ ᐊᑐᕋᔭᖅᖢᓂ ᑭᒡᓕᒋᔭᐅᔪᒧᑦ ᓂᕈᐊᖅᑐᖃᓕᖅᐸᑦ ᑭᖑᓪᓕᖅᐹᖅᓯᐅᑎᒥᒡᓗ ᓄᓇᕗᒻᒥ ᒐᕙᒪᖃᕐᓂᐊᕐᓗᓂ ᐊᑐᖅᑕᐅᖁᔭᐅᔪᓂᒃ. ᑖᒃᑯᐊ ᐊᑐᖅᑕᐅᖁᔭᐅᔪᑦ ᐃᓗᓕᖃᕋᔭᖅᐳᑦ ᖃᖓᒃᑰᕋᔭᕐᓂᖓᓂᒃ ᐊᑐᖅᑕᐅᓇᔭᖅᑐᓂᒡᓗ ᓴᖅᑭᑎᑦᑎᓂᐊᕐᓗᓂ ᓄᓇᕗᒻᒥᒃ.

1992 ᐅᓄᕐᓂᖅᓴᐃᑦ ᓂᕈᐊᖅᑏᑦ ᓄᓇᑦᑎᐊᒥ ᓄᓇᕗᒻᒥᓗ ᐊᖏᓚᐅᖅᑐᑦ ᐋᖅᑭᒃᑕᐅᔪᒪᔪᒧᑦ ᑭᒡᓕᒋᔭᐅᓂᐊᖅᑐᒧᑦ ᐊᕕᖕᓂᐊᓕᖅᑎᓪᓗᒋᑦ ᒪᐃᒥ ᓂᕈᐊᓂᖃᖅᖢᑎᒃ ᑕᒪᑐᒧᖓ.

ᐅᑐᐱᕆᐅᑎᓪᓗᒍ, ᑐᙵᕕᒃᑯᑦ ᒐᕙᒪᒃᑯᓐᓄᓪᓗ ᑭᒡᒐᖅᑐᖅᑏᑦ ᐊᑎᓕᐅᓚᐅᖅᐳᑦ ᓄᓇᕗᒻᒥ ᒐᕙᒪᖃᕐᓂᐊᕐᓗᓂ ᐊᑐᖅᑕᐅᖁᔭᐅᔪᓂᒃ, ᑕᒪᓐᓇᓗ ᐋᖅᑭᒃᓯᔾᔪᑎᒋᓪᓗᓂᔾᔪᒃ ᓴᖅᑭᑎᑕᐅᕙᓪᓕᐊᓂᐊᓕᕐᓂᖓᓄᑦ ᓄᓇᕗᑦ ᐄᐳᕈ 1, 1999-ᒥ ᐱᒋᐊᕐᓗᓂ.

ᓄᕕᐱᕆᐅᓕᖅᑎᓪᓗᒍ, ᓄᓇᕘᓕᒫᒥ ᓂᕈᐊᕐᓂᖅᑕᖃᖅᖢᓂ, ᐃᓄᐃᑦ ᓄᓇᕗᒻᒥᐅᑕᐃᑦ ᐊᖏᒻᒪᕆᓕᓚᐅᖅᓯᒪᔪᑦ ᑖᔅᓱᒥᖓ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ.

1993 ᓄᓇᕗᒻᒧᑦ ᐊᖏᖃᑎᒌᒍᑎ ᐊᑎᓕᐅᖅᑕᐅᓚᐅᖅᐳᖅ ᒪᐃ-ᖑᑎᓪᓗᒍ. ᔫᓂ-ᐅᓕᖅᑎᓪᓗᒍ ᓄᓇᕗᒻᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᒪᓕᒐᕐᔪᐊᖅ ᓄᓇᕗᒻᒧᓪᓗ ᒪᓕᒐᕐᔪᐊᖅ ᐊᑐᓕᖅᑎᑕᐅᓚᐅᖅᐳᒃ ᒪᓕᒐᓕᐅᕐᕕᒡᔪᐊᒥ ᑯᐃᓐ-ᓗ ᑭᒡᒐᖅᑐᖅᑎᖓᑕ ᐊᖏᖅᖢᓂᒋᑦ.

1995-ᒥᓗ 1996-ᒥᓗ ᑐᒦᑦ ᐊᐱᓵᖅᑐᒃᑯᑦ ᐊᒻᒪᓗ ᑐᒦᑦ ᐊᐃᑉᐸᖓ, ᓯᑎᑎᕋᖅᓯᒪᔪᒃ ᑎᑎᕋᖅᑕᐅᓪᓗᑎᒃ ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᑲᒥᓴᓂᑦ, ᐃᒪᓐᓇᐅᖁᔨᓚᐅᖅᓯᒪᔪᒃ, ᑕᒪᒃᑯᐊ ᑐᑦᑕᕐᕕᒋᔭᐅᔪᑦ ᐊᕕᒃᓯᒪᓂᐅᔪᓂᓗ ᐊᐅᓚᑕᐅᕙᒃᑐᑦ ᓄᓇᕗᒃᑯᑦ ᒐᕙᒪᖓᑕ ᓯᐊᒻᒪᒃᑎᖅᑕᐅᓗᑎᒃ ᓄᓇᓕᖕᓄᑦ. ᑐᒦᑦ ᐊᐃᑉᐸᖓ ᐊᑐᖅᑕᐅᓯᒪᕗᖅ ᑐᙵᕕᒋᔭᐅᓪᓗᓂ ᒐᕙᒪᒋᔭᐅᔪᒧᑦ ᓄᓇᕗᒻᒧᑦ.

1997 ᑎᑎᕋᕐᕕᒋᓂᐊᖅᑕᖓ ᑲᒥᓯᓇᐅᓚᐅᑲᒃᑑᑉ ᐋᖅᑭᒃᑕᐅᓚᐅᖅᐳᖅ ᐃᑲᔪᖁᒧᑦ ᐸᕐᓇᒃᐸᓪᓕᐊᑎᓪᓗᒋᑦ ᓴᖅᑭᑎᑦᑎᓂᐊᕐᓗᓂ ᓄᓇᕗᒻᒥᒃ. ᑖᓐᓇ ᑎᑎᕋᕐᕕᒃ ᑲᒪᒋᔭᒃᓴᖃᖅᑎᑕᐅᕗᖅ ᐋᖅᑭᒃᓱᐃᓂᐊᕐᓗᓂ ᐊᐅᓚᔪᓐᓇᖅᑐᒥᒃ ᒐᕙᒪᒋᔭᐅᓂᐊᖅᑐᒥᒃ ᐊᐅᓚᓯᒋᐊᕈᓐᓇᕐᓗᓂᓗ ᑲᔪᓯᓂᖃᑦᑎᐊᕐᓗᓂ ᐄᐳᕈ 1, 1999-ᒥ.

1998 ᐊᓯᔾᔨᕆᐊᖅᑕᐅᔪᑦ ᓄᓇᕗᒻᒧᑦ ᒪᓕᒐᕐᔪᐊᒧᑦ ᐊᑐᓕᖅᑎᑕᐅᓚᐅᖅᐳᑦ ᒪᓕᒐᓕᐅᕐᕕᒡᔪᐊᒥ ᐊᒻᒪᓗ

ᐊᖏᖅᑕᐅᓪᓗᑎᒃ ᑯᐃᓐ ᑭᒡᒐᖅᑐᖅᑎᖓᓂᑦ.