Havaktingit

You are here

ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ

ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ

ᑭᓲᖕᒪᑦ ᐊᒫᖅᑖᕐᓂᖅ[1]?   

ᑐᕌᖅᑕᐅᓇᓱᐊᖅᑐᑦ ᐊᒫᖅᑖᕐᓂᒃᑯᑦ ᑐᓗᖅᑕᕈᑕᐃᔭᐃᓗᑎᒃ ᐃᓕᓐᓂᐊᒃᑲᓐᓂᒐᒃᓴᓄᑦ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᐃᑲᔪᕐᑐᐃᓗᑎᒡᓗ ᓄᓇᕗᑦ ᒐᕙᒪᒃᑯᖏᓐᓂᑦ ᐱᓕᕆᔨᒻᒪᕆᒃᓴᓄᑦ ᐃᓐᓄᒃᓯᖃᑦᑕᖁᓪᓗᒋᑦ ᐊᔪᙱᑦᑐᓂᑦ ᐃᓄᖕᓂᑦ ᐃᖅᑲᓇᐃᔭᖅᑎᓂᑦ.

ᐊᒫᖅᑖᕐᓂᖅ ᑮᓇᐅᔭᖃᖅᑎᑦᑎᕙᒃᐳᑦ ᐃᓕᓐᓂᐊᒃᑲᓐᓂᑯᑖᖕᓂᖕᒧᑦ ᓄᖅᑲᖓᐅᑎᓂᑦ ᓄᓇᕗᑦ ᒐᕙᒪᒃᑯᖏᑦᑕ ᐃᖅᑲᓇᐃᔭᖅᑎᖁᑎᖏᓐᓄᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑦ ᐃᓄᐃᑦ ᐊᑎᓕᐅᖅᑕᐅᓯᒪᔪᖁᑎᖏᓐᓂᑦ [ᑕᐃᔭᐅᔪᑦ “ᐃᓄᐃ”  ᐊᑐᐊᖅᓯᔾᔪᑎᓂᑦ] ᐊᔪᕈᓐᓃᕈᒪᓗᑎᒡᓗ ᐃᓐᓄᒃᑕᐅᔪᓐᓇᓗᐊᙱᑦᑐᒥᑦ ᐃᖅᑲᓇᐃᔮᒥᑦ ᐱᓕᕆᔨᒻᒪᕆᐅᓂᖕᒥᓪᓘᓐᓃᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐱᑕᖃᙱᑦᑐᑦ ᐱᓕᕆᕝᕕᖏᓐᓂᑦ.

ᑐᙵᕕᒋᔭᐅᔪᑦ

ᐅᓇ ᐱᓕᕆᐊᒃᓴᖅ ᒪᓕᒃᑐᑦ ᐃᓄᐃᑦ ᐱᒻᒪᕆᐅᒋᔭᖏᓐᓂᑦ:

  • ᐃᓅᖃᑎᒌᑦᓯᐊᕐᓂᖅ: ᐃᒃᐱᒍᓱᑦᓯᐊᕐᓂᖅ ᐃᓚᒌᑦᓯᐊᕐᓂᕐᓗ, ᐱᑦᓯᐊᕐᓂᕐᓗ ᐃᓅᖃᑎᑦᑎᓐᓂᒃ.
  • ᑐᙵᓇᕐᓂᖅ: ᑐᙵᓇᕐᓗᓂ ᐃᓅᖃᑎᒧᑦ, ᑐᙵᓇᕐᓗᓂ ᐃᓚᐃᓐᓇᖅᓯᐅᙱᓪᓗᓂ.
  • ᐱᔨᑦᓯᕐᓂᖅ: ᐱᔨᑦᑎᕐᓗᓂ ᐊᒻᒪᓗ ᐱᖃᖅᑎᑦᑎᓗᓂᓗ ᐃᓚᒋᔭᒥᑦ/ᓄᓇᓕᖕᓂᓪᓘᓐᓃᑦ. 
  • ᐋᔩᖃᑎᒌᖕᓂᖅ: ᐋᖅᑭᒃᓯᒪᓕᖅᑎᑦᑎᓂᖅ ᐅᖃᖃᑎᒌᖕᓂᒃᑯᑦ ᐊᖏᖃᑎᒌᖕᓂᒃᑯᓪᓗ. 

ᖃᓅᓲᖑᖕᒪᑦ?

ᐅᓂᒃᑳᑦ

ᓄᓇᕗᑦ ᒐᕙᒪᒃᑯᖏᑦᑕ ᐱᓕᕆᕝᕕᖏᑦ ᑭᒃᑯᑐᐃᓐᓇᖕᓄᓪᓗ ᑎᒥᐅᔪᑦ [ᑕᐃᔭᐅᔪᑦ ᑕᐃᒪᐃᓐᓄᑦ ‘ᐱᓕᕆᕝᕕᐅᔪᑦ’ ᐊᑐᐊᖅᓯᔾᔪᑎᓂᑦ] ᓇᓗᓇᐃᕐᓯᓗᑎᒃ ᐃᖅᑲᓇᐃᔮᓂᑦ ᐃᖅᑲᓇᐃᔮᒃᓴᒻᒪᕆᖕᓂᓪᓘᓐᓃᑦ ᐃᓐᓄᒐᒃᓴᐅᙱᑦᑐᑦ ᐃᓕᓐᓂᐊᖅᓯᒪᓂᑯᒃᑲᓐᓂᖃᕆᐊᖃᖅᖢᑎᒃ/ᓇᓗᓇᐃᒃᑯᑕᖃᕆᐊᖃᕐᓗᓂᓘᓐᓃᑦ ᐱᓕᕆᒻᒪᕆᐅᓂᖕᒧᑦ.

ᐃᓄᒃ ᐃᖅᑲᓇᐃᔭᖅᑎ ᐱᓇᓱᐊᕈᒪᒃᐸᑦ ᓇᓕᐊᖕᓂᑦ ᐃᖅᑲᓇᐃᔮᓂᑦ ᐱᓕᕆᐊᒃᓴᓂᓪᓘᓐᓃᑦ, ᐊᓯᐊᓃᓪᓗᓂᓗ ᐱᓕᕆᕝᕕᖕᒥᑦ, ᐃᖅᑲᓇᐃᔭᖅᑎ ᑕᑯᔪᓐᓇᖅᑐᖅ ᐃᖅᑲᓇᐃᔮᒧᑦ ᐱᕙᒌᔭᐃᑎᑦᑎᔨᒻᒪᕆᖕᒥᑦ (ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ) ᕿᒥᕐᕈᓗᓂ ᐊᒫᖅᑖᕐᓂᖅ ᓂᕈᐊᕐᓗᒍ ᐱᐊᓂᒃᓯᓂᐊᕐᓗᓂ ᐃᓕᓐᓂᐊᒃᑲᓐᓂᕐᓯᒪᔭᕆᐊᓕᖕᓂᑦ.  

ᐱᓇᔪᓚᐅᖅᑳᕐᓇᒍ, ᐃᓚᐅᑐᐃᓐᓇᕆᐊᓖᑦ ᐃᖅᑲᓇᐃᔭᖅᑎᒧᑦ ᒪᓕᑲᑕᒃᐸᒡᓗᓂ ᐃᖅᑲᓇᐃᔮᖅᑖᕆᔪᒪᓇᔭᖅᑕᒥᓂ, ᐃᓕᒃᑲᓐᓂᖕᓂᐊᕐᓗᓂᐅᒃ.  

ᑖᒃᑯᐊ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᑦ ᕿᒥᕐᕈᖃᑦᑕᖅᐸᔾᔪᒃ ᐱᓇᔫᑎᓕᒫᑦ, ᐊᑐᖅᖢᑎᒃ ᒪᓕᒋᐊᓕᖕᓂᑦ, ᓇᓕᐊᒃ ᐊᖏᕐᑕᐅᓇᔭᖕᒪᖔᑦ.

ᑮᓇᐅᔭᖃᖅᑎᑦᑎᓂᖅ ᐃᓕᓐᓂᐊᕐᓂᖕᒧᑦ ᓄᖅᑲᖓᓂᖕᒧᑦ ᐊᑐᐊᒐᖓᓂᑦ ᐊᑐᖅᑐᑦ: ᐃᓕᓐᓂᐊᕐᓂᖕᒧᑦ ᐊᑭᖏᑦ ᐊᑭᓕᖅᓱᖅᑕᐅᔪᑦ; ᑮᓇᐅᔭᖅᑖᖅᑎᑕᐅᕙᒃᖢᓂᓗ ᐊᔾᔨᓪᓗᐊᑕᖓᓂ ᑮᓇᐅᔾᔭᒃᓵᒥᑦ. ᐃᖅᑲᓇᐃᔭᖅᑎ ᐊᓯᐊᓄᐊᕆᐊᖃᕈᓂ ᐃᓕᓐᓂᐊᕈᒪᔭᒥᓄ, ᐅᑎᕐᑎᕕᐅᓇᔭᖅᑐᑦ ᒪᓕᒡᓗᑎᒃ ᐊᓯᐊᓄᐊᖅᑎᑦᑎᓂᖕᒧᑦ ᐊᑐᐊᖅᓯᔾᔪᑎᓂᑦ.

ᓂᕈᐊᖅᑕᐅᔪᑦ ᐃᖅᑲᓇᐃᔮᒧᑦ ᓇᐃᓴᐅᑎᑖᖅᑎᑕᐅᓲᑦ ᓯᕗᒧᐊᖃᑎᒌᑦᑐᓕᕆᔨᒃᑯᓐᓂᑦ ᒐᕙᒪᓕᕆᔨᒃᑯᓐᓂᑦ ᓄᖅᑲᖓᓂᖕᒥᓂ. ᒐᕙᒪᓕᕆᔨᒃᑯᑦ ᐊᑭᓕᖅᑕᐅᔪᓐᓇᖅᑐᓕᒫᓂᑦ ᐊᑭᓖᓗᑎᒃ.

ᐃᖅᑲᓇᐃᔭᖅᑎᑦ ᐊᖏᖅᓯᒪᔭᕆᐊᓖᑦ ᐱᓕᕆᓂᐊᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᓕᓐᓂᐊᕌᓂᒃᐸᑕ ᐊᔾᔨᓪᓗᐊᑕᖓᓂ ᐊᒫᖅᑖᕐᓂᖅ ᓄᖅᑲᖓᐅᑎᒋᓚᐅᖅᑕᖓᓄᑦ.

ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔮᒃᓴᖃᖅᑎᑦᑎᓛᒻᑐᑦ ᑕᒪᓐᓇ ᐊᒫᖅᑖᕐᓂᖅ ᓄᖅᑲᖔᓂᒃᐸᔾᔪᒃ. 

ᐱᔪᓐᓇᖅᑐᑦ

  • ᐃᓄᐃᑦ ᐃᖅᑲᓇᐃᔭᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᐃᓱᓕᖕᒥᑦ ᐃᖅᑲᓇᐃᔮᒃᓴᐅᑲᐃᓐᓇᖅᑐᒥᒡᓘᓐᓃᑦ ᐱᓇᔪᒍᓐᓇᑐᐃᓐᓇᕆᐊᓖᑦ, ᐊᔪᙱᓪᓗᑎᒡᓗ ᐊᒫᖅᑖᕐᓂᖅ ᐃᒪᐃᑉᐸᑦ:
    • ᐊᕐᕌᒍᓄᑦ ᐱᖓᓱᓄᑦ ᑭᖑᓕᕇᒃᑐᓄᑦ ᐃᖅᑲᐃᔭᖅᓯᒪᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ;
    • ᐃᓚᐅᔪᓐᓇᕐᓗᓂ ᐃᓕᓐᓂᐊᒃᑲᓐᓂᕐᓗᓂ ᐱᔪᓐᓇᐅᑎᑖᕈᑎᓂᑦ ᐃᓕᓴᕆᔭᐅᓯᒪᔪᒥᒡᓘᓐᓃᑦ ᐱᔭᕇᕈᓯᐊᖅᑖᖕᓂᖕᒧᑦ ᐃᓕᓐᓂᐊᒐᒃᓴᒥᑦ;
    • ᖃᐅᔨᓴᖅᑕᐅᔾᔪᑎᖏᑦ ᐱᓕᕆᐊᒥᓄᑦ ᐱᐅᓗᑎᒃ ᐊᔾᔨᓪᓗᐊᑕᖓᓂᒡᓘᓐᓃᑦ; ᐊᒻᒪᓗ
    • ᐱᔪᓐᓇᐅᑎᑖᕈᒪᓗᓂ ᐃᓕᓴᕆᔭᐅᓯᒪᔪᑎᒍᓪᓘᓐᓃᑦ ᐱᔭᕇᕈᓯᐊᕈᒪᓗᓂ
      • ᐱᑕᖃᖏᓪᓗᓂ ᐃᖅᑲᓇᐃᔭᖅᑎᐅᑉ ᓄᓇᖓᓐᓃᑦᑐᒥᑦ ᐱᓕᕆᕝᕕᐊᑕ ᐃᓄᐃᑦ ᐃᖅᑲᓇᐃᔭᖕᓂᒃᓴᖏᓐᓄᑦ ᐱᕙᒌᔭᐅᑖᓂ ᐃᖅᑲᓇᐃᔭᖕᓂᖕᒧᓪᓘᓐᓃᑦ ᐅᐸᓗᖓᐃᔭᐅᑖᓂ; ᐊᒻᒪᓗ
      • ᐱᔪᒪᔭᐅᒻᒪᕆᒡᓗᓂ ᐊᓯᐊᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ.

     ᐃᓚᒋᔭᐅᔪᑦ ᓄᓇᕗᒻᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᒃᑯᖏᓐᓄᑦ ᓄᓇᕗᒻᒥᓪᓗ ᓯᓚᑦᑐᖅᓴᕐᕕᖕᒧᑦ ᐃᓕᓴᐃᔩᑦ ᐊᔪᖅᑐᑦ ᐊᓯᖏᓐᓂᑦ ᐱᓕᕆᔨᒻᒪᕆᖕᓄᑦ ᐱᕙᓪᓕᐊᔾᔪᑎᖃᖕᓂᖏᓐᓄᑦ ᐃᑲᔪᖅᑐᐃᔪᑦ ᑖᒃᑯᖕᓂᖓ.

  • ᐃᓕᓐᓂᐊᕐᑎᑦᑎᔾᔪᑎᒃᓴᐃᑦ ᐱᔪᓐᓇᐅᑎᑖᕈᑕᐅᔭᕆᐊᓖᑦ ᐃᓕᓐᓂᐊᒃᑲᓂᕈᓯᐊᒧᓪᓘᓐᓃᑦ ᐃᓕᓴᕆᔭᐅᔾᔪᑎᒥ ᐃᖅᑲᓇᐃᔮᒧᑦ, ᐱᓕᕆᐊᒧᓪᓘᓐᓃᑦ ᐊᑐᖅᑕᐅᔭᕆᐊᓖᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐱᔪᓐᓇᖕᓂᐊᕐᓗᑎᑦ, ᐃᓚᖃᕈᓐᓇᖕᒥᔪᑦ ᐅᑯᓂᖓ:
    • ᖃᕆᑕᐅᔭᒃᑯᑦ ᐃᓕᓐᓂᐊᒐᒃᓴᑦ ᓯᓚᑦᑐᖅᓴᕐᕕᒃᑯᑦ ᐃᓕᓴᕆᔭᐅᔾᔪᑎᑖᕐᕕᐅᓲᓂᑦ, ᐱᔪᓐᓇᐅᑎᑖᒐᒃᓴᑦ ᐃᓕᓐᓂᐊᒃᑲᓐᓂᕐᓗᓂᓗ ᐱᔪᓐᓇᐅᑎᑖᒐᒃᓴᓂᑦ;
    • ᐅᐸᒃᐸᒡᓗᓂ ᐃᓕᓐᓂᐊᕐᓂᒃᑯᑦ ᐅᖓᓯᒃᑐᑎᒍᓪᓗ ᐃᓕᓐᓂᐊᕐᓂᖅ; ᐊᒻᒪᓗ
    • ᐃᓗᐃᑦᑐᑎᒍᑦ ᐃᓚᐃᓐᓇᖓᒍᓪᓘᓐᓃᑦ ᐃᓕᓐᓂᐊᒐᒃᓴᓂᑦ.

     ᐊᒫᖅᑖᕐᓂᖅ ᐃᑲᔪᖅᑐᐃᔪᑦ ᐃᓕᓐᓂᐊᑯᑖᖕᓂᖕᒧᑦ ᓄᖅᑲᖓᓂᖕᓂᑦ ᐃᓕᓐᓂᐊᕐᓂᐊᕐᓗᑎᒃ ᐃᓕᓐᓂᐊᕐᕕᖕᓂᑦ ᓄᓇᕗᒻᒥᑦ ᐊᓯᖏᓐᓂᒡᓗ ᑲᓇᑕᒥᑦ.

ᐱᓕᕆᐊᒃᓴᑦ ᑲᒪᒋᔭᒃᓴᓪᓗ

ᓯᕗᒧᐊᖃᑎᒌᒃᑐᒥᐅᑦ, ᒐᕙᒪᓕᕆᔨᒃᑯᑦ

ᓯᕗᒧᐊᖃᑎᒌᒃᑐᒥᐅᑦ:

  • ᐃᑲᔪᖃᑦᑕᖕᓂᐊᖅᑐᑦ ᐃᖅᑲᓇᐃᔮᒃᓴᒧᑦ ᐱᕙᒌᔭᐃᓂᖕᒥᑦ ᐃᖅᑲᓇᐃᔭᖅᑎᓄᑦ ᐅᖃᐅᓯᖃᕐᓗᑎᒡᓗ ᐊᓯᖏᓐᓂᑦ ᐊᑐᕈᓐᓇᖅᑕᓂᒃ;
  • ᓇᓗᓇᐃᔭᐃᑦᑎᐊᕐᐸᒡᓗᑎᒃ ᖃᓄᖅ ᐱᓕᕆᐊᒃᓴᐃᑦ ᐃᖏᕐᕋᕙᖕᒪᖔᖏᑦ, ᑮᓇᐅᔭᓕᕆᓃᓪᓗ ᖃᓄᐃᓕᐅᒐᒃᓴᓪᓗ ᐅᑎᕐᓂᐊᕐᓗᓂ ᐃᖅᑲᓇᐃᔮᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ;
  • ᐃᑲᔪᖅᐸᒡᓗᑎᒃ ᐃᖅᑲᓇᐃᔭᖅᑎᒥᑦ ᒪᓕᑲᑕᒐᒃᓴᕆᓇᔭᖅᑕᖓᓂ ᓈᒻᒪᓛᒧᑦ ᐱᓕᕆᕝᕕᐅᔪᒧᑦ, ᐊᑭᓕᕐᓱᕐᓗᒍᓗ ᐃᖅᑲᓇᐃᔭᖅᑎᐅᑉ ᑮᓇᐅᔾᔭᒃᓵᖓᓂ ᒪᓕᑲᑕᖃᑦᑕᕆᐊᖃᖅᑎᓪᓗᒍ;
  • ᑎᓕᐅᕆᔾᔪᖃᕐᓗᑎᒃ ᐃᓂᒃᓴᒥᑦ ᐃᖅᑲᓇᐃᔭᖅᑎᒧᑦ ᐃᖅᑲᓇᐃᔮᑉ ᓇᐃᓴᐅᑖᓄᑦ ᓯᕗᒧᐊᖃᑎᒌᒃᑯᖏᓐᓄᑦ ᓄᖅᑲᖓᓂᓕᒫᖓᓄᑦ;
  • ᑮᓇᐅᔭᖃᖅᑎᑕᐅᓗᓂ ᐃᓕᓐᓂᐊᕐᓂᖕᒧᑦ ᐊᑭᖏᓐᓂᑦ ᐊᑭᓕᖅᑕᐅᕙᒡᓗᓂᓗ ᑮᓇᐅᔾᔭᒃᓵᖓᓐᓂᑦ.
  • ᓯᕗᒧᐊᖃᑎᒌᑦ ᐃᒫᒃ ᐃᑲᔪᖅᑐᐃᓂᐊᖅᑐᑦ ᐊᒫᖅᑖᕐᓂᒃᑯᑦ ᓄᖅᑲᖓᓗᓂ, ᐅᖃᐅᓯᐅᓚᐅᖅᑐᑎᑐᑦ ᐋᔩᔾᔪᑕᐅᓚᐅᖅᑐᑎᑐᓪᓗ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ:
  • ᐃᓕᓐᓂᐊᒐᒃᓴᒥᑦ ᓂᕈᐊᖕᓂᖅ
  • ᖃᐅᔨᑎᑕᐅᓗᑎᒃ ᐃᓕᓐᓂᐊᕐᕕᐅᑉ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᑎᓄᑦ ᐃᑲᔪᖅᑐᐃᕕᐊᓂᑦ
  • ᐃᓕᑦᑎᕙᓪᓕᐊᔪᓐᓇᖕᓂᖏᑦ ᖃᐅᔨᓴᕈᓐᓇᖕᓂᖏᓐᓂᒡᓗ
  • ᐊᔪᕆᖅᓱᐃᕙᒡᓗᑎᒃ ᐃᓅᓇᓱᐊᖕᓂᖕᒥᑦ ᖃᓪᓗᓈᓂᑦ
  • ᐃᑲᔪᖅᑐᐃᕙᒡᓗᑎᒃ ᓈᒻᒪᓛᓂᑦ ᐃᖅᑲᓇᐃᔭᕐᕕᒋᔪᓐᓇᖅᑕᖏᓐᓂᑦ ᑐᕌᒐᕆᔭᓂᑦ ᐱᓕᕆᕝᕕᖕᓂᑦ ᐊᐅᔭᐅᓕᕌᖓᑦ ᐅᑎᕐᕙᒡᓗᓂᓗ ᓄᓇᕗᑦ ᒐᕙᒪᒃᑯᖏᓐᓄᑦ

ᐊᔪᕆᖅᓱᐃᕙᖕᓂᖅ ᐊᓯᖏᑎᒍᓪᓗ ᐃᑲᔪᖅᑐᐃᖃᑦᑕᕈᓐᓇᖅᑐᑦ ᐃᖅᑲᓇᐃᔭᖅᑎᐅᑉ ᐃᓚᖏᓐᓄᑦ ᓅᑦᑎᐊᖁᓪᓗᒋᑦ ᓄᓇᒥᖕᓂᑦ.

 
ᐱᓕᕆᐊᒃᓴᒧᑦ ᐃᓚᐅᔪᑦ

ᐃᖅᑲᓇᐃᔭᖅᑎᑦ ᐃᓚᐅᔪᑦ ᐊᒫᖅᑖᕐᓂᖅ ᐃᓕᓐᓂᐊᒐᒃᓴᒧᑦ:

  • ᐱᓕᕆᖃᑎᖃᕐᓂᐊᖅᑐᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᒃᑯᓐᓂᑦ ᓇᓗᓇᐃᕐᓯᓗᑎᒃ ᐃᖅᑲᓇᐃᔮᒧᑦ ᑎᑭᓐᓇᓱᐊᖅᑕᓂᑦ, ᐃᓕᓐᓂᐊᒐᒃᓴᓂᑦ ᐱᓇᓱᐊᒐᒃᓴᐃᑦ, ᐃᓕᓐᓂᐊᕈᓰᑦ, ᐱᐊᓂᒃᓯᓗᓂᓗ ᓄᑖᙳᕆᐊᕐᓗᒍᓘᓐᓃᑦ ᐃᖅᑲᓇᐃᔮᒃᓴᒥᑦ ᐃᓱᓕᑦᑎᓂᖕᒧᑦ ᑎᑎᖅᑲᖓᓂᑦ (CAR).
  • ᐃᓚᐅᕙᒡᓗᓂ ᒪᓕᑲᑕᒃᐸᒃᑐᓂᑦ ᐅᖃᐅᓯᖃᖃᑎᖃᕐᓗᓂᓗ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ ᖃᓄᑎᒋ ᐱᔪᒪᖕᒪᖔᖓᓐᓂᒃ ᐃᖅᑲᓇᐃᔮᒥᑦ ᐃᖅᑲᓇᐃᔮᕆᔪᒪᔭᖃᓂᒡᓘᓐᓃᑦ ᐃᓕᓐᓂᐊᕆᐊᒃᑲᓐᓂᕐᓗᓂᓗ.
  • ᐊᑐᓕᒫᕐᓗᓂᒋᑦ ᒪᓕᒃᑕᐅᔭᕆᐊᓖᑦ ᐱᓇᓱᐊᖕᓂᖕᒧᑦ ᐃᓕᓐᓂᐊᒐᒃᓴᒥᑦ ᐃᓕᓐᓂᐊᕐᕕᒡᔪᐊᓄᓪᓗ.
  • ᑐᓴᐅᒪᖃᑎᖃᐃᓐᓇᕐᓗᓂ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ ᐃᓕᓐᓂᐊᕐᓂᓕᒫᖓᓂᑦ. ᑭᓱᒃᑯᑦ ᖃᓄᑎᒋᓗ ᑐᓴᐅᒪᖃᑎᒌᖃᑦᑕᖕᓂᐊᖕᒪᖔᖏᒃ ᐊᖏᕈᑕᐅᖅᑳᖕᓂᐊᖅᐳᖅ ᐃᓕᓐᓂᐊᕐᓂᐊᓕᕈᓂᑦ.  
  • ᑎᑎᖅᑲᓂᑦ ᑐᓂᓯᓯᒪᕙᒌᕐᓗᓂ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓄᑦ ᐱᓇᓱᐊᕈᓰᒃ ᒪᕐᕉᒃ ᐃᓗᐊᓂᑦ ᐱᒍᓂᒋᑦ ᐃᓕᓐᓂᐊᕐᕕᒋᓂᐊᖅᑕᒥᓂᒃ.
  • ᐊᐅᓪᓚᐅᑎᒃᓴᓂᑦ ᑐᓴᐅᒪᑎᑦᑎᓗᓂ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ ᐸᖕᓇᒃᐸᓪᓕᐊᓕᖅᑎᓪᓗᒍ ᐃᖅᑲᓇᐃᔮᒧᐊᕐᕕᒋᓇᔭᖅᑕᖓᓂᑦ.
  • ᑐᓴᐅᒪᑎᑦᑎᐊᕐᐸᒡᓗᒋᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᑦ ᐊᓯᔾᔨᖅᑐᓂᑦ ᐊᒃᑐᐃᓂᖃᑐᐃᓐᓇᕆᐊᓕᖕᓂᑦ ᓄᖅᑲᖓᔾᔪᑎᒋᔭᖓᓂᑦ.

ᐱᓕᕆᕝᕕᐅᔪᑦ

ᐱᓕᕆᕝᕕᐅᔪᓕᒫᑦ ᐃᑲᔪᖅᑐᐃᓂᐊᖅᐳᑦ ᐃᓕᓐᓂᐊᖓᓴᓂᑦ ᐃᒫᒃ:

  • ᓇᓗᓇᐃᔭᐃᓗᑎᒃ ᑭᓱᓕᕆᔨᒻᒪᕆᐅᓂᖕᒧᑦ ᐃᓐᓄᒐᒃᓴᐅᕙᙱᑦᑐᓂᒡᓗ ᑐᓴᐅᒪᑎᓪᓗᒋᓪᓗo ᒐᕙᒪᓕᕆᔨᒃᑯᑦ
  • ᐱᓕᕆᐊᓄᑦ ᕿᒥᕐᕈᓇᒃᐸᒡᓗᑎᒃ ᐅᖃᐅᓯᖃᖃᑎᖃᖅᐸᒡᓗᑎᒡᓗ ᐃᖅᑲᓇᐃᔮᒃᓴᓂᑦ ᐃᓄᖕᓂᑦ ᐃᖅᑲᓇᐃᔭᖅᑎᓄᑦ;
  • ᐃᑲᔪᖅᑐᐃᓗᑎᒃ ᐊᔭᐅᖅᑐᐃᓗᑎᒡᓗ ᐃᖅᑲᓇᐃᔭᖅᑎᓂᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ ᐅᖃᐅᓯᖃᕐᓂᐊᕐᓗᑎᒃ ᐱᔭᒃᓴᓂᑦ ᐊᔪᙱᔾᔪᑎᒃᓴᓂᒡᓗ.
  • ᐊᔪᕐᓇᙱᒃᑳᖓᑦ, ᐊᖏᖅᐸᒡᓗᑎᒃ ᐃᖅᑲᓇᐃᔭᖅᑎᒥᑦ ᐃᓚᐅᔪᓐᓇᖁᓗᒋᑦ ᐃᓕᓐᓂᐊᒐᒃᓴᒥᑦ.

ᑐᕌᒐᕆᔭᑦ ᐱᓕᕆᕝᕕᐅᔪᑦ

ᑐᕌᒐᕆᔭᑦ ᐱᓕᕆᕝᕕᐅᔪᑦ ᐱᕙᓪᓕᐊᑎᑦᑎᔪᓐᓇᖅᐳᑦ ᐃᓚᐅᔫᑉ ᐃᒫᒃ: 

  • ᐋᖅᑭᒃᓱᐃᓗᑎᒃ ᒪᓕᒃᑕᐅᔪᒃᓴᒥᑦ ᐃᓄᖕᒧᑦ ᐃᖅᑲᓇᐃᔭᖅᑎᒧᑦ ᐱᔪᒪᔪᒧᑦ ᐃᖅᑲᓇᐃᔭᖅᑎᓪᓚᕆᐅᓂᖕᒥᑦ ᐃᓐᓄᒃᑕᐅᔪᓐᓇᒐᔪᙱᑦᑐᒥᓪᓘᓐᓃᑦ.
  • ᐃᖅᑲᓇᐃᔭᖅᑎᑦᑎᓚᐅᖅᐸᒡᓗᑎᒃ ᐊᐅᔭᒃᑯᑦ, ᐱᓕᕆᐊᒃᓴᑦ ᖃᓄᐃᓕᖓᓂᖏᑦ, ᒪᓕᒡᓗᑎᒡᓘᓐᓃᑦ ᐱᓕᕆᔨᒻᒪᕆᐅᓂᒃᓴᒧᑦ ᐊᑐᖅᑕᐅᔭᕆᐊᓕᖕᓂᑦ.
  • ᐃᖅᑲᓇᐃᔮᒃᓴᖃᖅᑎᑦᑎᓗᑎᒃ ᑖᓐᓇ ᐃᖅᑲᓇᐃᔭᖅᑎ ᐃᓂᒃᓴᖃᖁᓪᓗᒍ ᑐᕌᕐᕕᐅᔪᓂᑦ ᐱᓕᕆᕝᕕᖕᓂᑦ ᐃᓱᓕᑦᑎᓚᐅᖅᑳᕋᓂᑦ.

ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᑦ

ᒥᓂᔅᑕᐅᑉ ᑐᒡᓕᐊ ᒐᕙᒪᓕᕆᔨᒃᑯᓐᓄᑦ ᓴᖅᑭᑦᑎᓂᐊᖅᐳᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᓂᑦ ᑲᒪᒋᔭᓖᑦ ᕿᒥᕐᕈᓂᖕᓂᑦ ᐱᓇᔪᒃᑐᓕᒫᓂᑦ ᐊᒫᖅᑖᕐᓂᖅ ᐃᓕᓐᓂᐊᒐᒃᓴᒧᑦ. ᑖᒃᑯᐊ ᑲᑎᒪᔨᕋᓛᑦ ᐋᖅᑭᑕᐅᖃᑦᑕᖕᓂᐊᖅᐳᑦ ᒥᓂᔅᑕᐅᑉ ᑐᒡᓕᐊᓄᑦ ᒐᕙᒪᓕᕆᔨᒃᑯᓐᓄᑦ, ᐃᓚᖃᑐᐃᓐᓇᕆᐊᖃᖅᖢᑎᒡᓗ ᑭᒡᒐᖅᑐᐃᔨᓂᑦ ᑐᕌᕐᕕᐅᔪᓂᑦ ᐱᓕᕆᕝᕕᖕᓂᑦ. ᐅᑯᐊ ᐃᓱᒪᒋᔭᐅᔭᕆᐊᓖᑦ ᕿᒥᕐᕈᑎᓪᓗᒋᑦ ᐱᓇᔪᒃᑐᓕᒫᓂᑦ:

  • ᓄᓇᕗᑦ ᒐᕙᒪᒃᑯᖏᑦᑕ ᐃᓄᐃᑦ ᐃᖅᑲᓇᐃᔭᖕᓂᒃᓴᖏᓐᓄᑦ ᐱᕙᒌᔭᐅᑎᓂᒃ ᐱᓕᕆᐊᒃᓴᓄᓪᓗ ᐱᕙᒌᔭᐅᑎᖏᑦᑕ ᐱᓇᓱᐊᖅᑕᖏᓐᓂᑦ;
  • ᐃᖅᑲᓇᐃᔮᑦ ᓇᓗᓇᐃᕐᓯᒪᓪᓗᑎᒃ ᐱᓕᕆᔨᒻᒪᕆᒃᓴᐅᓂᖕᒧᑦ ᐃᓐᓄᒐᒃᓴᐅᓗᐊᖏᓪᓗᓂᓘᓐᓃᑦ;
  • ᐊᒃᑐᐊᓂᖏᑦ ᐃᓕᓐᓂᐊᒐᒃᓴᐃ ᐅᓪᓗᒥᒧᑦ ᓂᕆᐅᒋᔭᒧᓪᓘᓐᓃᑦ ᐱᓕᕆᐊᒃᓴᓂᑦ;
  • ᐊᑯᓂᐅᓂᖓ ᐱᔨᑦᑎᕋᕐᓯᒪᓂᖓ, ᐊᑯᓂᐅᑎᒋᔪᖅ ᐃᖅᑲᓇᐃᔮᖓᓃᓕᖕᓂᖓ, ᖃᓄᐃᓕᐅᕐᓯᒪᓕᖕᒪᖔᖏᓪᓗ ᐱᓕᒻᒪᒃᓴᕋᓱᐊᖅᖢᑎᒃ ᐃᓕᑦᑎᕙᓪᓕᐊᑎᓪᓗᒋᓪᓗ;
  • ᐃᖅᑲᓇᐃᔮᖓ ᖃᓄᐃᑦᑑᖕᒪᖔᑦ ᐱᓇᔪᒃᑑᑉ (ᓯᕗᓪᓕᐅᔾᔭᐅᓂᐊᖅᑐᑦ ᐊᔪᙱᑦᑐᓄᑦ ᐃᖅᑲᓇᐃᔮᖃᑲᐃᓐᓇᖅᑐᓄᑦ);
  • ᐱᓇᔪᒃᑑᑉ ᖃᐅᔨᒪᓂᖏᑦ, ᐱᓕᒻᒪᒃᓯᒪᓂᖏᑦ ᐊᔪᙱᑕᖏᓪᓗ;
  • ᐱᓇᔪᒃᑐᖅ ᐃᓕᓐᓂᐊᕐᓂᖕᒧᑦ ᐱᕙᓪᓕᐊᓂᖕᒧᓪᓗ ᐱᕙᒌᔭᐅᑎᖃᖕᒪᖔᑦ, ᐊᕐᕌᒍᑕᒫᑦ ᐱᓕᕆᐊᖓᓄᑦ ᖃᐅᔨᓴᖅᑕᐅᔾᔪᑖᓂᑦ ᐊᒻᒪᓗ/ᐅᕝᕙᓘᓐᓃᑦ ᐃᖅᑲᓇᐃᔮᒃᓴᒥᑦ ᐃᓱᓕᑦᑎᓂᖕᒧᑦ ᑎᑎᖅᑲᖓᓄᑦ ᐃᓚᐅᔾᔪᑖᓂ ᐃᑲᔪᖅᑐᐃᔾᔪᑎᑦ ᐃᓕᓐᓂᐊᕐᕕᒡᔪᐊᒥᑦ;
  • ᐃᑲᔪᖅᑐᖅᑕᐅᓂᖓ ᐱᓕᕆᕝᕕᐊᓂᑦ ᑐᕌᒐᕆᔭᒥᓪᓗ ᐱᓕᕆᕝᕕᖕᒥᑦ; ᐊᒻᒪᓗ
  • ᓯᕗᓪᓕᐅᔾᔭᐅᓂᐊᖅᑐᑦ ᐱᔪᓐᓇᐅᑎᑖᕋᓲᑎᓖᑦ ᐃᓕᓐᓂᐊᒐᒃᓴᐃᑦ.

ᒥᓂᔅᑕᐅᑉ ᑐᒡᓕᐊ ᒐᕙᒪᓕᕆᔨᒃᑯᓐᓄᑦ ᐅᖃᐅᔾᔪᐃᓇᓱᐊᖕᓂᐊᖅᐳᖅ ᐃᖅᑲᓇᐃᔭᖅᑎᒥᑦ ᑎᑎᖅᑲᑎᒍᑦ ᐱᓇᔫᑎᖏᑦ ᐊᖏᖅᑕᐅᖕᒪᖔᖏᓐᓂᑦ ᕿᐱᓗᒃᑕᐅᖕᒪᖔᖏᓪᓘᓐᓃᑦ ᐅᓪᓗᑦ 30 ᐃᓗᐊᓂᑦ ᐃᓱᓕᓚᐅᖅᑎᓪᓗᒍ ᐅᒃᑯᐊᕐᕕᒃᓴᖓ.

ᒐᕙᒪᓕᕆᔨᒃᑯᑦ ᐅᓂᒃᑳᓕᐅᖃᑦᑕᖕᓂᐊᖅᐳᑦ ᐊᕐᕌᒍᑕᒫᑦ ᐃᓄᐃᑦ ᐃᖅᑲᓇᐃᔭᖕᓂᖏᓐᓄᑦ ᑲᑎᒪᔨᕋᓛᖏᓐᓄᑦ ᐱᕈᖅᐸᓪᓕᐊᓂᖕᒧᓪᓗ ᑲᑎᒪᔨᕋᓛᓄᑦ (BCC) ᐱᓕᕆᐊᑉ ᖃᓄᐃᓕᖕᒪᖔᖏᓐᓂᒡᓗ ᒥᒃᓵᓄᑦ.

ᐱᓕᕆᐊᖑᓂᖏᑦ

ᓯᕗᓪᓕᖅᐹᒥᑦ: ᕿᒥᕐᕈᓂᖅ

ᐃᓄᐃᑦ ᐃᖅᑲᓇᐃᔭᖅᑎᑦ ᐃᓱᒪᒋᔭᐅᔪᒪᔪᑦ ᐊᒫᖅᑖᕐᓂᖅ ᐃᓕᓐᓂᐊᒐᒃᓴᒧᑦ ᒪᓕᒋᐊᓕᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ, ᓯᕗᒧᐊᖃᑎᒌᑦ, ᒐᕙᒪᓕᕆᔨᒃᑯᑦ ᐱᐊᓂᒃᓯᓯᒪᓗᓂ ᓄᑖᙳᕆᐊᖅᓯᒪᓗᓂᐅᒡᓘᓐᓃᑦ ᐃᖅᑲᓇᐃᔮᒃᓴᒥᑦ ᐃᓱᓕᑦᑎᓂᖕᒧᑦ ᑎᑎᖅᑲᖅᒥᑦ. ᑖᓐᓇ ᐃᖅᑲᓇᐃᔭᖅᑎᓗ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᒃ ᕿᒥᕐᓗᑎᒃ ᐃᖅᑲᓇᐃᔭᖅᑎᐅᑉ ᐃᖅᑲᓇᐃᔮᒧᑦ ᑎᑭᓐᓇᓱᐊᖅᑕᖓᓂᑦ, ᐃᓕᓐᓂᐊᒐᒃᓴᖏᑦ ᐱᓕᕆᓯᒪᓂᑯᖏᓐᓂᒡᓗ; ᕿᒥᕐᕈᓗᒋᑦ ᑭᓱᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓐᓄᒐᒃᓴᐅᓗᐊᙱᑦᑐᑦ ᐃᖅᑲᓇᐃᔮᓂ; ᐃᓱᒪᒃᓴᕐᓯᐅᕈᑎᒋᓗᓂᒋᓪᓗ ᑖᒃᑯᐊ ᐊᒫᖅᑖᕐᓂᖅ ᐊᓯᖏᓪᓘᓐᓃᑦ ᐃᖅᑲᓇᐃᔮᒧᑦ ᐱᕙᓪᓕᐊᔾᔪᑎᒃᓴᐃᑦ ᓇᓕᐊᒃ ᓈᒻᒪᓛᖑᖕᒪᖔᖏᓐᓂᑦ.  

ᐃᓄᐃᑦ ᐃᖅᑲᓇᐃᔭᖅᑎᑦ ᐱᓇᔪᒍᒪᔪᑦ ᐊᒫᖅᑖᕐᓂᖅ ᐃᓕᓐᓂᐊᒐᒃᓴᒧᑦ ᑲᑎᒪᖃᑎᖃᕆᐊᓖᑦ ᐊᖓᔪᖅᑳᒥᖕᓂ ᐅᖃᐅᓯᖃᕐᓂᐊᕐᓗᑎᒃ ᖃᓄᖅ ᐊᑯᓂᐅᑎᒋᓂᖓᓂᑦ, ᐊᔪᕐᓇᙱᒻᒪᖔᑦ, ᐊᓯᖏᓐᓂᒡᓗ ᐃᓱᒪᒋᔭᒃᓴᓂᑦ.

 

ᐃᖅᑲᓇᐃᔭᖅᑎ ᐱᔪᓐᓇᖅᐸᑦ ᐃᓕᓐᓂᐊᒐᒃᓴᒧᑦ, ᐃᑲᔪᖅᑕᐅᓗᓂ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓂᑦ ᕿᓂᕈᓐᓇᖅᑐᑦ ᒪᓕᑲᑕᒐᒃᓴᖓᓂᑦ ᖃᐅᔨᓴᖅᐸᒡᓗᓂ ᐱᓕᕆᐊᖑᔪᓂᑦ, ᑲᒪᒋᔭᒃᓴᓂᑦ ᐱᓕᕆᐊᓪᓗ ᖃᓄᐃᑦᑑᓂᖏᓐᓂᑦ ᐃᖅᑲᓇᐃᔮᑦ ᐃᖅᑲᓇᐃᔮᕆᔪᒪᔭᖓᓂᒡᓘᓐᓃᑦ.

ᐃᖅᑲᓇᐃᔭᖅᑎᒥᑦ ᒪᓕᑲᑕᖃᑦᑕᖕᓂᖅ ᐋᖅᑭᒃᓯᒪᔪᖅ ᑖᓐᓇ ᐃᖅᑲᓇᐃᔭᖅᑎ ᖃᐅᔨᓴᕈᓐᓇᖁᓪᓗᒍ ᒪᑯᓂᖓ:

  • ᐱᓕᕆᐊᒃᓴᓕᒫᕆᔭᓂᑦ
  • ᑲᒪᒋᔭᒃᓴᑦ ᐱᔪᓐᓇᕐᓂᕆᔭᓪᓗ ᐃᖅᑲᓇᐃᔮᑉ
  • ᐱᓕᕆᕝᕕᐅᑉ ᖃᓄᐃᑦᑑᓂᖏᑦ ᓲᕐᓗ:
    • ᐃᓛᒃᑰᖅᑐᖅ ᐃᓚᒋᔭᕐᓘᓐᓃᑦ ᐱᓕᕆᖃᑎᒌᓂᑦ
    • ᐃᑲᕐᕋᑐᐃᓐᓇᐅᓲᓂᑦ, ᓂᑭᒃᑖᓂᖕᓂᓪᓗ, ᐊᔾᔨᒌᙱᑦᑐᓂᒡᓘᓐᓃᑦ ᐃᑲᕐᕋᓂᑦ
    • ᑎᑎᕋᕐᕕᐅᑉ ᐃᓗᐊᓂᑦ, ᓯᓚᒥᑦ ᐊᔾᔨᒌᙱᑦᑑᑎᓂᒡᓘᓐᓃᑦ ᐃᓂᒋᔭᓂᑦ
    • ᐃᓄᖕᓂᑦ ᐊᐅᓚᐅᑎᓕᖕᓂᓪᓘᓐᓃᑦ, ᖃᕆᑕᐅᔭᓕᕆᓂᖅ ᑭᓱᕈᓘᔭᐃᑦ
  • ᐊᔾᔨᒌᙱᑦᑑᑕᐅᓂᖏᑦ ᐱᓕᕆᐊᒃᓴᐃᑦ ᖃᐅᑕᒫᑦ

ᐃᖅᑲᓇᐃᔭᖅᑎᓄᑦ ᑐᑭᒧᐊᒃᑎᑦᑎᔨᑦ ᐱᓕᕆᕝᕕᐅᔪᓕᒫᓂᑦ ᐃᑲᔪᖃᑦᑕᖕᓂᐊᖅᑐᑦ ᐊᖏᖅᑕᐅᑎᑦᑎᓂᖕᓂᑦ ᒥᓂᔅᑕᐅᑉ ᑐᒡᓕᖏᓐᓂᑦ ᓄᓇᒋᔭᒥᑦ ᑐᕌᒐᕆᔭᑦ ᐱᓕᕆᕝᕕᖕᓂᓪᓗ ᐃᖅᑲᓇᐃᔭᖅᑎᒥᑦ ᒪᓕᑲᑕᖃᑦᑕᖕᓂᖕᒧᑦ, ᓇᐃᓛᖓᓐᓂᑦ ᐱᓇᓱᐊᕈᓯᖕᒥ ᑕᑭᓛᒧᑦ ᐱᓇᓱᐊᕈᓯᖕᓄᑦ ᑎᓴᒪᓄᑦ. ᒐᕙᒪᓕᕆᔨᒃᑯᑦ ᐊᑭᓕᕐᓱᐃᓂᐊᖅᐳᑦ ᑮᓇᐅᔾᔭᒃᓵᖓᓂᑦ ᐃᖅᑲᓇᐃᔭᖅᑎᐅᑉ ᓄᓇᖓᓐᓂᑦ ᐃᖅᑲᓇᐃᔮᖓᓄᑦ ᒪᓕᑲᑕᖃᑦᑕᖅᑎᓪᓗᒍ.

  • ᐃᓱᓕᑉᐸᑦ ᐃᖅᑲᓇᐃᔭᖅᑎᒥᑦ ᒪᓕᑲᑕᖃᑦᑕᖕᓂᖓ, ᐃᖅᑲᓇᐃᔭᖅᑎ ᐅᖃᐅᓯᕆᓂᐊᖅᐸᐅᒃ ᖃᓄᐃᓚᐅᖕᒪᖔᖓᓐᓂᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓐᓄᑦ ᑭᒡᒐᖅᑐᐃᔨᐅᔪᒧᓪᓗ ᑐᕌᒐᕆᔭᑉ ᐱᓕᕆᕝᕕᐊᓄᑦ. ᑕᒪᓐᓇ ᐊᑐᕐᑕᖅ ᐃᖅᑲᓇᐃᔭᖅᑎ ᑐᑭᓯᑦᑎᐊᕋᓗᐊᖕᒪᖔᖓᓐᓂᑦ ᐃᖅᑲᓇᐃᔮᒥᑦ, ᐅᖃᐅᓯᕆᒃᑲᓐᓂᕈᓐᓇᓛᕐᓗᒋᓪᓗ ᐃᖅᑲᓇᐃᔭᖅᑎᐅᑉ ᑐᕌᖅᑕᐅᔫᓪᓗ ᐱᓕᕆᕝᕕᐅᑉ ᐊᔪᙱᓐᓂᕆᔭᑦ ᒥᒃᓵᓄᑦ. 
  • ᐃᖅᑲᓇᐃᔭᖅᑎᓗ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᓪᓗ ᐅᖃᐅᓯᖃᖕᓂᐊᖅᐳᒃ ᐊᑐᒐᒃᓴᓂᑦ ᐱᓇᓱᐊᕐᓂᐊᕐᓗᓂ ᐃᓕᓐᓂᐊᒃᑲᓐᓂᕈᓐᓇᕈᑎᒃᓴᓄᑦ ᐊᔪᙱᓐᓂᕆᔭᓂᑦ. ᐃᓚᐅᓗᓂ ᐃᓱᒪᒃᓴᖅᓯᐅᕐᓂᖅ ᖃᓄᖅᑑᕋᓱᐊᖅᑎᓪᓗᒍ (ᐃᓚᖏᑦ ᖃᓄᐃᓕᖓᓂᖏᑦ, ᑮᓇᐅᔭᑎᒍᑦ ᐊᒃᑐᐃᓂᐅᔪᑦ, ᓅᑦᑕᕆᐊᖃᖕᓂᖅ) ᐱᐊᓂᒡᓗᒋᓪᓗ ᐱᓕᕆᔭᕆᐊᓖᑦ ᐃᓕᓐᓂᐊᕆᐊᖕᓂᐊᕐᓗᓂ ᓯᓚᑦᑐᖅᓴᕐᕕᖕᒧᑦ ᓯᓚᑦᑐᖅᓴᕐᕕᒡᔪᐊᒧᓪᓘᓐᓃᑦ.

 
ᐊᐃᑉᐸᖓᓂᑦ: ᐱᓇᔫᑎᑦ ᖃᓄᐃᓕᓂᖏᓪᓗ

  • ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᑦ ᐃᑲᔪᑐᐃᓐᓇᕆᐊᓖᑦ ᐃᖅᑲᓇᐃᔭᖅᑎᓂᑦ ᑎᑎᕌᓂᒐᓱᒃᑎᓪᓗᒋᑦ ᐱᓇᔫᑎᒃᓴᒥᑦ ᐊᒫᖅᑖᕐᓂᖅ ᐃᓕᓐᓂᐊᒐᒃᓴᖓᓄᑦ, ᐊᑎᓕᐅᖅᑕᐅᓯᒪᔭᕆᐊᖃᖅᖢᓂ ᒥᓂᔅᑕᐅᑉ ᑐᒡᓕᐊᓄᑦ ᐃᖅᑲᓇᐃᔭᖅᑎᐅᑉ ᐱᓕᕆᕝᕕᐊᓂᑦ. ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᑦ ᓇᒃᓯᐅᔾᔨᓂᐊᖅᐳᑦ ᐱᐊᓂᒃᓯᒪᔪᒥᑦ ᐱᓇᔫᑎᒥᑦ ᒥᓂᔅᑕᐅᑉ ᑐᒡᓕᐊᓄᑦ ᒐᕙᒪᓕᕆᔨᒃᑯᓐᓄᑦ ᕿᒥᕐᕈᔭᐅᖁᓪᓗᒍ ᖃᓄᐃᓕᔭᐅᓗᓂᓗ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᖏᓐᓄᑦ. ᑎᑎᕋᕐᕕᒃᓴᖅ ᐱᓇᓱᐊᖕᓂᖕᒧᑦ ᐊᑐᐃᓐᓇᐅᔪᖅ ᐅᐃᒍᐊᕈᓯᖅ “A”−ᒥᑦ.
  • ᐱᓇᓱᐊᖅᑕᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᓄᑦ ᕿᒥᕐᕈᕙᒡᓗᑎᒃ ᖃᓄᐃᓕᕙᒡᓗᑎᒡᓗ ᐊᒫᖅᑖᕐᓂᖅ ᐃᓕᓐᓂᐊᕈᒪᔪᓄᑦ. ᒥᓂᔅᑕᐅᑉ ᑐᒡᓕᐊ ᒐᕙᒪᓕᕆᔨᒃᑯᓐᓄᑦ ᓴᖅᑎᑦᑎᓂᐊᖅᐳᑦ ᐊᒫᖅᑖᕐᓂᖅ ᐃᓕᓐᓂᐊᕐᓂᖕᒧᑦ ᑲᑎᒪᔨᕋᓛᓂᑦ, ᑲᒪᒋᔭᓖᑦ ᕿᒥᕐᕈᓂᖕᓂᑦ ᐱᓇᔫᑎᓕᒫᓂᑦ ᐊᒫᖅᑖᕐᓂᖅ ᑮᓇᐅᔭᑎᒍᑦ ᐃᑲᔪᖅᑕᐅᔾᔪᑎᒃᓴᓂᑦ.  ᑲᑎᒪᔨᕋᓛᑦ ᐅᑯᐊᖑᓇᔭᖅᑐᑦ:
    • ᒥᓂᔅᑕᐅᑉ ᑐᒡᓕᐊ ᒐᕙᒪᓕᕆᔨᒃᑯᓐᓄᑦ ᑎᓕᔭᐅᓯᒪᔪᕐᓘᓐᓃᑦ (ᑲᑎᒪᔨᕋᓛᑦ ᐃᒃᓯᕙᐅᑖ);
    • < >, ᓯᕗᒧᐊᖃᑎᒌᑦ;
    • ᒥᓂᔅᑕᐅᑉ ᑐᒡᓕᐊ ᐃᓄᓕᕆᔨᒃᑯᓐᓄᑦ (ᐊᓯᐊᓂᒡᓘᓐᓃᑦ ᐱᓕᕆᕝᕕᐅᔪᓂᑦ ᐃᖅᑲᓇᐃᔮᒃᓴᓄᑦ ᑲᒪᒋᔭᓕᒃ ᐅᕝᕙᓘᓐᓃᑦ ᑎᑎᕋᖅᓯᒪᔪᒥᑦ 23 ᑲᒪᒋᔭᒃᓴᑦ ᐃᒃᓯᕙᐅᑕᐅᓪᓘᓐᓃᑦ ᑐᒡᓕᐊ ᑲᑎᒪᔨᕋᓛᖏᓐᓄᑦ ᐱᕈᖅᐸᓪᓕᐊᓂᖕᒧᓪᓗ ᑲᑎᒪᔨᕋᓛᓄᑦ BCC)
    • ᑎᓕᔭᐅᓯᒪᔪᑦ ᓄᓇᕗᒻᒥᑦ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓄᑦ ᐃᖅᑲᓇᐃᔭᖅᑎᐊᓂᑦ (ᑭᑭᑕᐅᓯᒪᔪᒥᒡᓘᓐᓃᑦ ᐃᖅᑲᓇᐃᔭᖅᑎᒥᑦ ᑮᓇᐅᔭᓕᕆᔨᒃᑯᓐᓂᑦ, ᒐᕙᒪᓕᕆᔨᒃᑯᑦ ᒪᓕᒐᓕᐅᕐᕕᖕᒥᓪᓗ)

ᑲᑎᒪᔨᕋᓛᑦ ᐃᒃᓯᕙᐅᑕᖓᑎᒍ, ᐃᓚᒋᐊᖅᓯᒪᔪᓐᓇᖅᑐᖅ ᐱᓕᕆᕝᕕᖕᓂᑦ ᑭᒡᒐᖅᑐᐃᔨᓂᑦ ᑎᓕᔭᐅᓯᒪᔪᒥ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑲᑎᒪᔨᕋᓛᓂ (ᓲᕐᓗ ᑮᓇᐅᔭᓕᕆᔨᑦ/ᐊᖓᔪᖅᑲᐅᑎᓕᕆᕝᕕᒃ, ᐊᕕᒃᑐᕐᓯᒪᕝᕕᐊᓂᑦ ᐱᓕᕆᔨᒻᒪᕆᖕᒥᓪᓘᓐᓃᑦ ᖃᓄᕈᓘᔭᖅ)

  • ᐊᒫᖅᑖᕐᓂᖅ ᐃᓕᓐᓂᐊᕐᓂᖕᒧᑦ ᓄᖅᑲᖓᓂᖓ ᐊᖏᖅᑕᐅᔪᓐᓇᖅᑐᖅ ᐊᑕᐅᓯᖕᒧᑦ ᐊᒥᓱᓄᓪᓘᓐᓃᑦ ᐱᔾᔪᑎᖃᕐᓗᓂ:
    • ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ, ᑖᖅᑯᑎᒎᓈᕐᓗᑎᒃ ᑲᑎᒪᔨᕋᓛᖏᓐᓄᑦ ᐱᕈᖅᐸᓪᓕᐊᓂᖕᒧᓪᓗ ᑲᑎᒪᔨᕋᓛᓄᑦ, ᓂᕆᐅᒃᓯᒪᔪᑦ ᐱᔭᐅᔭᕆᐊᓕᖕᓂᑦ ᖁᑦᑎᖕᓂᓕᖕᒥᑦ ᐃᓕᓐᓂᐊᕐᓂᓕᖕᒥᑦ ᐊᔪᙱᓐᓂᓕᖕᒥᓪᓘᓐᓃᑦ ᑖᒃᑯᓄᖓ ᐃᓐᓄᒐᒃᓴᐅᙱᑦᑐᓄᑦ ᐃᖅᑲᓇᐃᔮᓄᑦ, ᑖᓐᓇᓗ ᐃᓄᒃ ᐱᔪᒪᓯᒪᓗᓂ ᐱᔪᓐᓇᐅᑎᖃᕐᓗᓂᓗ ᐃᓚᐅᔭᕆᐊᒃᓴᖅ ᐃᓕᓐᓂᐊᒐᒃᓴᒧᑦ;
    • ᐱᕚᓪᓕᒻᒪᕆᒐᔭᖅᑐᖅ ᐃᓄᐃᑦ ᐃᖅᑲᓇᐃᔭᖕᓂᖏᓐᓄᑦ ᐱᐊᓂᒃᓯᓂᒃᑯᑦ ᐃᓕᓐᓂᐊᕐᓂᖕᒥᑦ.
  • ᕿᒥᕐᕈᑎᓪᓗᒋᑦ ᐱᓇᔪᒃᑐᓂᑦ ᐃᓕᓐᓂᐊᒐᒃᓴᒧᑦ ᐊᒫᖅᑖᕐᓂᖅ, ᑖᒃᑯᐊ ᑲᑎᒪᔨᕋᓛᑦ ᐃᓱᒪᒋᔭᖃᖕᓂᐊᖅᐳᑦ ᐃᓱᒪᒋᔭᕆᐊᓕᖕᓂᑦ ᑎᑎᕋᖅᑕᐅᓯᒪᔪᑦ ᐱᓕᕆᐊᒃᓴᑦ ᑲᒪᒋᔭᒃᓴᓪᓗ ᒪᒃᐱᖅᑐᒐᖕᒥᑦ 4−ᒥᑦ ᒪᓕᒋᐊᓕᖕᓂᑦ.
  • ᑖᓐᓇ ᒥᓂᔅᑕᐅᑉ ᑐᒡᓕᐊ of ᒐᕙᒪᓕᕆᔨᒃᑯᑦ ᐅᖃᐅᔾᔪᐃᓇᓱᐊᖕᓂᐊᖅᐳᑦ ᐱᓇᔪᒃᑐᒥᑦ ᑎᑎᖅᑲᑎᒍᑦ ᐊᖏᖅᑕᐅᖕᒪᖔᖓᓐᓂᑦ ᕿᐱᓗᒃᑕᐅᖕᒪᖔᖓᓐᓂᓪᓘᓐᓃᑦ ᐅᓪᓗᑦ 30 ᐃᓗᐊᓂᑦ ᒪᑐᓚᐅᖅᑎᓪᓗᒍ ᐱᓇᔪᒡᕕᐊ.

 

ᐱᖓᔪᖓᓐᓂᑦ:  ᐃᓕᓐᓂᐊᕆᐊᓕᓵᖕᓂᖅ

  • ᐃᖅᑲᓇᐃᔭᖅᑎ ᐊᖏᖅᑕᐅᒃᐸᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ:
    • ᐊᐅᓪᓚᓚᐅᖅᑳᕋᓂ, ᑕᑯᑎᑦᑎᔭᕆᐊᓕᒃ ᐊᖏᖅᑕᐅᔾᔪᑖᓂ ᐃᓕᓐᓂᐊᕐᕕᒡᔪᐊᒥᑦ.
    • ᐊᑎᓕᐅᕆᐊᓖᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ ᐊᖏᕈᑖᓂ ᑎᑎᕋᕐᓯᒪᔪᑦ ᖃᓄᐃᓕᐅᕆᐊᓖᑦ ᐊᑐᕆᐊᓖᓪᓗ ᓄᖅᑲᖓᓗᓂ ᐊᒫᖅᑖᕐᓂᖅ ᐃᓕᓐᓂᐊᕐᓂᖕᒧᑦ.
    • ᐃᖅᑲᓇᐃᔮᒧᐊᖅᑕᐅᓂᐊᖅᐳᖅ ᒐᕙᒪᓕᕆᔨᒃᑯᓐᓂᑦ ᓄᖅᑲᖓᓂᓕᒫᖓᓂᑦ.
  • ᓯᕗᒧᐊᖃᑎᒌᑦ ᐃᖅᑲᓇᐃᔭᖅᑎᖏᑦ ᐃᑲᔪᖅᑐᐃᓂᐊᖅᐳᑦ ᐃᖅᑲᓇᐃᔭᖅᑎᓂᑦ ᓅᑉᐸᓪᓕᐊᑎᓪᓗᒍ, ᖃᐅᔨᑎᓪᓗᓂᒋᓪᓗ ᐃᑲᔪᖅᑐᐃᔪᓐᓇᖅᑐᓂᑦ ᐃᓕᓐᓂᐊᕐᕕᒡᔪᐊᓂᑦ.
  • ᑐᕌᒐᕆᔭᑦ ᐱᓕᕆᕝᕕᐅᔪᑦ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔮᒃᓴᖃᑦᑎᐊᖅᑎᑦᑎᖁᔭᐅᕙᒃᐳᑦ ᐊᐅᔭᒃᑯᑦ ᐃᖅᑲᓇᐃᔭᖅᑎᑦᑎᑎᓪᓗᒋᑦ.
  • ᑖᒃᑯᐊ ᑐᕌᒐᐅᔪᖅ ᐱᓕᕆᕝᕕᒃ ᑎᓕᓯᔪᓐᓇᖅᑐᖅ ᐃᖅᑲᓇᐃᔭᖅᑎᒥᑦ ᐃᖅᑲᓇᐃᔮᒧᑦ ᐱᓕᕆᕝᕕᖕᒥᑦ ᖃᖓᑐᐃᓐᓇᖅ ᓄᖅᑲᖓᑎᓪᓗᒍ. ᒐᕙᒪᓕᕆᔨᒃᑯᑦ ᐊᑭᓕᕐᓱᐃᖏᓐᓇᖕᓂᐊᖅᐳᑦ ᐃᖅᑲᓇᐃᔭᖅᑎᐅᑉ ᐃᓚᐅᔾᔪᑎᖏᓐᓂᑦ ᐊᒫᖅᑖᕐᓂᖅ.

 
ᑎᓴᒪᖓᓐᓂᑦ:  ᓄᖅᑲᖓᑎᓪᓗᒍ

  • ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ ᐃᖅᑲᓇᐃᔭᖅᑎᓗ ᑐᓴᐅᒪᖃᑎᒌᖏᓐᓇᖃᑦᑕᖕᓂᐊᖅᐴᒃ ᓄᖅᑲᖓᑎᓪᓗᒍ. ᖃᓄᑎᒋᐅᓂᐊᖕᒪᖔᑦ ᖃᓄᕐᓗ ᐊᖏᕈᑕᐅᓂᐊᖅᐴᒃ ᐱᒋᐊᓕᖅᐸᑦ ᐃᓕᓐᓂᐊᕐᓂᖓ.
  • ᐃᖅᑲᓇᐃᔭᖅᑎ ᖃᐅᔨᑎᑦᑎᓂᐊᖅᐳᑦ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ ᐊᔪᕈᑎᖃᓕᖅᐸᑕ ᐊᒃᓱᕉᑎᖃᓕᖅᐸᑕᓘᓐᓃᑦ ᐊᒃᑐᐃᓂᖃᕋᔭᖅᑐᒥᑦ ᐃᓱᓕᑦᑎᔭᕆᐊᒃᓴᖅ ᐃᓕᓐᓂᐊᕐᑕᒥᓂᒃ. ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ ᐱᓇᔪᖕᓂᐊᖅᐳᑦ ᖃᓄᓕᒫᖅ ᑖᓐᓇ ᐃᖅᑲᓇᐃᔭᖅᑎ ᐱᔨᑦᑎᕋᖅᑕᐅᒐᓗᐊᕆᐊᒃᓴᖓᓂ ᐃᑲᔪᖅᑕᐅᒐᓗᐊᕆᐊᒃᓴᖓᓂᒡᓗ ᐊᒃᓱᕈᖕᓇᕈᑖᓂ.
  • ᐃᖅᑲᓇᐃᔭᖅᑎ ᑎᑎᖅᑲᓂ ᓇᒃᓯᐅᔾᔨᓂᐊᖅᐳᖅ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ ᐱᓇᓱᐊᕈᓰᒃ ᒪᕐᕉ ᐃᓗᐊᓂᑦ ᑎᑎᖅᑲᖅᑖᓚᐅᖅᑎᓪᓗᒍ ᐃᓕᓐᓂᐊᕐᕕᒡᔪᐊᒥᑦ.
  • ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᖅ ᐃᑲᔪᖕᓂᐊᖅᐳᑦ ᐃᑲᖅᓇᐃᔭᖅᑎᒥᑦ ᓈᒻᒪᓛᒥᑦ ᓴᓇᕝᕕᒃᓴᖓᓂᑦ ᑐᕌᒐᐅᔪᖅ ᐱᓕᕆᕝᕕᖕᒥᑦ ᐊᐅᔭᐅᓂᖓᓂᑦ.

ᑕᓪᓕᒪᖓᓐᓂᑦ: ᐅᑎᖕᓂᖅ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖕᓂᖕᒥᑦ

  • ᓯᕗᒧᐊᖃᑎᒌᑦ ᐃᑲᔪᖅᑐᐃᓂᐊᖅᐳᑦ ᐅᑎᕐᓂᖓᓂ ᐃᖅᑲᓇᐃᔭᖅᑎᐅ ᐃᖅᑲᓇᐃᔮᒧᑦ ᓄᓇᕗᑦ ᒐᕙᒪᒃᑯᖏᓐᓂᑦ, ᐊᔾᔨᓪᓗᐊᑕᖓᓂᑦ ᐃᓂᒋᓚᐅᖅᑕᖓᑎᑐᑦ ᐃᓚᐅᓚᐅᖅᑳᕋᓂ ᐃᓕᓐᓂᐊᒐᒃᓴᒥᑦ ᐊᒫᖅᑖᕐᓂᖅ.
  • ᑖᒃᑯᐊ ᑐᕌᒐᐅᔪᖅ ᐱᓕᕆᕝᕕᒃ ᐊᔪᙱᓐᓂᕐᑖᕈᑕᐅᓲᑦ ᖃᐅᔨᒪᓂᖕᓂᓪᓗ ᐃᖅᑲᓇᐃᔭᕐᕕᐅᓲᑦ ᐱᕕᖃᖕᓂᐊᖅᐳᑦ ᑎᒃᑯᐊᖅᓯᔭᕆᐊᒃᓴᖅ ᐃᖅᑲᓇᐃᔭᖅᑎᒥᑦ ᐃᖅᑲᓇᐃᔮᒧᑦ ᐃᖅᑲᓇᐃᔭᖅᑎᓪᓚᕆᐅᓕᕐᓗᓂ ᓈᒻᒪᓛᒥᑦ ᖁᑦᑎᖕᓂᓕᖕᒥᑦ ᐃᖅᑲᓇᐃᔭᖅᑎ ᐱᓕᕆᓚᐅᖅᑎᓪᓗᒍ ᐊᔪᙱᓐᓂᕆᔭᐅᔭᕆᐊᓕᖕᓂᑦ ᐱᔪᓐᓇᐅᑎᒧᑦ ᐱᐊᓂᒃᐸᒍ.
  • ᐃᖅᑲᓇᐃᔭᖅᑎᐅᑲᐃᓐᓇᖅᑐᖅ ᐅᑎᕈᓂ ᐊᒫᖅᑖᕐᓂᖅ ᐃᓕᓐᓂᐊᓚᐅᕐᓗᓂ ᐃᖅᑲᓇᐃᔮᒃᓴᖃᙱᓪᓗᓂ, ᒥᓂᔅᑕᐅᑉ ᑐᒡᓕᐊ  ᒐᕙᒪᓕᕆᔨᒃᑯᓐᓄᑦ ᐊᖏᕈᓐᓇᖅᑐᖅ ᐃᖅᑲᓇᐃᔭᖅᑎ ᐃᖅᑲᓇᐃᔮᖃᑲᐃᓐᓇᕐᕕᖕᒦᓪᓗᓂ ᑕᖅᑭᒃᑲᓐᓂᖕᓄᑦ 6−ᓄᑦ ᐃᓚᐅᔪᓐᓇᖁᓪᓗᒍ ᐃᖅᑲᓇᐃᔮᒃᓴᓄᑦ ᓴᖅᑭᑦᑐᓄᑦ.
  • ᑖᒃᑯᐊ ᑲᓇᑕᒥᑦ ᐊᐅᓚᑦᑎᔨᒻᒪᕆᐅᓂᓕᕆᔨᒃᑯᑦ ᑲᑎᒪᖃᑎᖃᕐᓗᑎᒃ ᐅᑎᖅᐸᓪᓕᐊᓕᖅᑐᒧᑦ ᐃᖅᑲᓇᐃᔭᖅᑎᒧᑦ ᓄᑖᙳᕆᐊᕋᓱᒡᓗᒋᑦ ᐃᖅᑲᓇᐃᔮᒧᑦ ᐱᐊᓂᒃᓯᓂᖕᒧᑦ ᑎᑎᖅᑲᓂᑦ.

ᐊᑐᐃᓐᓇᒐᒃᓴᐃᑦ
 
ᑮᓇᐅᔭᑎᒍᑦ ᐃᑲᔫᓯᐊᒃᓴᑦ

ᒐᕙᒪᓕᕆᔨᒃᑯᑦ ᑮᓇᐅᔭᑎᒍᑦ ᐃᑲᔫᓯᐊᖃᖅᑎᑦᑎᖃᑦᑕᖕᓂᐊᖅᐳᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ ᐊᔾᔨᒌᓂᑦ ᓈᒻᒪᓛᓂᑦ ᐊᑐᕐᓗᑎᒃ ᐅᑯᓂᖓ:

ᐃᑲᔫᓯᐊᒐᒃᓴᑐᐃᓐᓇᖅ

ᐃᑲᔫᓯᐊᒐᒃᓴᑐᐃᓐᓇᐃᑦ ᐊᑭᓕᖅᑕᐅᕙᒃᐳᑦ ᐃᓄᖕᓄᑦ ᐃᖅᑲᓇᐃᔭᖅᑎᓕᒫᓄᑦ ᐱᓇᔫᑎᖏᑦ ᐊᖏᖅᑕᓯᒪᔪᑦ ᐃᓕᓐᓂᐊᕐᓂᖕᒧᑦ ᐊᒫᖅᑖᕐᓂᖅ ᑐᕌᖓᔪᖅ ᒫᓐᓇᒧᑦ ᓯᕗᓂᒃᓴᒧᓪᓘᓐᓃᑦ ᐊᑐᖅᑕᐅᔭᕆᐊᓕᖕᓂᑦ ᐃᖅᑲᓇᐃᔮᒧᑦ ᒐᕙᒪᒃᑯᓐᓄᑦ ᐱᔨᑦᑎᕋᖕᓂᖕᒧᑦ. ᐃᑲᔫᓯᐊᒐᒃᓴᑐᐃᓐᓇᐃᑦ ᐅᑯᐊᖑᔪᑦ, ᑭᒡᓕᖃᕋᑎᒃ ᐊᑭᓄᑦ ᒪᑯᓄᖓ:

  • ᐃᓕᓐᓂᐊᕆᐊᕈᑎᒃᓴᑦ
  • ᐊᑕᐅᓯᐊᕐᓯᒪᔪᒥ ᐅᑎᕈᑎᒃᓴᒥᑦ ᖃᖓᑦᑕᐅᑎᓄᑦ ᓄᓇᖓᓐᓂᑦ ᐃᓕᓐᓂᐊᕐᕕᒋᓂᐊᖅᑕᖓᓄᑦ
  • ᐱᖁᑎᖏᑦ ᖃᖓᑦᑕᐅᓯᖅᑕᐅᓂᖏᑦ ᓄᓇᖓᓐᓂᑦ ᐃᓕᓐᓂᐊᕐᕕᒋᓂᐊᖅᑕᖓᓄᑦ (ᐅᑎᒧᓪᓗ ᓄᓇᖓᓐᓄᑦ) ᒪᓕᒡᓗᑎᒃ ᓄᓇᕗᑦ ᒐᕙᒪᒃᑯᖏᑦᑕ ᓅᑕᐅᓂᖏᓐᓄᑦ ᐅᖁᒪᐃᓐᓂᖏᓐ ᐅᓯᔭᐅᔪᓐᓇᖅᑐᖁᑎᖏᓂ
  • ᐅᖃᓕᒫᒐᓄᑦ ᐊᓯᖏᓐᓄᑦ ᐃᓕᓐᓂᐊᕈᑎᒃᓴᓄᑦ
  • ᖃᐅᔨᓴᕐᕕᖕᓄᑦ ᐊᑭᓕᒐᒃᓴᐃᑦ
  • ᑎᑎᕋᖅᑕᐅᓂᖕᒧᑦ ᐊᑭᓕᒐᒃᓴᐃᑦ

ᐃᓗᐃᑦᑐᓂᒃ ᐃᑲᔫᓯᐊᑦ ᐃᓇᖏᐅᑎᓪᓗᓂ ᑮᓇᐅᔾᔭᒃᓵᒧᑦy

ᐃᓚᓪᓗᓂ ᐃᑲᔫᓯᐊᑐᐃᓐᓇᖕᓄᑦ ᑎᑎᕋᕐᓯᒪᔪᑦ ᖁᓛᓂ, ᐃᖅᑲᓇᐃᔭᖅᑎ ᐃᑲᔫᓯᐊᕈᓐᓇᖅᑐᖅ ᐊᔾᔨᓪᓗᐊᖓᓂᑦ 100 ᐳᓴᓐᑎᒧᑦ ᑮᓇᐅᔾᔭᒃᓵᒧᑦ ᑕᖅᑭᓄᑦ 9.5 ᐊᕐᕌᒍᒥᑦ ᐃᓕᓐᓂᐊᕐᓂᓕᒫᖓᓐᓄᑦ.

ᐃᑲᔫᓯᐊᑦ ᐊᑭᓕᐅᑎᓪᓗ ᐃᓕᓐᓂᐊᕐᑎᓪᓗ ᐊᒫᖅᑖᕐᓂᖅ

ᐃᖅᑲᓇᐃᔭᖅᑏᑦ ᐊᖏᖅᑕᐅᓯᒪᔪᑦ ᐃᓕᓐᓂᐊᒐᒃᓴᒧᑦ ᐊᒫᖅᑖᕐᓂᖅ ᐃᖅᑲᓇᐃᔮᒧᐊᖅᑕᐅᓂᐊᖅᐳᑦ ᒐᕙᒪᓕᕆᔨᒃᑯᓐᓄᑦ. ᐱᔾᔪᑎᒋᓪᓗᒋ ᕿᑲᖕᓂᖕᒧᑦ ᐅᐸᖃᑦᑕᖕᓂᖕᒧᓪᓗ ᐱᓕᕆᐊᖑᓂᖏᓐᓂᑦ, ᐃᖅᑲᓇᐃᔭᖅᑎᑦ ᐃᓕᓐᓂᐊᕐᑐᑦ ᐊᒫᖅᑖᕐᓂᖅ ᐱᓇᔪᖕᓂᐊᖅᐳᑦ “ᕿᑲᖕᓂᖅ ᐊᑭᓕᖅᓱᖅᑕᐅᙱᓪᓗᓂᒧ.” ᑮᓇᐅᔭᑎᒍᑦ ᐃᑲᔫᓯᐊᑦ ᐃᓱᒪᒋᔭᐅᓂᐊᖅᐳᑦ ᐃᓇᖏᐅᑎᓗᑎᒃ ᑮᓇᐅᔾᔭᒃᓵᒧᑦ, ᐅᑯᓂᖓ ᐱᔪᓐᓇᕐᓗᓂ:

ᐃᖅᑲᓇᐃᔭᖅᑎᑦ ᐃᓕᓐᓂᐊᕐᑐᑦ ᐊᒫᖅᑖᕐᓂᖅ ᐊᑭᑦᑐᕆᐊᕈᔾᔭᐅᓛᖅᐳᑦ ᑮᓇᐅᔾᔭᒃᓵᖏᓐᓂᑦ ᓴᖅᑭᑕᐅᔪᖅ ᐃᖅᑲᓇᐃᔭᖕᓂᑦ ᐊᖏᕈᑎᓂᑦ.

ᕿᑲᐅᑎᑦ ᐊᒥᓲᓂᕐᓴᑦ ᑕᖅᑭᓄᑦ 6−ᓄᑦ ᑭᖑᕙᕆᐊᕈᑕᐅᕗᖅ ᐃᖅᑲᓇᐃᔭᖅᑎᐅᑉ ᐊᑭᑦᑐᕆᐊᕐᕕᒃᓴᖓᓄᑦ ᑭᓯᐊᓂ ᐃᖅᑲᓇᐃᔭᖅᑎ ᐅᑎᕐᐸᑦ ᐃᖅᑲᓇᐃᔮᖓᓐᓄᑦ ᐱᐊᓂᒃᓯᓗᓂᓗ ᑕᖅᑭᓄᑦ 12−ᓄᑦ ᐊᑭᓕᖅᑕᐅᓯᒪᔪᓂᑦ, ᐃᖅᑲᓇᐃᔮᓪᓚᕆᒃᑐᑦ ᐅᓪᓗᖓᓐᓂᑦ ᐃᖅᑲᓇᐃᔭᖅᑎᐅᑉ ᐊᑭᑦᑐᕆᐊᕐᕕᒋᓚᐅᖅᑕᖓᓐᓂᑦ. ᐃᓚᐅᔪᑦ ᓯᕗᓂᐊᓂᑦ ᐃᖅᑲᓇᐃᔮᖓᓂᑦ ᑭᖑᓂᐊᓂᒡᓗ ᐅᐸᖃᑦᑕᓚᐅᖅᑳᕋᓂ ᑭᓯᐊᓂᓕ ᑭᖑᓪᓕᖕᒥᑦ ᐊᑭᑦᑐᕆᐊᕐᕕᒋᓚᐅᖅᑕᖓᓂ.

ᕿᑲᐅᑎᒃᓴᓂᑦ ᓄᐊᑦᑎᕙᙱᓚᑦ ᐃᓕᓐᓂᐊᕐᑎᓪᓗᒋᑦ ᐊᒫᖅᑖᕐᓂᖅ.

ᐃᑲᕐᕋᑦ ᐅᖓᑖᓅᕈᑎᑦ ᖃᖓᑕᓂᖕᒧᓪᓗ ᐊᑐᙱᓚᑦ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᕐᑐᑦ ᐊᒫᖅᑖᕐᓂᖅ.

ᓄᓇᕗᒻᒥᑦ ᐅᑭᐅᖅᑕᖅᑐᒥᐊᖑᔾᔪᑎᓂᑦ ᐊᑭᓕᖅᑕᐅᖃᑦᑕᔾᔮᖏᓚᑦ ᐃᖅᑲᓇᐃᔭᖅᑎᓄᑦ ᐃᓕᓐᓂᐊᕐᑐᑦ ᓄᓇᕘᑉ ᓯᓚᑖᓂᑦ ᐃᓕᓐᓂᐊᕐᕕᖕᓂᑦ. ᐃᓕᓐᓂᐊᕈᓂ ᓄᓇᕗᒻᒥᑦ, ᐃᖅᑲᓇᐃᔭᖅᑎ ᐱᖃᑦᑕᖕᓂᐊᖅᐳᑦ ᓄᓇᕗᒻᒥᑦ ᐅᑭᐅᖅᑕᖅᑐᒥᐅᖑᔾᔪᑎᒥᑦ ᓄᓇᒋᔭᖓᓐᓄᑦ ᐃᓕᓐᓂᐊᕐᑎᓪᓗ ᐊᒫᖅᑖᕐᓂᖅ.

ᐊᓯᖏᑦ ᐊᑭᓕᖅᑕᐅᓲᑦ ᐃᑲᖅᓇᐃᔭᖅᑎᓄᑦ ᐱᓕᕆᐊᖏᓐᓄᑦ ᐊᑭᓕᖅᑕᐅᔾᔮᙱᓚᑦ ᐃᓕᓐᓂᐊᕐᑎᓪᓗᒍ ᐊᒫᖅᑖᕐᓂᖅ. ᐅᑯᐊᖑᔪᑦ ᒪᕐᕉᖕᓂᑦ ᐅᖃᐅᓯᖃᕈᓐᓇᐅᑏᑦ, ᐃᓕᓐᓂᐊᕐᑎᑦᑎᓂᖕᒧᑦ, ᑲᒪᒋᔭᒃᓴᑦ ᐊᕐᕌᒍᒥᓪᓗ ᐱᔭᐅᓲᑦ ᐊᔾᔨᐅᙱᑦᑐᑦ (ᐋᓐᓂᐊᓯᐅᑎᑦ) ᐊᓯᖏᓪᓗ ᐊᑭᓕᖅᑕᐅᓲᓂᑦ.

ᐃᖅᑲᓇᐃᔭᖅᑎ ᐊᑭᓖᓯᒪᕙᒌᕆᐊᖃᖅᐳᖅ ᐊᑭᓕᒐᒃᓴᓂᑦ ᐃᓅᓕᓴᐅᑎᓄᑦ ᓇᓪᓕᐅᒃᑯᒻᒫᓄᑦ.  ᐊᑭᓖᔾᔪᔾᔭᐅᑦᑎᐊᕈᓐᓇᖁᓪᓗᒋᑦ.

ᓄᖅᑲᖅᑐᖅᓯᐅᑎᑦ, ᐃᓅᔪᓐᓃᕐᓗᓂ ᐃᑲᔫᓯᐊ ᐊᔪᓕᕈᑎᓄᓪᓗ ᓇᓪᓕᐅᒃᑯᒻᒫᑦ ᑲᒪᒋᔭᐅᓲᑦ ᐃᖅᑲᓇᐃᔭᖅᑎ ᐅᑎᕌᖓᒥ ᐃᖅᑲᓇᐃᔮᒥᓄᑦ. ᐊᑭᓕᕐᓱᐃᔾᔪᔾᔭᐅᓇᔭᖅᑐᑦ ᐊᔾᔨᓪᓗᐊᖓᓂᑦ ᐃᓕᓐᓂᐊᕆᐊᖅᓯᒪᑎᓪᓗᒍ ᐊᒫᖅᑖᕐᓂᖅ.

ᐊᐅᓪᓛᓐᓂᖅ ᓅᓐᓂᕐᓗ

ᐊᑮᑦ ᐱᖁᑎᓄᑦ ᐅᓯᔭᔾᔪᑎᓄᑦ ᐊᓯᐊᓄᑦ ᓄᓇᒧᑦ ᐅᑎᒧᓪᓗ ᐃᖅᑲᓇᐃᔭᕐᕕᒋᔭᖓᓂ ᐃᓕᓐᓂᐊᕌᓂᒃᑎᓪᓗᒍ ᐊᑭᓕᖅᑕᐅᓂᐊᖅᐳᑦ ᐃᓕᓐᓂᐊᕐᑎᓄᑦ ᐊᒫᖅᑖᕐᓂᖅ. ᐊᑭᖏᑦ ᐋᖅᑭᒃᓱᖅᑕᐅᓂᐊᖅᐳᑦ ᒪᓕᒡᓗᑎᒃ ᓄᓇᕗᑦ ᒐᕙᒪᒃᑯᖏᑦᑕ ᐅᓯᔭᔪᓐᓇᐅᑎᖏᓐᓂᑦ.

ᐅᑎᕈᑏᑦ ᓄᓇᖓᓐᓂ ᐃᓕᓐᓂᐊᕆᐊᕐᕕᒋᔭᖓᓄᑦ ᐊᑭᓕᖅᑕᐅᓂᐊᖅᐳᑦ ᐸᖅᑭᔭᖏᑦ ᐃᖅᑲᓇᐃᔭᖅᑎᐅᑉ ᐃᓕᓐᓂᐊᕆᐊᖅᓯᒪᔪᑦ ᐊᒫᖅᑖᕐᓂᖅ. ᐃᖅᑲᓇᐃᔭᕐᕕᐅᔪᑦ ᑲᒪᒋᔭᖃᙱᓚᑦ ᐊᑭᓕᐅᑎᒃᑲᓐᓂᖕᓂᑦ ᐃᒡᓗᒧᑦ, ᐃᒡᓗᖁᑎᒋᔭᓄᑦ ᐊᑭᓂᑦ ᑐᖅᑯᐃᔾᔪᑎᓄᓪᓗ ᐱᖁᓄᑦ ᐊᑭᓕᒐᒃᓴᓕᐊᑦ ᐃᖅᑲᓇᐃᔭᖅᑎᒧᑦ ᐃᓕᓐᓂᐊᕆᐊᖅᓯᒪᑎᓪᓗᒍ ᐊᒫᖅᑖᕐᓂᖅ.

ᐃᖅᑲᓇᐃᔭᖅᑎᑦ ᓄᓇᕗᑦ ᒐᕙᒪᒃᑯᖏᑦᑕ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᖏᓐᓃᑦᑐᑦ ᑐᓴᖅᑎᑦᑎᔭᕆᐊᓖᑦ ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᓐᓂᑦ ᐊᐅᓪᓚᖕᓂᐊᖕᓂᖕᒥᓂᒃ ᐃᓚᐅᓂᐊᕐᓗᑎᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ ᑖᒃᑯᐊᓗ ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᐅᒪᑎᑉᐸᒌᖅᓯᒪᓗᓂᒋᑦ ᐅᑎᓛᖕᓂᖕᒥᓂ ᓄᓇᕗᒻᒥᑦ ᐃᓕᓐᓂᐊᕌᓂᒃᐸᑕ.

ᐃᖅᑲᓇᐃᔭᖕᓂᖅ ᐃᓕᓐᓂᐊᕐᑎᓪᓗᒋᑦ ᐊᒫᖅᑖᕐᓂᖅ

ᐃᖅᑲᓇᐃᔭᖅᑎᑦ ᐃᓕᓐᓂᐊᕆᐊᖅᓯᒪᔪᑦ ᐊᒫᖅᑖᕐᓂᖅ ᐃᖅᑲᓇᐃᔭᕈᓐᓇᖅᑐᑦ ᓄᓇᕗᑦ ᒐᕙᒪᒃᑯᖏᑦᑕ ᐃᖅᑲᓇᐃᔭᑲᐃᓐᓇᒐᒃᓴᖏᓐᓂᑦ ᓄᖅᑲᖓᑎᓪᓗᒋᑦ ᐃᓕᓐᓂᐊᕐᓇᐅᑉ ᐊᕐᕌᒍᐊᓂᑦ. ᐃᖅᑲᓇᐃᔭᖅᑎᑦ ᐊᑭᓕᖅᓱᖅᑕᐅᓂᐊᖅᐳᑦ ᐃᒻᒪᖄ ᖁᑦᑎᖕᓂᓕᖕᒥᑦ 1−ᒥᑦ ᐃᖅᑲᓇᐃᔮᒃᓴᐅᑲᐃᓐᓇᖅᑐᒥᑦ ᐊᔾᔨᓪᓗᐊᑕᖓᓂᒡᓘᓐᓃᑦ ᑮᓇᐅᔾᔭᒃᓵᑉ ᐃᓕᓐᓂᐊᕆᐊᖅᓯᒪᑎᓪᓗᒍ ᐊᒫᖅᑖᕐᓂᖅ, ᓇᓕᐊᖕᓂᑦ ᐊᑭᑐᓂᕐᓴᒥᑦ. ᐃᖅᑲᓇᐃᔭᖅᑎ ᐅᑎᕈᓂ ᐃᖅᑲᓇᐃᔮᑐᖃᕕᓂᖕᒥᓄ ᐃᖅᑲᓇᐃᔮᒧᓪᓘᓐᓃᑦ ᐊᔾᔨᓪᓗᐊᑕᖓᓂᑦ ᐱᓕᕆᐊᓕᖕᒥᑦ ᑲᒪᒋᔭᒃᓴᓕᖕᓂᓪᓗ, ᐃᖅᑲᓇᐃᔭᖅᑎ ᐊᑭᓕᖅᑕᐅᓂᐊᖅᐳᑦ ᑮᓇᐅᔾᔭᒃᓵᓪᓗᐊᖓᓂ ᐃᖅᑲᓇᐃᔮᑉ ᓄᖅᑲᖓᓚᐅᖅᑳᕋᓂ ᐊᒫᖅᑖᕐᓂᖅ ᐃᓕᓐᓂᐊᕐᓂᖕᒧᑦ.

ᐅᑎᐅᑎᒃᓴᑦ ᖃᖓᑕᓲᒃᑯᑦ ᐃᓕᓐᓂᐊᕆᐊᕐᕕᒋᔮᓂᑦ ᐃᖅᑲᓇᐃᔭᕐᕕᐊᓄᑦ ᐊᑭᓕᖅᑕᐅᔪᓐᓇᖅᐳᑦ ᐃᖅᑲᓇᐃᔭᖅᑎᓄᑦ (ᑖᒃᓱᒧᖓᑐᐊᖅ) ᑐᓂᔭᐅᓯᒪᔪᖅ ᐊᖏᐅᑎᒋᓯᒪᓪᓗᓂᐅᒡᓗ ᐃᓂᒋᔭᓂ ᓄᓇᕗᑦ ᒐᕙᒪᒃᑯᖏᓐᓄᑦ ᓄᖅᑲᖓᑎᓪᓗᒋᑦ ᐃᓕᓐᓂᐊᕐᓇᐅᑉ ᐊᕐᕌᒍᐊᓂᑦ.

ᐅᑎᖕᓂᖅ ᓄᓇᕗᑦ ᒐᕙᒪᒃᑯᖏᓐᓄ ᐊᖏᕐᓯᒪᓂᖏᓐᓄᑦ 

ᐃᖅᑲᓇᐃᔭᖅᑎᑦ ᐃᓚᐅᓚᐅᑐᑦ ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᐅᑎᕆᐊᓖᑦ ᐃᖅᑲᓇᐃᔮᒧᑦ ᒐᕙᒪᒃᑯᓐᓄᑦ ᐊᔾᔨᓪᓗᐊᑕᖓᓂ ᓄᖅᑲᖓᑎᑕᐅᓂᕆᓚᐅᖅᑕᖓᓄᑦ. ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖕᓂᑦ ᐃᓕᓐᓂᐊᕐᑎᓪᓗᒋᑦ ᓇᐃᓴᖅᑕᐅᕙᒃᐳᑦ ᐅᑎᕐᓂᖅ ᐱᔨᑦᑎᕋᖕᓂᖕᒧᑦ.

ᐃᖅᑲᓇᐃᔭᖅᑎ ᐊᒫᖅᑖᕐᓂᖅ ᐃᓕᓐᓂᐊᕐᓗᓂ ᓄᖅᑲᖓᓐᓂᖅᐸᑦ

  • ᐃᓱᓕᑦᑎᙱᑉᐸᑦ ᐊᖏᖅᑕᐅᓯᒪᔪᒥᑦ ᐃᓕᓐᓂᐊᒐᒃᓴᒥᑦ ᐱᔾᔪᑎᖃᑦᑎᐊᙱᓪᓗᓂ;
  • ᐅᑎᙱᓪᓗᓂ ᐃᖅᑲᓇᐃᔮᒧᑦ ᐃᓱᓕᑦᑎᐊᓂᒃᑎᓪᓗᒍ ᐃᓕᓐᓂᐊᒐᒃᓴᒥᑦ; ᐅᕝᕙᓘᓐᓃᑦ
  • ᓄᖅᑲᖅᐸᑦ ᐃᖅᑲᓇᐃᔮᒥᓂᑦ (ᓄᖅᑲᖅᑎᑕᐅᒃᐸᓪᓘᓐᓃᑦ) ᐃᓱᓕᑦᑎᓚᐅᖅᑳᕋᓂ ᐅᑎᕐᕕᒃᓴᖓᓂ ᑎᑎᕋᖅᓯᒪᔪᑎᒍᑦ ᖁᓛᓂᑦ;

ᐃᖅᑲᓇᐃᔭᖅᑎ ᐅᑎᕐᑎᑦᑎᓂᐊᖅᐳᑦ ᑮᓇᐅᔭᓕᒫᑦ ᐃᑲᔫᑕᐅᓚᐅᖅᑐᑦ ᐊᑭᓕᖅᑕᑦ ᐊᒫᖅᑖᕐᓂᖅ ᓄᖅᑲᖓᑎᓪᓗᒍ ᐊᑭᑭᓐᓂᕐᓴᒥᒡᓘᓐᓃᑦ ᐋᖅᑭᒋᐊᖅᓯᒪᔪᒥᑦ.

ᐃᖅᑲᓇᐃᔭᖅᑎ ᐃᓱᓕᑦᑎᙱᑉᐸᑦ ᐆᒥᖓ ᐊᖏᕈᑎᒥᑦ ᓂᕆᐅᓇᙱᑦᑐᓄᑦ, ᐃᖅᑲᓇᐃᔭᖅᑎ ᑐᒃᓯᕋᕈᓐᓇᖅᑐᖅ ᕿᒥᕐᕈᔭᐅᖁᓗᓂᒋᑦ ᓂᕆᐅᓇᙱᔾᔪᑎᖏ ᒥᓂᔅᑕᐅᑉ ᑐᒡᓕᐊᓄ ᒐᕙᒪᓕᕆᔨᒃᑯᓐᓄᑦ ᑖᒃᑯᐊᓗ ᐱᓕᕆᕝᕕᐅᔪᑦ ᓴᒃᑯᐃᑐᐃᓐᓇᕈᓐᓇᕐᓗᓂᔾᔪᒃ ᐃᖅᑲᓇᐃᔭᖅᑎ ᖃᓄᐃᓕᔭᐅᒋᐊᒃᓴᖅ.

ᐅᐃᒍᐊᕈᓰᑦ:

A. ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᓄᑦ ᑎᑎᕋᕐᕕᒃᓴᐃᑦ
 
B. ᐊᒫᖅᑖᕐᓂᖅ ᐃᓕᓐᓂᐊᕐᑎᑦᑎᔾᔪᑎᒃᓴᑦ ᐊᖏᕈᑖ

C. ᖃᐅᔨᓴᕈᑎ ᑕᒪᒃᑭᖕᒪᖔᖏᓐᓂᑦ

 

[1] ᐊᒫᖅᑖᕐᓂᖅ: ᓯᐊᒻᒪᒃᐸᓪᓕᐊᔪᑦ ᐊᐃᕋᐃᑦ