Havaktingit

You are here

Makigiaqta Katimayit Hivuliqhuqtit Manikhaqtitiyut Nunagiyauyuni Havaakhanik

Iitjirurvia 06, 2017

Tuhaqtijut

Tuninariqtukhaq

Makigiaqta Katimayit Hivuliqhuqtit Manikhaqtitiyut Nunagiyauyuni Havaakhanik

IQALUKNI, Nunavumi(February 6-mi 2017-mi) –NunavutTungavitkut Timiuyumi (NTI-kuni) Ikhivautalik Aluki Kotierk Kavamalu Nunavumi Ministauyuq Paul Quassa ublumi tuhaqtitiyut ukua Makigiaqta Inuit Ayuiqhajutiliqiyit Kuapariisiuyuup Katimayit Hivuliqhuqtiit agiqtut agitqiyaanik 3-miliatalauyuup manikhaakhanik atulirumayauyunik 12-ni aalatqiini ayuiqhajutikhanik havaani.

Pijutauyuq ayuiqhajutiliqiyit kuapariisiuyuq upalugaiqpaaliriagani Nunavumi Inuit havaliriamikni, inuliqijutini nanminikluniit havakviuyuni. NTI-kut hatqiqhiyut Makigiaqta-mik Janurary-mi 2016-mi manikhaakhanik piyauyunik Agiqatiriigutimit ihuaqhijutauyumik NTI-kut apiqhuiyutigut akiraqtuqtaujutimik Kanamanik Kanatami atuginmata havaariyakhamiknik uvani Nunavumi Agiqatiriigunmi. Ilitariyauniganik timiuniganik kiguliqmi January-mi, Makigiaqta hatqiqhiyut ihumakhaqhiuqtikhanik katimayinik, ihuaqhailutik havauhikhamiknik upalugaiyaunmik qanurinikhaaniklu atulirumayainik upalugaiyainmik, agiqhugilu manikharumayut havaariyakhamikni malruukniugaluaq hulijutikhakni pijutauniaqmat Inuit havaliriamikni ayuruirutikhainik.

"Manikhaktitikpata ukuniga atuqniqaqtunik havaani, Makigiaqta aulaqtiriaqtitiyuq ikayuriagani Nunavumi Inuit piyaagani ayuruirutikhanik ihariagiyauyunik pivagiagini havaakhanik tamaini havakviuyubni Nunavumi manikhaqhiurutini. Una atuqtauyuq pivaliajutauniaqmat aaniagitunik ilariinik, aaniagitunik nunagiyauyunik aaniagituniklu Inuinaqnik. Una tautuktuuyaaqtaqut agiqatiriigutiginahuaqtilugu Nakatani 23 Nunavumi Agiqatiriigunmi,"uqaqtuq NTI-kuni Ikhivautalik Kotierk.

"Makigiaqtatuniqhimayut pivagiagani aulaniqatiaqtut ayuiqhajutit ayuruirutiniklu pivalianigit ukua Nunavumi Inuit pivagiagani inutiarutikhamiknik tamaini hivuliqhuqlutiklu Hivunikhaanik nunagiyapta ukiuqtaqtumi. Nunavut nukaqhiutqiyauyunik amigaiqpaliatqiyauyuniklu inuknik Kanatami atuliriaganilu ayuruirutikhanik ayuiqyayaagani ihumanatiaqtuq manikhaqhiurutiptikni, ilitquhiptikni inutiarutikhaptiknilu iligaitumik. Ikayuqtiriigutiptiknit, pipkaiyugut ajikutaqagituik atuqtakhanik nunagiyaptiknit Nunavumilu," uqaqtuq Ministauyuq Quassa.

Manikhaqtuq ukuaguyuut Qaggiavuut, Ilisaqsivik Katimayit, Aqviani Inuhiqatiaqnikhanik Havakviuyuq, Quajigiartiit-kut Aaniaqtailinikut Ilituqhaiyit Havakviat, Ilinniapaa-kut Ilihaqpaaliqvik, Ukiuqtaqtumi Nutaqaat Inulramiilu Tungaviat, Kivaliqni Inuit Katimayit, Pirurvik-kut Ilihaqaaqvikmi, Nunavumi Sivunikhavut, Nunavumi Iqaliuliqiyit Taqyumilu Ayuiqhajutinik, Hamliuyuq Taluyuani, Qitiqmiunilu Inuit Katimayit.

Havaakhat pihimaliqtut manikhaanik tikuaqtauhimayut havaaqaqmata iluani Makigiaqta-p havaariluarumayaini, ilaqaqtunik ikayuriagani Inuit ilihaqtut Ilihaqaaqviknit Ayuruirutinik 12-mut ilihaqpaaliqviknilu, nutaranuit pivalianiqhainik, Inunaqtulu, Inuilu ilitquhiinikhavakviuyumi.

Makigiaqta Katimayit Hivuliqhuqtit quviahuktut tuhaqtitiyaamini ukua hivuliit maniknik atuqtitijutut, havaqatiqaqniaqmata ikayuqtiriinik humiliqaa Nunavumi tikuaqhiyaagani manikniklu atuqtitiyaagani ilariagutikhanik ayuiqhajutini havaani ukiuni atuqtukhani.

Hivuniqhivaalirumaniruvit, uqaqvigijavat:

Kerry McCluskey

Hivuliqhuqti Tuhaumajutinik

Nunavut Tungavitkut Timiuyumi

Hivayautaa: 867-975-4914

Akiitukut: 1-888-646-0006

Qaritauyakut: kmccluskey@tunngavik.com

 

Cate Macleod

Hivuliqhuqti Tuhaumajutinik

Kavamani Nunavumi

Hivayautaa: 867-975-6049

Qaritauyakut: CMacleod@gov.nu.ca