Havaktingit

You are here

Hilataanin inigiikhimayuq Ihivriuqnikkut ilitugidjutikharnik nuitiqtiqhimavaktuq talvani Iqalungni

Nuvaipa 30, 2015

Tuhaayakhaq 

Hilataanin inigiikhimayuq Ihivriuqnikkut ilitugidjutikharnik nuitiqtiqhimavaktuq talvani Iqalungni 

IQALUIT, Nunavut (Hikutirvia 30, 2015) – Inigiikhimayuq ilitugidjutikhaq titiraqhimayuq hivungani “A Journey through Heartache-mik” nuitiqtitauvakhimayuq talvani Iqalungni ublumi Ministamin Munarhiliqiyikkutni Paul Okalik, katimaqatigihuigamitkit angayuqaangita biipiinuam Makibi Timilak, talvuuna aituivaktuq mamianautikharnik ilaqaqtunun. 

“Nunavut Kavamanganin Havagviatlu Munarhiliqiyikkut, mamianautikharnik aituivunga biipiinuamun Makibi Timilangit angayuqaanun , Neevee Akesuk Luutaaq Qaumaqiaqmunlu, umatairnikkut naglikhaarnikkutlu atuqpagainik irninganun huiqviutigiyaanganik 2012mi,’ uqaqtuq Minista Okalik. “Aituivunga mamianautikharnik inungnun talvani Kinngaitmi ihuangitumik atuqpaktainik munarhiliagaangamik nunalaamingni, ihumalugiaqangitun ihuaqtumik atuqpakniaqtun munarhiliqidjutiliqinikkut atuqtakhangit.” 

Ukiakharnirmi 2014mi, Ministauyuq Munarhiliqiyikkutnun aituivaktuq nanminikharnik qiniqhiadjutikharnik talvuuna huiqvianganun inuuvakhimayuq pingahunik tatqikhiutinik biipiinuaq Makibi Timilakmik. Katherine Peterson, havagungnaiqhimayugaluaq tupilauyaq talvanga Nunatsiarmin, apigiyauvakhimayuq havaquyauvakhimayuq atulihaaliqtiluni 2015 taniqtauvakhunilu tuniqupluni kinguliqpaarmik ilitugidjutikharnik Hikutirvia 30, 2015nguqtinani. 

Mis. Petersonsinum kinguliqpaanguyuq ilitugidjutikhaq piqaqtuq 47nik atuquyauyukharnik, ilauqaqtuqlu tamna Angiyuqaaluaq Huiqtuliqiyi Nunavunmi tuqhulauyukhaq kangiqhidjiutikharnik huiqhimayumun biipiinuaq Makibi Timilak, ilituqhaidjutiqaqtuq hanaqidjutikharnik aulahimayut talvuuna havaktuliqiyikkutni, malikhautikhangit, aanniaqtunun ilaqatigiiknikkut ayuqhaqnaqyuaqtunun ilituqhaiyaangat malikhautikhangit. Tamaita 47nguyut atuquyauhimayut atuqtauniaqtun talvani Havagvingmi Munarhiliqiyikkut. 

“Ilitugipkaiyumayunga angiqatigiikniaqtugut ukuninga malikhautikharnik angmaumayumik upingnaqtumiklu, quyagiumayagalu Mis Peterson ihivriuqtamingnik havakpaktaingitlu talvuuna ihivriuqnikkut,” uqaqtuq Minista Okalik. “Uqallautivaktatka Havagviat Munarhiliqiyikkut angiyukhiq havaktiat aulatitiliqiplugit tamaita atuqtauyukhauliqtun, tuniniaqtunga utiqvikharnik malikhautigivaktainik katimafaaqtinata maligaliuryuarvingmi.” 

Tamna ilitugidjutikhaq naunaiyagiikhimaliqtuq katimavikhaptingni talvuuna Idjirurvia 2016nguqan maligaliuryualiqivingmi. Aadjiliukhimayuq hilataanin ilitugidjutiliuqtukharnik tapfuminga , “A Journey through Heartache-mik”, pigiaqaqtun talvanga Havagviat Munarhiliqiyikkut qaritauyaliqidjutingni: www.gov.nu.ca/health

### 

Tuhaqtitiyuq Hivayaqlugu: 

Ron Wassink
Tuhaqtitiliqiyikkut Ayuittiagiikhimayuq
Havagviat Munarhiliqiyikkut
867-975-5710
rwassink@gov.nu.ca

 

Kangiqhidjutikhaq 

Naunaiyagiikhimayuq atuquyauhimayut naunaitumik titiraqhimayuq talvanga “A Journey through Heartache-min” 

Kangiqhidjutikhangit 

Angayuqaangit biipiinuam Makibi Timilak hivayaqpaktait Kinngaitmi Munarhitkut hivayautikkut 9mungaqtumik unuktiluni Qitiqqautijuq 4, 2012mi. Munarhi Debbie McKeown uqaqatigivaktait hivayaqtun ilitugipkaiyumaplutik ihumaaluutigiyaingit biipiinuaq Makibi Timilak namagiluarungnaigami. Munarhi McKeown uqallautigivaktait biipiinuaq uaquplugu qaritiyauyaangat qaukpan ubluangani. Naunaituq ilitangnaqtunik ayungnautiqaqpaktuq talvuuna qiniqhiadjutigiyainik talvuuna biipiinuamik Makibi Timilakim ayungnautigiyaingit hivayaqtautiluni munarhi. Qaffiunik ikaakninik qangikmanik biipiinuaq Makibi Timilak qillaminuaq munarhitkunungautiyauvaktuq, mihigiunaiqman, anaktaulimaiqhunilu. 

Huirvia ilitugiyauvakhimayut Qitiqqautijuq 2012mi talvanga Angiyuqaluaq Huiqtiliqiyunin taima biipiinuaq hirlukaqtitauryuaqtuq (SIDS) huiqtuq. Huirviangatauq allamik ilitagiyaufaaqhuni Huiqtiliqiyiimin Taaqhivalirvia 2012mi, huiqviangaguuq huiqpakhimayuq talvanga puvaklurnirmin aanniarutmin. Tattiarnaqtuq 2015mi, allangufaaqhuni uuminga hirlukaqtitauryuaqmik (SIDS). 

Naunaiyagiikhimayuq Atuquyauhimayut 

1. Allanguqtiqhimaaqtun allanguqtitauhimayukhat talvanga Havagviangit Munarhiliqiyikkutni: 

  • Tamaita munarhitkuni havaktiit ilitugipkaiyukhat talvuuna malikhautikhagiyainun havaktunun; 
  • Havaagiyaa angiyukhiluaq munarhi piqaqtukhaliqtuq ihuaqtumiklu ilitugidjutiqaqtukhaq hivutunirmik malikhautikharnik; 
  • Havagvit Munarhiliqiyikkut munagiyakhait anullautikharnik taimaaqtitaurutikharnik munarhitkuni havaktinun; 
  • Malrungnik malikhautikharnik ilituqhaiyaangat atuqtauyukhaliqtun talvuuna ayungnautiqaqtunik aulayukhaliqaqtuq; imaalu 
  • Naunaittiaqhimayukhat maligakharnik tuhaqtitiyaangat ayungnautiginiaqtunik havagviinun, munariyakhagiaqaqtun ihuagiyaungitunik ilituqhaiyaangatlu kangiqhidjutikharnik, piqaqtukhauliqtun. 

2. Ihuagiyaungitun ihuiguhuktunik naunairutiqaqtukhaq ilauyukharlu talvani munarhitkuni; 

3. Ihivriuqtauyukhauliqtuq talvuuna huiqvianga biipiinuam Makibi; 

4. Havaktuliqiyikkut atuqtakhaingit munarhitkuni aviktuqvingnilu afisiani ihivriuqtaufaaqtukhat ikikliyumiqtitiyaanganik havaaqaqyuaqtunun munarhinik, katitiqtuilutiklu ayuittiarutingnik nunalaani pidjutikhainun; 

5. Munarhiit havaktiit piyukhautiqaqtukhat ihuaqtumik pitquhiliqinikkut havaamingni kangikhidjiutikharnik, ikaakniugaluaqtitigun, havaqatigilugitlu allat munarhiit atautikkut, tunilutiklu angirutikharnik tuyuqtaugiaqaqtunik naunairutingnik talvani Titiqiqidjutiliqiyunik Munarhingit Katimaviani talvanga NT-mi/NU-milu (RNANT/NU) talvuuna kinguliuyunik ilitquhingit aulayutlu ihuagiyaungitun/paqidjutigiyauniaqtunlu nalvaaqhiyuniklu naunaiyagiikhimayut; 

6. Tamna hilataanin ihivriudjutikhaq ilitagidjutikhaq, unalu GN-kut kiudjutikharnik atautimun, nunalaanunlu tuhaqtitauyukhaq havagviit havaktunik upautigiaktaingit katimaqatigiyaanganik nunalaani ilauyunik ilituqhaiyaangat uqaqqatigiyaangatlu ilitugidjutikhaq inigiikhimayuq atuquyauhimayuniklu.