ᓄᓇᕘᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓇᓱᐊᕈᓯᕆᔭᐅᓂᐊᖅᑐᖅ ᐊᐃᕆᓕ 23-ᒥᑦ 27-ᒨᖓᑎᑕᐅᖕᒪᑦ, ᐊᒻᒪᓗ ᐱᕕᖃᕐᕕᐅᓂᐊᖅᐳᖅ ᐃᓕᓐᓂᐊᖅᑏᑦ ᑎᓕᐅᖅᑕᐅᓗᑎᒃ ᖁᔭᓕᖁᔭᐅᓂᐊᕐᒪᑕ ᐃᓕᓴᐃᔨᐅᔪᓂᒃ ᐊᒃᓱᕈᖅᖢᑎᒃ ᐱᓕᕆᖃᑦᑕᕐᓂᖏᓐᓄᑦ. ᐃᓕᓐᓂᐊᖅᑎᑦᑎᕕᐅᔪᓐᓇᕐᓂᐊᕐᒪᓪᓗ ᓄᓇᕗᒻᒥᐅᓄᑦ ᐃᓕᓐᓂᐊᕐᓂᓕᕆᓂᕐᒨᖓᔪᓂᒃ.

ᑕᒪᑐᒪᓂ ᐊᕐᕌᒎᔪᒥ ᑕᐃᓂᕆᓂᐊᖅᑕᖓ ᐃᒪᐃᓕᖓᕗᖅ ᓇᓂᑐᐃᓐᓇᖅ ᐃᓕᑦᑎᕙᓪᓕᐊᓐᓇᖅᐳᖅ. ᐃᓕᓐᓂᐊᖅᑏᑦ ᖁᕕᐊᓱᒡᓗᑎᒃ ᖁᕕᐊᓲᑎᖃᖁᒐᑦᑎᒍ ᑕᒪᑐᒥᖓ ᐱᒻᒪᕆᐅᔪᒥᒃ ᐱᓇᓱᐊᕈᓯᕐᒥᒃ ᐊᐱᕆᖃᑦᑕᕐᓗᑎᒍ ᖃᓄᖅ ᑭᐅᖃᑦᑕᕋᔭᕐᒪᖔᑕ ᐊᔾᔨᒌᙱᕈᓘᔭᖅᑐᑦ ᐃᓕᓐᓂᐊᕐᓂᓕᕆᓂᕐᒨᖓᔪᑦ ᖃᓄᐃᓕᐅᕈᑕᐅᓲᑦ ᒥᒃᓵᓄᑦ ᓄᓇᕘᒥ.

ᐃᓕᓐᓂᐊᖅᑐᓕᕆᔨᒃᑯᑦ ᑐᙵᓱᒃᑎᑦᑎᕗᑦ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᐅᔪᓂ ᓄᓇᕘᒥ ᓴᖅᑭᑦᑎᖁᔨᓪᓗᑎᒃ ᓇᐃᓈᖅᓯᒪᔪᒥᒃ ᑖᕆᔭᐅᑎᓕᐅᕐᓗᑎᒃ ᐃᑲᔪᖅᑐᐃᔪᓂᒃ ᓇᓂᑐᐃᓐᓇᖅ ᐃᓕᑦᑎᕙᓪᓕᐊᓐᓇᖅᐴᒨᖅᓯᒪᔪᒧᑦ. ᐃᓱᓕᕝᕕᒃᓴᐅᑖ ᑐᓂᓯᓯᒪᔭᕆᐊᖃᕐᓂᕐᒧᑦ ᒪᐃ 18, 2012-ᖑᕗᖅ. ᑖᕐᕆᔮᓕᐊᕆᔭᐅᔪᑦ ᐃᒪᓐᓇ ᐊᑯᓂᐅᑎᒋᔭᕆᐊᖃᖅᑐᑦ 2 ᐅᕝᕙᓘᓐᓃᑦ 3 ᒥᓂᑦᔅ-ᒥᒃ ᑕᑭᑎᒋᔭᕆᐊᓖᑦ, ᐃᓚᒌᒃᑕᖅᑐᓪᓗ ᐱᖓᓱᑦ ᐅᖓᑖᓃᑦᑕᕆᐊᖃᙱᖢᑎᒃ. ᑎᓕᐅᖅᐸᕗᑦ ᐃᓕᓐᓂᐊᖅᑏᑦ ᓵᙵᖁᓪᓗᒋᑦ ᐃᓕᑦᑎᕙᓪᓕᐊᓂᕐᒧᑦ ᐊᕙᓗᒋᔭᐅᔪᓂᒃ ᐊᒻᒪᓗ ᐃᓕᓴᐃᔩᑦ ᐃᑲᔪᖅᑐᐃᓲᑦ ᐃᓕᓐᓂᐊᕐᓂᕐᒨᓕᖓᔪᓂᒃ ᓄᓇᓕᖏᓐᓂ.

ᐃᓕᓐᓂᐊᕐᓂᓕᕆᓂᕐᒧᑦ ᐱᓇᓱᐊᕈᓯᖅ 2012 ᐃᓕᓐᓂᐊᖅᑎᓂᒃ ᐃᒪᐃᓕᐅᕐᕕᐅᔪᓐᓇᕐᓂᐊᕐᒪᑦ ᓴᖅᑭᑦᑎᓗᑎᒃ ᓴᓇᑐᓕᔪᓐᓇᕐᓂᕐᒥᒃ. ᑖᕆᔭᐅᓯᐊᖑᔪᑦ ᑕᑯᒃᓴᐅᑎᑦᑎᓂᐊᕐᒪᑕ ᐊᔾᔨᒌᙱᑦᑐᓂᒃ ᐃᓕᑦᑎᕙᓪᓕᐊᓂᐅᔪᓐᓇᖅᑐᓂᒃ ᓄᓇᕘᒥ, ᑕᐃᒪᓐᓇᓗ ᐃᓱᒪᒋᔭᖃᑦᑎᐊᕈᓐᓇᕐᓂᒧᑦ ᖃᓄᐃᓕᐅᕈᓯᖅᑎᒍᑦ ᐱᕚᓪᓕᖅᑎᑦᑎᓂᐅᓂᐊᕐᒪᑕ ᐃᓄᒃᑎᑑᕐᓂᕐᒥᒃ ᐊᒻᒪᓗ ᐃᓕᖅᑯᓯᕐᒧᑦ, ᐊᒃᓱᕉᑎᖃᕐᑎᓪᓗᒋᑦ ᐃᓕᓐᓂᐊᕐᓂᕐᒧᑦ ᐱᓕᕆᑦᑎᐊᕐᓂᕐᒥᒃ.

ᐊᑎᖏᑦ ᐃᓕᓐᓂᐊᖅᑎᓕᒫᑦ ᐃᓚᐅᔪᑦ ᑖᕆᔭᐅᓯᐅᕐᓂᕐᒧᑦ ᐱᓕᕆᐊᖑᓚᐅᑲᒃᑐᒧᑦ ᐊᒧᔭᐅᔪᒃᓴᐅᑎᑕᐅᓂᐊᕐᒪᑕ ᐊᒻᒪᓗ ᐊᒧᔭᐅᔪᑦ 15-ᖑᔪᑦ ᐃᓕᓐᓂᐊᖅᑏᑦ ᐱᑖᖅᑎᑕᐅᓂᐊᖅᖢᑎᒃ Blackberry PlayBook-ᓂᒃ ᐊᓯᖏᓐᓂᒡᓗ ᑐᓐᓂᖅᑯᑕᐅᔪᒃᓴᓂᒃ.

ᐊᔾᔨᓕᐊᖑᔪᓗᒃᑖᑦ ᑐᓐᓂᖅᑯᑕᐅᔪᑦ ᐊᑐᖅᑕᐅᓂᐊᖅᑐᑦ ᐊᑕᐅᓯᙳᖅᑎᑕᐅᓗᑎᒃ ᑕᕐᕆᔮᒃᓴᐅᓕᖅᑎᑕᐅᓗᑎᒃ ᐃᒪᐃᑎᑦᑎᓂᐊᕐᒪᑕ ᐱᕚᓪᓕᖅᑎᑦᑎᓗᑎᒃ ᐃᓕᓐᓂᐊᕐᓂᕐᒨᖓᔪᓂᒃ ᓄᓇᕘᒥ.

ᓂᕆᐅᒃᐳᒍᑦ ᐱᓕᕆᐊᖑᓯᒪᓂᐊᖅᑐᓂᒃ ᐊᒻᒪᓗ ᓴᓇᑐᓕᔭᐅᓯᒪᔪᑦ ᐊᒃᓱᕉᑕᐅᓪᓗᑎᒃ ᖁᕕᐊᓲᑎᖃᕐᓂᐊᖅᑎᓪᓗᑕ ᐃᓕᑦᑎᕙᓪᓕᐊᓂᕐᒥᒃ ᓄᓇᕘᒥ!

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᕙᒃᑐᑦ

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᕙᒃᑐᑦ (SSEEP) ᐱᕕᒃᓴᖃᖅᑎᑦᑎᕙᒃᐳᑦ ᐊᖓᔪᒃᖠᓂ ᐃᓕᓐᓂᐊᖅᑎᓂᒃ, ᓯᓚᑦᑐᖅᓴᕐᕕᖕᒥ ᓯᓚᑦᑐᖅᓴᕐᕕᒡᔪᐊᕐᒥᓪᓘᓐᓃᑦ ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓚᐅᑲᒍᓐᓇᖅᑎᑦᑎᕙᒃᖢᑎᒃ ᐊᐅᔭᒃᑯᑦ ᐃᓕᓐᓂᐊᙱᑎᓪᓗᒋᑦ. ᐃᖅᑲᓇᐃᔭᖅᑎᑦᑎᖃᑦᑕᖅᐳᑦ ᓄᓇᕗᒻᒥ ᐃᓕᓐᓂᐊᖅᑏᑦ ᐱᓕᕆᔪᓐᓇᖅᓯᕙᓪᓕᐊᖁᓪᓗᒋᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ.

ᐱᓇᔪᒍᓐᓇᕐᓂᐊᕐᓗᓂ, ᐃᓕᓐᓂᐊᖅᑎ ᓄᓇᕗᒻᒥᐅᑕᐅᔭᕆᐊᖃᖅᐳᖅ ᐊᖓᔪᒃᖠᓂ ᐃᓕᓐᓂᐊᖅᑎᐅᓗᓂ (ᐊᔪᙱᓐᓂᓕᖕᒥ 10-ᒥᑦ 12-ᒧᑦ), ᓯᓚᑦᑐᖅᓴᕐᕕᖕᒥ ᓯᓚᑦᑐᖅᓴᕐᕕᒡᔪᐊᕐᒥᓘᓐᓃᑦ. ᐃᑲᔪᖅᑐᐃᓪᓗᑎᒃ ᐃᓚᖓᓂ 23-ᒦᑦᑐᒥᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥ, ᓄᓇᕗᒻᒥ ᓄᓇᑖᖃᑕᐅᓯᒪᔪᑦ ᐃᓕᓐᓂᐊᖅᑎᑦ ᐃᖅᑲᓇᐃᔭᖅᑎᒃᓴᖅᓯᐅᖅᑎᓂᒃ ᓯᕗᓪᓕᖅᐸᐅᔾᔭᐅᓂᕐᒧᑦ ᐃᓱᒪᒃᓴᖅᓯᐅᕈᑕᐅᖃᑦᑕᕐᓂᐊᖅᐳᑦ.

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᕙᒃᑐᓄᑦ ᐱᓇᔪᒍᒪᒍᕕᑦ, ᐅᕗᖓ ᑕᑯᒋᐊᕐᓗᑎᑦ Student Program, ᑕᑕᑎᕆᐊᓕᒃ ᑎᑎᕋᓚᐅᕐᓗᒍ, ᐃᖅᑲᓇᐃᔮᖅᑖᕋᓲᑎᖕᓄᑦ ᐃᓚᓕᐅᑎᓗᒍ, ᐃᖅᑲᓇᐃᔭᖅᑐᓕᕆᔨᒃᑯᓐᓄᓪᓗ ᓇᒃᓯᐅᑎᓗᒍ. ᐃᓕᓐᓂᐊᕐᕕᖕᒥ ᐊᑎᓕᐅᖅᑕᐅᓯᒪᖃᑕᐅᓂᕐᓂ ᓇᓗᓇᐃᖅᓯᔾᔪᑎᒥᒃ ᐱᔭᕆᐊᖃᕐᓂᐊᖅᑐᑦ.

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᕙᒃᑐᑦ ᐊᐃᕆᓕ-ᒥ ᐱᒋᐊᖃᑦᑕᖅᐳᖅ ᓯᑎᐱᕆ-ᒧᑦ ᑎᑭᖦᖢᒍ. 2011-ᒥᑦ, ᑲᑎᖦᖢᒋᑦ 132-ᖑᓚᐅᖅᐳᑦ ᐃᓕᓐᓂᐊᖅᑎᑦ ᐃᖅᑲᓇᐃᔭᖅᑎᑕᐅᔪᑦ.

ᓄᓇᓕᖕᒥ ᓴᓂᕆᐊᖃᕐᓂᕐᒧᑦ ᐊᑭᓐᓇᕐᒥᐅᑕᓂᒃ ᒪᓂᓴᐃᔪᑎᑦ

ᓄᓇᕘᒥ ᐊᕐᕌᒍᑕᒫᑦ ᓄᓇᓕᖕᓂ ᓴᓂᕐᓂᖅ ᑕᐃᑲᑦᑎᐊᖑᓕᕐᒥᖕᒪᑦ, ᐊᒻᒪᓗ ᐃᓕᓐᓂᐊᖅᑏᑦ ᖃᔅᓯᑐᐃᓐᓇᕐᓂᒃ ᐅᑭᐅᖃᕋᓗᐊᖅᐸᑕ ᑐᙵᓱᒃᑎᑕᐅᕗᑦ ᑐᓂᓯᖁᔭᐅᓪᓗᑎᒃ ᐊᑭᓐᓇᕐᒥᐅᑕᕐᒥᒃ ᑎᑎᕋᖅᓯᒪᔪᓂᒃ ᐅᔾᔨᕈᓱᓕᖅᑎᑦᑎᕚᓕᕐᓂᕐᒧᑦ ᓄᓇᓕᖕᓂ ᓴᓂᕆᐊᖃᕐᓂᕐᒧᑦ ᐱᓕᕆᓂᐅᓇᔭᖅᑐᓄᑦ ᓄᓇᕘᒥ.

“ᐱᒻᒪᕆᐅᕗᖅ ᐃᓚᐅᑎᑦᑎᓗᓂ ᒪᒃᑯᒃᑐᖁᑎᑦᑎᓐᓂᒃ ᖃᓄᐃᓕᐅᖅᑐᓂ ᐅᔾᔨᕈᓱᓕᖅᑎᑦᑎᓂᕐᒧᑦ ᐊᕙᑎᑦᑎᓐᓂᒃ ᑲᒪᑦᓯᐊᕐᓂᕐᒧᑦ ᐱᔭᕆᐊᓕᖕᓂᒃ, ᐅᕝᕙᓘᓐᓃᑦ ᐊᕙᑎᒥᒃ ᑲᒪᔨᐅᓂᕐᒧᑦ,” ᐅᖃᖅᑐᖅ ᒪᓕᒐᓕᐅᖅᑎ ᔭᐃᒥᓯ ᐋᕆᐊᒃ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ. “ᐊᑭᓐᓇᕐᒥᐅᑕᖅ ᑎᑎᕋᖅᓯᒪᔪᖅ ᒪᓂᓴᐃᔾᔪᑎ ᐱᕕᖃᖅᑎᑦᑎᓇᔭᕐᒪᑦ ᒪᒃᑯᒃᑐᓂᑦ ᖃᐅᔨᑎᑕᐅᓗᑕ ᖃᓄᖅ ᐱᐅᓱᒃᑯᓲᑎᔾᔪᑎᖃᕈᓐᓇᕐᒪᖔᑦᑕ ᓄᓇᓕᑦᑎᓐᓂᒃ ᑕᑯᒃᓴᐅᔪᒃᑯᑦ, ᐃᓱᒪᒋᓯᒪᔭᖏᑦᑎᒍᑦ, ᖃᓄᖅ ᓄᓇᓕᒃ ᓴᓗᒪᔪᖅ ᑐᑭᖃᕐᓂᖓᓂᒃ.”

ᐊᑭᓐᓇᕐᒥᐅᑕᖅ ᒪᓂᓴᐃᔾᔪᑎᒧᑦ ᑎᑎᕋᖅᓯᒪᔭᕆᐊᖃᖅᑕᖏᓐᓄᑦ ᒪᓕᒋᐊᓖᑦ:

• ᐋᖅᑭᒃᓯᒪᓂᖓ ᐃᒪᓐᓇ 8.5” x 11” ᐊᒃᑎᒋᔭᕆᐊᖃᖅᑐᖅ ᐸᐃᑉᐹᖅ;


• ᑕᑯᒃᓴᐅᑦᑎᐊᖅᑐᓂᒃ ᑕᖅᓯᖅᓱᐃᔾᔪᑎᖃᖁᔭᐅᔪᑦ;


• ᐋᖅᑭᒃᓯᒪᓂᖓ ᐃᒪᐃᓕᖓᓗᓂ ᖁᓛᓃᖅᐸᓯᖕᓂᖓ ᑎᑎᕋᕐᕕᒋᓂᐊᖅᑕᑉ ᑎᑎᖅᑲᖃᕆᐊᖃᕐᓂᐊᕐᒪᑦ ᓴᓂᕐᓂᕐᒧᑦ ᑎᑎᖅᑲᕆᓂᐊᖅᑕᖏᑕ ᐃᓂᒋᓂᐊᖅᑕᖏᓐᓂᒃ;


• ᐃᓚᐅᑎᑕᐅᓂᐊᖅᑐᓕᒫᑦ ᑐᓐᓂᖅᑯᑕᐅᔭᕆᐊᓖᑦ ᖃᕋᓴᐅᔭᒃᑰᖅᑎᑕᐅᓗᑎᒃ. ᐊᔾᔨᓕᐅᖅᓯᔾᔪᑎᒥᒃ ᐱᑐᐃᓐᓇᖅᑕᖃᙱᑉᐸᑦ, ᖃᐅᔨᑎᓪᓗᒍ ᔭᐃᒥᓰ ᒨᓪᑕᓐ ᐅᕗᖓ jmoulton@gov.nu.ca ᐃᑲᔪᖅᑕᐅᔪᒪᓗᑎᑦ;


• ᑐᓐᓂᖅᑯᑕᐅᔪᓗᒃᑖᑦ ᐱᒋᔭᐅᓕᕐᓂᐊᖅᑐᑦ ᓄᓇᕘᒥ ᒐᕙᒪᒃᑯᓐᓂᑦ.

ᐃᓚᐅᔾᔪᑕᐅᔪᑦ ᐃᕐᙲᓐᓇᖅᑕᐅᒃᑯᑦ ᑐᓐᓂᖅᑯᑕᐅᔭᕆᐊᓖᑦ ᐅᕗᖓ greenup@gov.nu.ca ᐃᓱᓕᕝᕕᒃᓴᐅᑖ ᒪᓕᒡᓗᒍ – ᐅᓪᓗᑐᐃᓐᓇᖅ, ᒪᐃ 18, 2012 ᐅᓪᓗᕈᒻᒥᓴᕐᕕᖕᒧᑦ. ᐃᓚᐅᑎᑕᐅᔪᒪᓂᕐᒧᑦ ᑐᓐᓂᖅᑯᑕᐅᔪᑦ ᑖᔅᓱᒪ ᐃᓱᓕᕝᕕᒃᓴᐅᑖ ᖄᖏᖅᑎᓪᓗᒍ ᐃᓱᒪᒋᔭᐅᔾᔮᙱᑦᑐᑦ.

ᓵᓚᒃᓴᐅᑕᐅᔪᖅ ᐋᕿᒃᑕᐅᓯᒪᔪᖅ ᓂᕈᐊᖅᑕᐅᓂᐊᖅᑐᖅ ᐊᕙᑎᓕᕆᓂᕐᒧᑦ ᖃᐅᔨᒪᔨᑕᒻᒪᕆᖕᓂᑦ ᑖᒃᑯᐊᓗ ᓂᕈᐊᕐᓂᐊᖅᖢᑎᒃ ᐋᕿᒃᑕᐅᓯᒪᔪᒥᒃ ᐊᒃᑐᐊᓂᖃᓛᖑᔪᒥᒃ ᑕᐃᒎᓯᕆᑎᑕᐅᔪᒧᑦ ᐊᕐᕌᒍᒥ – ᐆᒻᒪᖅᑯᑎᓅᖅᑐᓂᒃ ᐊᑐᙱᖔᕐᓗᓂ ᑭᓯᐊᓂᓕ ᓄᓇᒦᖔᕐᓗᓂ. ᐃᓕᓐᓂᐊᖅᑎ ᓵᓚᒃᓴᖅᑐᖅ ᐋᕿᒃᓯᒪᔭᖓᓄᑦ ᐃᒪᐃᑦᑐᖅᑖᕐᓂᐊᖅᑐᖅ Voltaic ᓴᙱᒃᑎᓴᐃᔪᑎᓕᒃ ᐅᐊᔭᒨᕆᐊᓕᖕᓂᒃ ᓇᖕᒪᒑᖅ, ᐊᒥᓱᓂᒃ ᓴᙱᒃᑎᓴᐃᔪᓐᓇᖅᑐᖅ ᑎᒍᒥᐊᕆᐊᓕᖕᓂᒃ ᖃᕋᓴᐅᔭᕐᒨᕆᐊᖃᓲᓄᑦ. ᑐᑭᓯᒋᐊᒃᑲᓐᓂᕈᒪᓗᓂ ᓇᖕᒪᒑᑉ ᒥᒃᓵᓄᑦ, ᐅᕗᖓ ᖃᐅᔨᒋᐊᕈᓐᓇᖅᑐᑦ: www.voltaicsystems.com/converter.shtml.

ᐅᔾᔨᕐᓇᖅᓯᑎᒃᑲᓐᓂᕆᐊᕐᓗᒍ ᐊᒻᒪᓗ ᐱᔾᔪᑎᒋᓪᓗᐊᑕᖅᑕᖏᑦ ᐱᕙᓪᓕᐊᓂᐅᓇᔭᖅᑐᑦ ᕿᑎᖅᖡᑦ ᐃᓕᓐᓂᐊᕐᕕᖓᓐᓂ ᑲᔪᓯᔭᕆᐊᓖᑦ ᐃᓕᓐᓂᐊᕐᓂᓕᕆᓂᕐᒨᖓᔪᑦ

ᐊᔾᔨᙳᐊᒦᑦᑐᑦ, ᓴᐅᒥᒻᒥᒃ ᑕᓕᖅᐱᒻᒧᑦ: ᒪᐃᑯᓪ ᓲᓪᑕᐃᔅ, ᐊᖏᔪᖅᑳᖅ, ᓄᓇᕗᑦ ᓯᓚᑦᑐᓴᕐᕕᒃ; ᔨᒻ ᓚᒋ, ᐃᒃᓯᕙᐅᑕᐅᖃᑎ, ᐊᐅᓚᑦᓯᔨ: ᓄᓇᕗᒻᒥ ᐃᓕᓐᓂᐊᖅᑎᑦᓯᔨᑦᓴᐅᓂᕐᒧᑦ ᐃᓕᓐᓂᐊᕈᑎ; ᒪᐃᒃ ᒪᒃᐃᓐᑕᐃᐅ, ᕿᑎᕐᒥᐅᑦ ᑭᒡᒐᑐᖅᑎᖓ; ᓈᓐᓯ ᒪᒃᐸ, ᑭᕙᓪᓕᕐᒥ ᑭᒡᒐᑐᖅᑎ; ᑐᕇᓇ ᓴᓗᕆᓇ, ᕿᑎᕐᒥᐅᑦ ᑭᒡᒐᑐᖅᑎᖓ; ᐳᓃᑕ ᑕᑯ, ᐃᒃᓯᕙᐅᑕᐅᖃᑎ, ᐃᓕᓐᓂᐊᖅᑎᑦᓯᒍᑎᑦᓴᓕᐅᕐᓂᕐᒧᑦ ᐃᓕᓐᓂᐊᕐᕕᓐᓄᓪᓗ ᐱᔨᑦᓯᕋᐅᑎᓄᑦ; ᐄᓐᔅᓕ ᕼᐊᓐᑦ, ᓄᓇᕗᒻᒥ ᐃᓕᓐᓂᐊᖅᑎᑦᓯᔨᑦᓴᐅᓂᕐᒧᑦ ᐃᓕᓐᓂᐊᕈᑎ; ᐊᒻᒪᓗ ᕼᐃᐊᑐ ᑳᒻᐳᓪ, ᓄᓇᕗᒻᒥ ᐃᓕᓐᓂᐊᖅᑎᑦᓯᔩᑦ ᑲᑐᔾᔨᖃᑎᒌᖏᑦ. ᑕᕝᕙᓃᙱᑦᑐᑦ: ᔫᓕ ᒪᑦᔅᓇᐃᒃ, ᕆᔭᐃᓇᒥ ᓯᓚᑦᑐᓴᕐᕕᔾᔪᐊᖅ ᐊᒻᒪᓗ ᑎᓃᔅ ᑰᐳ, ᑭᕙᓪᓕᕐᒥ ᑭᒡᒐᑐᖅᑎ. ᐳᕋᐃᐊᓐ ᒫᓂᖕ, ᓄᓇᕗᒻᒥ ᐃᓕᓐᓂᐊᖅᑎᑦᓯᔨᑦᓴᐅᓂᕐᒧᑦ ᐃᓕᓐᓂᐊᕈᑎ.

ᑕᕝᕙᓂ ᐃᓕᓐᓂᐊᕐᓇᐅᑉ ᐊᕐᕌᒍᖓᓂ, ᐊᔭᐅᖅᑐᐃᒋᐊᖅᓯᒪᔪᒍᑦ ᐱᒻᒪᕆᐅᑎᑦᓯᓯᒪᓪᓗᑕᓗ ᐋᖅᑭᑦᓱᐃᕙᓪᓕᐊᓂᕐᒧᑦ ᕿᑎᐊᓃᑦᑐᑦ ᐃᓕᓐᓂᐊᕐᕖᑦ ᐃᓕᓐᓂᐊᖅᑐᓕᕆᓂᕐᒧᑦ ᐊᐅᓚᑕᐅᓂᖏᓐᓂᒃ.

ᐱᔾᔪᑎᖃᖅᑐᖅ ᐋᖅᑭᑦᓱᐃᒍᒪᓪᓗᑕ ᐱᓕᕆᐊᒥᒃ ᐅᐸᓗᖓᐃᔭᕈᑕᐅᓂᐊᖅᑐᒥᒃ ᐃᓕᓐᓂᐊᖅᑎᑦᓯᔨᓄᑦ ᖁᑦᑎᓂᓖᑦ 7-ᒥᒃ 9-ᒧᑦ ᓄᓇᕗᒻᒥ ᐃᓕᓐᓂᐊᕐᕕᖏᓐᓂ. ᑲᑎᒪᔨᕋᓛᓂᒃ ᓴᖅᑭᖅᑕᐅᔪᖃᖅᓯᒪᓕᖅᑐᖅ ᖃᐅᔨᓴᕐᓂᐊᖅᑐᓂᒃ ᐋᖅᑭᑦᓱᐃᓂᐊᖅᑐᓂᓪᓗ ᑐᑦᓯᕋᐅᑎᓂᒃ ᑲᑐᔾᔨᖃᑎᒌᑦᑎᐅᔪᓂᒃ ᑲᑎᒪᔨᕋᓛᓂᒃ (ᓄᓇᕗᑦ ᓯᓚᑦᑐᓴᕐᕕᒃ/ᐃᓕᓐᓂᐊᕐᓂᓕᕆᔨᒃᑯᑦ/ᕆᔭᐃᓇ ᓯᓚᑦᑐᓴᕐᕕᔾᔪᐊᖓᑦ). ᐃᓚᒋᔭᐅᓂᐊᖅᑐᑦ ᕿᑎᐊᓃᑦᑐᑦ ᐃᓕᓐᓂᐊᕐᕖᑦ ᑲᑎᒪᔨᕋᓛᖏᓐᓂ ᓂᕈᐊᖅᑕᐅᓚᐅᖅᑐᑦ ᐅᑯᓇᙵᑦ:

• ᓄᓇᕗᒻᒥ ᐃᓕᓐᓂᐊᖅᑎᑦᓯᔨᑦᓴᐅᓂᕐᒧᑦ ᐃᓕᓐᓂᐊᕈᑎ, ᓄᓇᕗᑦ ᓯᓚᑦᑐᓴᕐᕕᒃ


• ᐃᓕᓐᓂᐊᖅᑎᑦᓯᒍᑎᑦᓴᓕᐅᕐᓂᕐᒧᑦ ᐃᓕᓐᓂᐊᕐᕕᓐᓄᓪᓗ ᐱᔨᑦᓯᕋᖅᑏᑦ, ᐃᓕᓐᓂᐊᕐᓂᓕᕆᔨᒃᑯᑦ


• ᕆᔭᐃᓇ ᓯᓚᑦᑐᓴᕐᕕᔾᔪᖓᓂᒃ


• ᓄᓇᕗᒻᒥ ᐃᓕᓐᓂᐊᖅᑎᑦᔩᑦ ᑲᑐᔾᔨᖃᑎᒌᖏᓐᓂᒃ


• ᑭᕙᓪᓕᕐᒥ ᕿᑎᕐᒥᐅᓂᓗ ᐃᓕᓐᓂᐊᖅᑎᑦᓯᔩᑦ ᑭᒡᒐᑐᖅᑎᖏᑦ

ᒪᕐᕉᓐᓂᒃ ᐃᒃᓯᕙᐅᑕᖏᓐᓂᒃ ᑎᒃᑯᐊᖅᑕᐅᔪᖃᖅᓯᒪᔪᖅ ᐅᖃᖃᑎᒌᑦᑐᓂᒃ ᐅᖃᖅᑎᑦᓯᔨᐅᖃᑦᑕᕐᓂᐊᖅᑑᓐᓂᒃ: ᔨᒻ ᓚᒋ (ᐊᐅᓚᑦᓯᔨ, ᓄᓇᕗᒻᒥ ᐃᓕᓐᓂᐊᖅᑎᑦᓯᔨᑦᓴᐅᓂᕐᒧᑦ ᐃᓕᓐᓂᐊᕈᑎᖓᓂᒃ) ᐊᒻᒪᓗ ᐸᓃᑕ ᑕᑯ (ᕿᑎᐊᓃᑦᑐᓂᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᖅᑎᑦᓯᔨᓄᑦ ᐱᓕᒻᒪᑦᓴᐃᓂᕐᒧᑦ ᑐᑭᒧᐊᖅᑎᑦᓯᔨ ᐃᓕᓐᓂᐊᖅᑎᑦᓯᒍᑎᑦᓴᓕᐅᕐᓂᕐᒧᑦ ᐃᓕᓐᓂᐊᕐᕕᓐᓄᓪᓗ ᐱᔨᑦᓯᕋᐅᑎᓄᑦ). ᕿᑎᐊᓃᑦᑐᓄᑦ ᐃᓕᓐᓂᐊᕐᕕᓐᓄᑦ ᑲᑎᒪᔨᕋᓛᑦ ᑕᕝᕙᓂ ᐱᓇᓱᐊᕈᓯᕐᒥ ᑲᑎᒪᓂᐊᖅᑐᑦ ᐋᖅᑭᑦᓱᐃᒋᐊᒃᑲᓐᓂᕐᓗᑎᒃ ᑐᑦᓯᕋᐅᑎᓕᐊᒥᓂᕐᓂᒃ.

ᓂᕆᐅᑦᑐᒍᑦ ᑐᓴᕈᒥᓇᖅᑐᓂᒃ ᑲᑎᒪᓚᐅᖅᑎᓪᓗᒋᑦ ᑕᖅᑭᒐᓚᐅᓂᐊᖅᑐᓂ.

ᐋᖅᑭᐅᒪᔾᔪᑎᔅᓴᖃᖅᑐᒋᕕᑦ ᓄᓇᕗᑦ ᒐᕙᒪᒃᑯᓐᓄᑦ?

ᐊᑏ ᐋᖅᑭᐅᒪᔾᔪᑎᔅᓴᓐᓂᑦ ᐅᖃᐅᓯᖃᓚᐅᕆᑦ ᐱᐅᓯᕚᓪᓕᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑕ ᐃᖏᕐᕋᓂᕆᕙᑦᑕᖏᑦ.

ᐅᖃᐅᓯᕆᔭᑎᑦ ᐱᒻᒪᕆᐅᑎᒃᑲᑦᑎᒍ ᐃᓱᒪᖅᓴᖅᓯᐅᕈᑎᒋᓂᐊᖅᑐᑎᒍᓪᓗ ᐋᖅᑭᐅᒪᔾᔪᑎᔅᓴᐃᑦ ᐅᖃᐅᓯᕆᔭᑎᑦ ᐱᔨᑦᑎᖅᑎᐊᕈᒪᓐᓂᑎᓐᓄᑦ ᓄᓇᕗᒻᒥᐅᑕᕐᓄᑦ.

ᐋᖅᑭᐅᒪᔾᔪᑎᔅᓴᓂᑦ ᒪᕐᕉᓕᖅᑲᖓᔪᒃᑯᑦ ᑐᓂᓯᒍᓐᓇᖅᑐᑎᑦ. ᖃᕋᓴᐅᔭᒃᑯᑦ ᑐᔪᐃᓗᑎᑦ (ᐊᑏᑦ ᑕᑯᔅᓴᐅᒐᔭᖅᑐᑦ) ᑎᑎᖅᑲᓂᐊᕐᕕᒃᑯᑎᒍᑦ (ᐊᑏᑦ ᑕᑯᔅᓴᐅᒐᔭᖅᑐᖅ) ᐅᕗᖓ:

Solutions for Government of Nunavut
Department of Executive and Intergovernmental Affairs
PO Box 1000 Stn 200
Iqaluit, NU X0A 0H0

ᖁᔭᓐᓇᒦᒃ ᐃᑲᔪᕈᓐᓇᕋᕕᑦ ᐱᔨᑦᑎᑦᑎᐊᕋᓱᐊᖅᑎᓪᓗᑕ ᐃᓕᔅᓯᓐᓂ!