ᑐᙵᓱᒋᑦᑎ ᓄᓇᕗᑦ ᒐᕙᒪᒃᑯᖏᓐᓂ

ᒐᕙᒪᒃᑯᑦ ᐊᐅᓚᑦᑎᔨᖏᑦᑕ ᐋᖅᑭᐅᒪᓂᕆᔭᖏᑦ

ᐱᓕᕆᐊᒃᓴᕆᔭᐅᓪᓚᕆᒃᑐᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᑐᑭᓯᑎᑦᑎᔭᕆᐊᖃᕐᓂᖅ ᒐᕙᒪᒃᑯᑦ (ᒥᓂᔅᑕᒡᒍᑏᑦ) ᓯᕗᓪᓕᖅᐸᐅᑎᑦᑐᒪᔭᖏᓐᓂᒃ ᐊᒻᒪᓗ ᐃᓱᒪᓕᐅᕈᑎᒋᔭᖏᑦ ᖃᓄᖅᑑᕈᑎᒋᓗᒋᑦ. ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓴᖅᑭᑎᑦᑎᕙᒃᑐᑦ ᐊᑐᖅᑕᐅᔪᓐᓇᖅᑐᓂᒃ ᐃᓱᒪᒃᓴᖅᓯᐅᕈᑕᐅᔪᓐᓇᖅᑐᓂᒃ ᒥᓂᔅᑕᓄᑦ ᐊᒻᒪᓗ ᐊᑐᓕᖅᑎᕆᓂᖅ ᖃᓄᐃᓕᐅᕈᑕᐅᓂᐊᖅᑐᓂᒃ ᐃᓱᒪᓕᐅᕈᑕᐅᔪᒃᑯᑦ ᒥᓂᔅᑕᓄᑦ.

ᒐᕙᒪᓕᕆᓂᕆᕙᒃᑕᒃᑯᑦ, ᒥᓂᔅᑕᒡᒍᑏᑦ ᐱᔪᓐᓇᐅᑎᖃᖅᑐᑦ ᐃᓱᒪᓕᐅᕈᑎᖃᕈᓐᓇᕐᓂᕐᒧᑦ ᐅᑉᓗᑕᒫᒃᑯᑦ ᒐᕙᒪᒃᑯᓐᓅᖓᔪᓂᒃ. ᒥᓂᔅᑕᒡᒍᑏᑦ ᒪᓕᒐᓕᕆᓂᕐᒧᑦ ᑲᑎᒪᔾᔪᑎᓂᒃ ᐋᖅᑭᒃᓯᕙᒃᑐᑦ, ᐋᖅᑭᒃᓱᐃᕙᒃᑐᑦ ᒐᕙᒪᒃᑯᑦ ᓯᕗᓪᓕᖅᐸᐅᑎᑦᑐᒪᔭᖏᓐᓂᒃ, ᓇᓗᓇᐃᔭᐃᕙᒃᑐᑦ ᒪᓕᒐᑎᒍᑦ ᐋᖅᑭᐅᒪᓂᕆᔭᐅᓂᐊᖅᑐᓂᒃ ᐊᒻᒪᓗ ᐊᑐᓕᖁᔨᕙᒃᑐᑦ ᑐᕌᒐᕆᔭᐅᓂᐊᖅᑐᓂᒃ ᐊᒻᒪᓗ ᑮᓇᐅᔭᕆᔭᐅᓂᐊᖅᑐᓂᒃ ᐊᑐᓂ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓄᑦ. ᒥᓂᔅᑕᒡᒍᑏᑦ ᓂᕈᐊᖅᑕᐅᕙᒃᑐᑦ ᒪᓕᒐᓕᐅᖅᑎᓄᑦ; ᓯᕗᓕᖅᑎ ᐱᓕᕆᐊᒃᓴᖅᑖᖅᑎᑦᑎᕙᒃᑐᖅ ᒥᓂᔅᑕᓂᒃ ᑲᒪᔨᐅᖁᑉᓗᒋᑦ ᐃᖅᑲᓇᐃᔭᕐᕕᖕᓂ. ᒥᓂᔅᑕᐅᔪᑦ ᑭᒡᒐᖅᑐᐃᕙᒃᑐᑦ ᐃᖅᑲᓇᐃᔭᕐᕕᖕᓂ ᒪᓕᒐᓕᐅᕐᕕᒃᑯᑦ ᐊᒻᒪᓗ ᓴᖅᑭᑎᑦᑎᕙᒃᑐᑦ ᒪᓕᒐᓂᒃ ᐱᔾᔪᑎᖃᖅᑐᓂᒃ ᐃᖅᑲᓇᐃᔭᕐᕕᖏᓐᓄᑦ ᐱᔭᕆᐊᓖᑦ ᒪᓕᒡᓗᒋᑦ. ᒥᓂᔅᑕᐅᔪᑦ ᑭᐅᓯᔭᕆᐊᖃᖅᐸᒃᑐᑦ ᒪᓕᒐᓕᐅᖅᑎᓄᑦ ᖃᓄᐃᓕᐅᕈᑎᒋᔭᖏᓐᓄᑦ ᐱᓕᕆᐊᖑᑎᓪᓗᒋᑦ ᑭᒡᒐᖅᑐᖅᑕᐅᓪᓗᑎᒃ ᐃᖅᑲᓇᐃᔭᕐᕕᖏᑦᑕ ᐃᖅᑲᓇᐃᔭᖅᑎᖏᓐᓄᑦ.

ᒥᓂᔅᑕᐅᑉ ᑐᖏᓕᖏᑦ ᑎᒃᑯᐊᖅᑕᐅᕙᒃᑐᑦ ᓯᕗᓕᖅᑎᒧᑦ. ᐱᓕᕆᖃᑎᖃᑦᑎᐊᖅᐸᒃᑐᑦ ᒥᓂᔅᑕᒥᓂᒃ ᐊᒻᒪᓗ ᑐᓴᖅᑎᑦᑎᕙᒃᖢᑎᒃ ᖃᓄᐃᓕᐅᕈᑕᐅᔪᒥᒃ ᐅᑉᓗᑕᒫᒃᑯᑦ. ᒥᓂᔅᐅᑉ ᑐᖏᓕᖏᑦ ᑲᒪᕙᒃᑐᑦ ᐱᔭᕆᐊᑐᔪᓂᒃ, ᐊᐅᓚᑦᑎᔾᔪᑎᓂᒃ, ᒪᓕᒐᓕᕆᔾᔪᑎᓂᒃ ᐊᒻᒪᓗ ᑮᓇᐅᔭᓕᕆᔾᔪᑎᓂᒃ ᐃᒪᓐᓈᖅᑐᐃᓪᓗᑎᒃ ᒥᓂᔅᑕᒧᑦ ᐊᒻᒪᓗ ᒪᓕᒐᓂᒃ ᐃᒃᐱᒍᓱᑦᑎᐊᕆᐊᖃᕐᓂᕋᖅᑕᐅᔪᑦ, ᒪᓕᒐᑎᒍᓪᓗ ᐅᔾᔨᖅᑐᑦᑎᐊᕆᐊᖃᖅᐸᒃᖢᑎᒃ. ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐃᒪᓐᓈᖅᑐᖅᑕᐅᕙᒃᑐᑦ ᒥᓂᔅᑕᐅᑉ ᑐᖏᓕᖓᓄᑦ, ᑕᐃᒪᐃᒻᒪᑦ ᑐᑭᒧᐊᒃᑎᑦᑎᔨᒋᔭᐅᕙᖕᒪᑕ ᐃᖅᑲᓇᐃᔭᕐᕕᖕᓄᑦ.

ᑭᐅᓯᔭᕆᐊᖃᖃᑦᑕᕐᒧᑦ ᐱᓕᕆᖃᑎᒌᒃᐸᒃᑐᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ, ᒥᓂᔅᑕᐅᔪᖅ, ᒥᓂᔅᑕᒡᒍᑏᑦ, ᓯᕗᓕᖅᑎ ᐊᒻᒪᓗ, ᑕᐃᑲᙵᑦ, ᐃᓄᖕᓄᑦ. ᐱᓕᕆᖃᑎᒌᖕᓂᕆᕙᒃᑕᖏᑦ ᐃᓱᒪᒃᓴᖅᓯᐅᕈᑕᐅᔭᕆᐊᖃᖅᐸᒃᑐᑦ ᐋᖅᑭᒃᓱᐃᓂᐊᕐᓗᑎᒃ ᐱᓕᕆᕝᕕᐅᑉ ᐃᓗᐊᓂ ᐊᐅᓚᑦᑎᔾᔪᑎᒋᓂᐊᖅᑕᖏᓐᓂᒃ ᒐᕙᒪᒃᑯᑎᒍᑦ. ᐃᐳᕆ 1999-ᒥ, ᒥᓂᔅᑕᒡᒍᑏᑦ ᐊᑐᓕᖅᑎᕆᓚᐅᖅᑐᑦ ᐋᖅᑭᐅᒪᓂᕆᔭᐅᓂᐊᖅᑐᒥ ᐱᓕᕆᐊᒃᓴᕆᔭᐅᔪᑦ ᐃᒪᓐᓈᖅᑐᖅᑕᐅᔪᓐᓇᖁᑉᓗᒋᑦ ᒐᕙᒪᒃᑯᑦ ᐊᖓᔪᖅᑳᒡᒍᑎᖏᓐᓄᑦ ᐊᐅᓚᑦᑎᓂᒃᑯᑦ ᐱᓕᕆᐊᒃᓴᖏᓐᓂᒃ.