ᐊᔪᕈᓐᓃᖅᓴᕐᓂᕐᒧᑦ ᐱᕙᓪᓕᐊᓂᕐᒧᓪᓗ ᐱᓕᕆᐊᖑᕙᒃᑐᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ
ᐱᓇᓱᐊᖅᑕᕗᑦ- ᑯᑎᒍᑦ , ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᖅᓯᓪᓚᑦᑖᒃᑲᓐᓂᖅᐳᑦ ᐱᓕᕆᒻᒪᕆᒍᒪᓂᑉᒥᓂᒃ ᐃᓕᑉᐸᓪᓕᐊᖏᓐᓇᕐᓂᖅ-ᒥᒃ - ᑲᔪᓯᐊᔪᒥᒃ ᐃᓕᑉᐸᓪᓕᐊᓂᕐᒥᒃ. ᐃᖅᑲᓇᐃᔭᕐᕕᒋᔭᐅᔪᓂ, ᑲᔪᓯᐊᖏᓐᓇᖅᑐᒥ ᐃᓕᑉᐸᓪᓕᐊᓂᖅ ᐱᕙᓪᓕᐊᓂᕆᔭᐅᔪᕐᓗ ᐃᖅᑲᓇᐃᔭᖅᑎᒋᔭᐅᔪᓂᒃ ᐱᕐᔪᐊᒻᒪᕆᐊᓘᕗᖅ ᐋᖅᑭᒃᓱᐃᓂᐊᕐᓗᓂ ᓴᙱᔪᒥᒃ ᐱᓕᕆᒻᒪᕆᒍᒪᓲᓂᒡᓗ ᑭᒃᑯᑐᐃᓐᓇᓄᑦ ᐱᔨᑦᑎᕋᖅᐸᖕᓂᕆᔭᐅᔪᒥᒃ ᑭᐅᔾᔪᑕᐅᔪᓐᓇᖅᑐᓂᒃ ᐱᔭᐅᔪᒪᕙᒃᑐᓄᑦ ᓄᓇᕗᒻᒥᐅᓄᑦ.
ᐃᖅᑲᓇᐃᔭᖅᑐᓕᕆᔨᒃᑯᑦ ᑲᒪᒋᔭᒃᓴᖃᖅᑎᑕᐅᕗᑦ ᖃᐅᔨᓴᕐᓂᕐᒥᒃ, ᑕᐅᑦᑐᖓᓂᒃ ᓴᓇᓂᕐᒥᒃ ᑲᔪᓯᑎᑦᑎᓂᕐᒥᒡᓗ ᐱᓕᕆᐊᖑᕙᒃᑐᓂᒃ ᑭᐅᔾᔪᑕᐅᔪᓂᒃ ᑭᒃᑯᑐᐃᓐᓇᓄᑦ ᐊᔪᕈᓐᓃᖅᓴᖅᑎᑦᑎᕙᖕᓂᕐᒧᑦ ᐱᔭᐅᔭᕆᐊᖃᖅᑐᓂᒃ ᓄᓇᕗᑦ ᒐᕙᒪᒃᑯᖏᓐᓂᓕᒫᖅ. ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᐊᖃᖅᐸᒃᑐᑦ ᐱᓕᕆᖃᑎᖃᖅᖢᑎᑦ ᑕᒪᐃᓐᓂᒃ ᐱᓕᕆᕝᕕᒋᔭᐅᔪᓂᒃ ᖃᐅᔨᒪᑦᑎᐊᕈᒪᒧᑦ ᑕᒪᒃᑯᐊ ᐃᖅᑲᓇᐃᔭᖅᑎᑦ ᒐᕙᒪᒃᑯᓐᓂᓕᒫᖅ ᒪᓂᒪᕝᕕᐅᖃᑦᑕᕋᓗᐊᕐᒪᖔᑕ ᐊᑐᕈᓐᓇᑦᑎᐊᖅᑐᓂᒃ, ᐱᐅᒻᒪᕆᒃᑐᓂᒃ ᐱᓕᕆᐊᖑᕙᒃᑐᓂᒃ.
ᐃᓕᖅᑯᓯᑐᖃᕆᔭᐅᕙᒃᑐᓄᑦ ᖃᐅᔨᒋᐊᖅᑎᑕᐅᒃᑲᓐᓂᕐᓂᖅ
ᖃᐅᔨᒋᐊᖅᑎᑕᐅᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᓄᕐᓗ ᐃᓄᐃᑦ ᖃᐅᔨᒪᔭᑐᖃᖏᑕ ᐃᓗᓕᖏᑦ ᐊᑐᖅᑕᐅᔪᓐᓇᕐᒪᖔᑕ ᐃᖅᑲᓇᐃᔭᕐᕕᒋᔭᐅᔪᓂ.
ᐃᖅᑲᓇᐃᔭᖅᑏᑦ ᖃᐅᔨᒋᐊᖅᑎᑕᐅᒃᑲᓐᓂᕐᓂᖏᓐᓄᑦ
ᑭᒃᑯᑐᐃᓐᓇᓄᑦ ᑐᓴᖅᑕᐅᔪᓐᓇᖅᑐᓄᑦ ᐱᓕᕆᖃᑎᒌᖕᓃᑦ ᓄᑖᓄᑦ ᐃᖅᑲᓇᐃᔭᖅᑎᓄᑦ ᐱᓕᕆᐊᖃᖅᖢᑎᒃ ᓲᕐᓗ ᒪᑯᓂᖓ ᖃᓄᐃᓕᐅᖅᑐᖃᖅᐸᓚᐅᕐᓂᖓᓄᑦ ᓄᓇᕗᒻᒥ ᐊᑎᖃᖅᑎᑕᐅᓪᓗᓂ, ᐱᓇᓱᐊᖅᑕᕗᑦ, ᐃᓗᓕᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕝᕕᒋᔭᖏᓐᓂᒃ ᖃᓄᕐᓗ ᐋᖅᑭᒃᓱᖅᓯᒪᓂᕆᔭᖏᓐᓂᒃ ᐊᓪᓕᕇᓕᖅᐸᓪᓕᐊᓂᕆᔭᖏᑦᑕ ᐊᑭᓕᖅᓱᖅᑕᐅᕙᖕᓂᕐᒧᓪᓗ ᐱᕚᓪᓕᕈᑕᐅᕙᒃᑐᓄᓪᓗ.
ᐃᓄᒃᑎᑐᑦ/ᐃᓄᐃᓐᓇᖅᑐᓐ ᐅᖃᐅᓯᕐᓄᑦ ᐊᔪᕈᓐᓃᖅᓴᕐᓂᖅ
ᐊᔾᔨᒌᙱᕈᓘᔭᖅᑐᑦ ᐱᓕᕆᐊᒃᓴᐃᑦ ᑭᐅᓯᔾᔪᑕᐅᓪᓗᑎᒃ ᑕᒪᐃᓐᓄᑦ ᓯᕗᓪᓕᕐᒥᒃ ᐊᐅᐸᕆᓪᓗᒍᓗ ᐅᖃᐅᓯᕆᓂᕐᒧᑦ ᐃᓕᓐᓂᐊᖅᐸᒃᑐᓄᑦ.
ᐊᔪᕈᓐᓃᖅᓴᕐᓂᕐᒧᑦ ᐱᕙᓪᓕᐊᓂᕐᒧᓪᓗ
ᐊᔪᕈᓐᓃᖅᓴᒐᒃᓴᐃᑦ, ᐱᓕᕆᖃᑎᒌᖕᓃᑦ ᐊᔪᕈᓐᓃᖅᓴᖃᑎᒌᖕᓃᓪᓗ ᐱᓕᕆᐊᖃᓪᓗᐊᑕᖅᐸᒃᑐᑦ ᐱᐅᓯᒋᐊᖅᑎᑦᑎᓂᕐᒥᒃ ᐃᖅᑲᓇᐃᔭᖅᑏᑦ ᖃᐅᔨᒪᓂᕆᔭᖏᓐᓂᒃ ᐊᔪᕈᓐᓃᖅᐸᒃᑕᖏᓐᓂᒡᓗ ᒪᑯᑎᒎᓇᖅ:
- ᐊᐅᓚᑦᑎᕙᖕᓂᕐᒧᑦ ᐱᓕᕆᐊᖑᕙᒃᑐᑦ
- ᑐᓴᐅᒪᑎᑦᑎᓂᕐᒧᑦ ᐊᔪᕈᓐᓃᖅᑕᐅᕙᒃᑐᑦ
- ᖃᕆᓴᐅᔭᓕᕆᓂᕐᒧᑦ
- ᑮᓇᐅᔭᓂᒃ ᐊᐅᓚᑦᑎᕙᖕᓂᕐᒧᑦ
- ᐃᖅᑲᓇᐃᔭᖅᑎᖃᕐᓂᕐᒧᑦ ᐊᐅᓚᑦᑎᕙᖕᓂᕐᒧᑦ
- ᓯᕗᓕᖅᑎᐅᓂᕐᒧᑦ ᐊᐅᓚᑦᑎᓂᕐᒧᓪᓗ
- ᓇᖕᒥᓂᖅ ᐱᕙᓪᓕᐊᑎᓐᓂᕐᒧᑦ
- ᐊᑐᐊᒐᓄᑦ
- ᐱᓕᕆᐊᖑᓚᐅᑲᒃᑐᓄᑦ/ᐱᓕᕆᐊᖑᔪᓄᑦ ᐊᐅᓚᑦᑎᓂᕐᒧᑦ
ᐱᓕᕆᖃᑎᖃᖅᖢᓂ ᐃᓕᑎᑦᑎᕙᓪᓕᐊᓂᕐᒧᑦ
ᐱᓕᕆᖃᑎᖃᖅᖢᓂ ᐃᓕᑎᑦᑎᕙᓪᓕᐊᓂᕐᒧᑦ ᒪᓕᒃᑕᐅᕙᒃᑐᑦ, ᐃᑲᔪᖅᑐᐃᓪᓗᑎᒃ ᐱᖁᑎᑦ ᐱᓕᕆᔾᔪᑕᐅᓇᔭᖅᑐᑦ ᐊᒻᒪᓗ ᐊᔪᕈᓐᓃᖅᓴᖃᑎᒌᖕᓂᖅ ᐋᖅᑭᒃᓱᖅᑕᐅᓯᒪᕗᑦ ᐃᖅᑲᓇᐃᔭᖅᑎᓄᑦ ᕿᓂᖅᑐᓄᑦ ᐱᓕᕆᖃᑎᒋᔭᐅᓗᑎᒃ ᐃᓕᑉᐸᓪᓕᐊᓇᔭᖅᑐᓄᑦ ᐊᒻᒪᓗ/ᐅᕝᕙᓘᓐᓃᑦ ᑕᒪᒃᑯᐊ ᐱᓕᕆᖃᑎᖃᕐᓗᑎᒃ ᐃᓕᑎᑦᑎᕙᓪᓕᐊᔪᒪᓇᔭᖅᑐᑦ.
ᓯᕗᓕᖅᑎᒃᓴᖅ ᐃᖅᑲᓇᐃᔭᖅᑎᙳᖅᐸᓪᓕᐊᓂᕐᒧᑦ ᐱᓕᕆᐊᖑᖃᑦᑕᖅᑐᖅ
ᑎᑎᕋᖅᓯᒪᔪᑦ 23 ᒪᓕᒃᖢᒋᑦ ᐅᑯᓇᓂ, ᓄᓇᕗᒻᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᓂ, ᓯᕗᓕᖅᑎᒃᓴᑦ ᐱᕕᒃᓴᖃᖅᑎᑦᑎᕙᒃᐳᖅ ᓄᓇᑖᖃᑕᐅᓯᒪᔪᓂᒃ ᐱᕙᓪᓕᐊᓇᔭᕐᓂᖏᓐᓂᒃ ᓯᕗᓕᖅᑎᐅᓂᕐᒧᑦ ᐃᓂᒋᔭᐅᓇᔭᖅᑐᓂᒃ ᓄᓇᕗᑦ ᒐᕙᒪᒃᑯᖏᓐᓂ – ᐅᑯᑎᒎᓇᖅ, ᑐᑭᒧᐊᖅᑎᑦᑎᔨᐅᓂᕐᒧᑦ, ᐊᐅᓚᑦᑎᔨᐅᓂᕐᒧᓪᓗ ᐱᓕᕆᐊᖑᕙᒃᑐᓂ. ᐃᖅᑲᓇᐃᔭᖅᑐᓕᕆᔨᒃᑯᑦ ᐃᑲᔪᖅᑐᐃᖃᑦᑕᖅᐳᑦ ᑲᑎ0ᖦᖢᒋᑦ 16-ᓂᒃ ᐃᖅᑲᓇᐃᔭᖅᑎᙳᖅᐸᓪᓕᐊᓂᕐᒧᑦ ᐃᓂᒋᔭᐅᔪᓂᒃ ᑕᕝᕙᓂ ᐱᓕᕆᓂᕆᔭᐅᔪᒥ. ᖃᐅᔨᒪᓕᖅᑎᑕᐅᕚᓪᓕᕐᓂᖅ, ᐋᖅᑭᒃᓱᐃᓂᖅ ᐃᓕᑉᐸᓪᓕᐊᓂᕐᒧᑦ ᐱᕙᒌᔭᕈᑕᐅᔪᓂᒃ, ᐃᖅᑲᓇᐃᔭᖅᑎᐅᓗᓂ ᐊᔪᕈᓐᓃᖅᓴᖅᐸᓪᓕᐊᓂᖅ, ᐱᓕᕆᖃᑎᖃᖅᖢᓂ ᐃᓕᑎᑦᑎᕙᓪᓕᐊᓂᖅ, ᐱᔭᕇᖅᓯᓂᖅ ᐅᖓᓯᒃᑐᒥᑦ ᐊᔪᕈᓐᓃᖅᓴᖅᑕᐅᕙᒃᑐᓂᒃ ᐃᓚᐅᕙᖕᓂᕐᓗ ᐃᒡᓗᕈᓯᕐᒦᖦᖢᓂ ᐊᔪᕈᓐᓃᖅᓴᕐᓂᖅ ᑕᒪᕐᒥᑦᑎᐊᖅ ᐱᕐᔪᐊᕌᓘᕗᑦ ᐃᓚᒋᔭᐅᓪᓗᑎᒃ ᑕᒪᑐᒧᖓ ᐱᓕᕆᐊᖑᖃᑦᑕᖅᑐᒧᑦ.
ᑕᒪᒃᑯᐊ ᐊᔪᕈᓐᓃᖅᓴᕐᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᐱᓕᕆᐊᖑᖃᑦᑕᖅᑐᑦ ᒫᓐᓇᒃᑯᑦ ᑮᓇᐅᔭᖃᖅᑎᑕᐅᖃᑦᑕᖅᑐᑦ ᐃᖅᑲᓇᐃᔭᖅᑐᓕᕆᔨᒃᑯᓐᓂᑦ ᒪᓂᒪᑎᑕᐅᖃᑦᑕᖅᐳᑦ ᑕᒪᐃᓐᓄᑦ ᐃᖅᑲᓇᐃᔭᖅᑎᓕᒫᓄᑦ (ᐱᔪᓐᓇᖅᑎᑕᐅᓂᖅ/ᑕᐃᒪᐃᑦᑐᓕᕆᓂᐊᕐᓗᓂ ᐊᔪᙱᑕᐅᔭᕆᐊᓖᑦ ᐊᑐᖅᑕᐅᑐᐃᓐᓇᕆᐊᖃᖅᐳᑦ ᓇᓕᐊᓐᓄᑐᐃᓐᓇᖅ ᐱᓕᕆᐊᒃᓴᐅᑎᑕᐅᖃᑦᑕᖅᑐᓄᑦ).
ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᐃᖅᑲᓇᐃᔭᖅᑏᑦ ᐃᓕᓴᖅᓯᓯᒪᕗᑦ ᐊᓯᔾᔨᖅᐸᓪᓕᐊᖏᓐᓇᐅᔭᖅᑐᒥ ᐆᒻᒪᓂᖃᑦᑎᐊᖅᑐᒥᓗ ᐊᕙᑎᒋᔭᐅᔪᒥᒃ ᓄᓇᕗᑦ ᒐᕙᒪᒃᑯᖏᑕ ᐃᓗᐊᓂ ᐱᓕᕆᐊᖃᒻᒪᕆᒃᖢᑎᒡᓗ ᐋᖅᑭᒃᓱᐃᕙᓪᓕᐊᓪᓗᑎᒃ ᖃᔅᓯᑲᓪᓚᖕᓂᒃ ᓄᑖᓂᒃ ᐱᒋᐊᖅᑕᐅᔪᓐᓇᖅᑐᓂᒃ ᑭᐅᔾᔪᑕᐅᓗᑎᒃ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᖑᔪᓪᓗ ᐱᔭᕆᐊᖃᖅᑕᖏᓐᓄᑦ ᒪᑯᓂᖓᓗ ᐃᓚᖃᕆᓪᓗᑎᒃ :
- ᐃᖅᑲᓇᐃᔮᖃᕐᓂᕐᒧᑦ ᐊᔪᕈᓐᓃᖅᓴᖅᑎᑕᐅᕙᖕᓂᕐᒧᑦ ᐱᓕᕆᐊᖑᕙᒃᑐᑦ
- ᓯᕗᓕᖅᑎᐅᓂᕐᒧᑦ ᐱᕙᓪᓕᐊᑎᑕᐅᓂᕐᒧᑦ
- ᐃᖅᑲᓇᐃᔭᕐᕕᒋᔭᐅᔪᓂ ᐊᖃᓕᒫᕈᓐᓇᕐᓂᕐᒧᑦ
- ᐃᖅᑲᓇᐃᔮᖃᕐᓂᕐᒧᑦ ᐱᕙᓪᓕᐊᑎᑕᐅᓂᕐᒧᑦ ᐱᔨᑦᑎᕋᖅᑕᐅᓃᑦ ᐃᖅᑲᓇᐃᔭᖅᑎᓄᑦ
ᑐᓴᖅᑕᖃᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᓗᒍ:
ᓰᓚ ᑯᓗᓚ
ᑐᑭᒧᐊᖅᑎᑦᑎᔨ, ᐊᔪᕈᓐᓃᖅᓴᖅᐸᖕᓂᕐᒧᑦ ᐱᕙᓪᓕᐊᕙᖕᓂᕐᒧᓪᓗ
ᐅᖄᓚᐅᑖ: 867-975-6283
ᓱᒃᑲᔪᒃᑯᑦ: 867-975-6245
|
