ᐃᓄᐃᑦ ᖃᐅᔨᒪᔭᑐᖃᖏᑦ
ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᖅᑯᓯᑐᖃᐅᕗᑦ ᐃᓄᐃᑦ ᖃᐅᔨᒪᓂᕆᓪᓗᓂᒋᑦ.
ᑖᔅᓱᒪ ᐱᓕᕆᕝᕕᒋᔭᐅᔫᑉ ᐱᓕᕆᐊᒃᓴᕆᕙᐅᒃ ᐃᓚᓕᐅᔾᔨᔭᕆᐊᖃᖅᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᑎᑦᑎᓂᐊᖅᑎᓪᓗᑕ ᐱᓕᕆᐊᒃᓴᖁᑎᑦᑎᓐᓂᒃ ᐱᔨᑦᑎᕋᕐᓂᕐᕆᕙᒃᑕᑦᑎᓐᓂᒡᓗ. ᐊᑐᐊᒐᕗᑦ ᐊᑐᖅᐸᒃᑕᕗᓪᓗ ᒪᓕᒋᐊᖃᖅᐳᑦ ᐅᒃᐱᕆᔭᐅᔪᓂᒃ, ᐃᓕᖅᑯᓯᕆᔭᐅᔪᓂᒃ, ᐊᓐᓂᕆᔭᐅᔪᓂᒃ ᐅᖃᐅᓯᕐᓄᓪᓗ ᐃᓄᖕᓄᑦ.
ᐃᓄᐃᑦ ᐃᓅᓂᕐᒥᓄᑦ ᖃᖓᑲᓪᓛᓗᖕᓂᑦ ᒪᓕᒐᖃᖃᑦᑕᖅᓯᒪᕗᑦ ᐃᓕᖅᑯᓯᕆᔭᐅᔪᓄᑦ ᑐᙵᕕᖃᖅᑎᑕᐅᓪᓗᑎᒃ ᖃᖓᑲᓪᓛᓗᖕᓂᑦ ᐊᓐᓂᕆᔭᐅᔪᓂᒃ ᐊᑐᖅᑕᐅᕙᒃᑐᓂᓪᓗ. ᑕᒪᒃᑯᐊ ᐊᓐᓂᕆᔭᐅᔪᑦ ᑐᓴᖅᑎᑦᑎᔾᔪᑕᐅᕙᓚᐅᖅᐳᑦ ᒪᒃᑯᖕᓂᖅᓴᓄᑦ ᐃᓄᖕᓄᑦ ᓄᑕᕋᑯᓘᓂᖏᓐᓂᑦ ᐅᓂᒃᑳᖅᑐᐊᑎᒍᑦ, ᐃᙱᐅᑎᑎᒍᑦ, ᐊᑐᓪᓚᕆᒃᐸᖕᓂᒃᑯᑦ ᐃᓕᖅᑯᓯᕆᔭᐅᕙᒃᑐᓂᒃ ᐅᓂᒃᑳᖅᑐᐊᓂᓪᓗ ᐅᖃᐅᓯᖃᖅᑐᓂᑦ ᑲᔪᓯᓂᖅᑕᖃᑦᑎᐊᕐᓂᖓᓂᑦ ᐊᑐᐊᓂᓕᒃᑯᑦ ᑕᒪᒃᑯᓂᖓ ᐃᖅᑲᐅᒪᓂᕆᔭᐅᔪᓂᒃ.
ᐅᓪᓗᒥ ᑕᒪᓐᓇ ᐊᑐᖅᑕᐅᕙᒃᑐᑐᖃᖅ ᑭᖑᓂᑦᑎᓐᓂᓗ ᐃᓕᖅᑯᓯᕆᔭᐅᕙᓚᐅᖅᑐᑦ ᑐᓴᖅᑎᑦᑎᓂᕐᒧᑦ ᑕᒪᒃᑯᓂᖓ ᐊᓐᓂᕆᔭᐅᔪᓂᒃ ᐅᓚᕕᑎᑕᐅᓯᒪᖕᒪᑕ ᓯᓚᑖᓃᑦᑐᓂᑦ ᐱᓕᕆᓂᕆᔭᐅᔪᓂᑦ ᓄᑖᓂᓪᓗ ᐱᓕᕆᓂᐅᖃᑦᑕᖅᑐᓂᑦ. ᓇᓂᓯᔭᕆᐊᖃᖅᑐᒍᑦ ᐊᑐᖅᑕᐅᔪᓐᓇᖅᑐᓂᒃ ᐊᖏᒡᓕᒋᐊᖅᑎᑦᑎᔾᔪᑕᐅᓂᐊᖅᑐᓂᒃ ᑕᒪᒃᑯᓂᖓ ᐅᒃᐱᕆᔭᐅᔪᓂᒃ ᐅᓪᓗᒥ ᖃᓄᐃᓕᐅᕐᓂᕆᖃᑦᑕᓕᖅᑕᑦᑎᓐᓄᑦ ᑕᒪᒃᑯᐊ ᐅᒃᐱᕆᔭᐅᔪᑦ ᐃᓚᓕᐅᔾᔭᐅᓕᕐᒥᓗᑎᒃ ᐊᓐᓂᕆᔭᐅᔪᓄᑦ ᐊᑐᖅᑕᐅᕙᒃᑐᓂ ᓄᓇᕗᒻᒧᑦ.
ᐊᒃᑐᐊᖃᑦᑕᐅᑎᓂᕐᒧᑦ ᐊᓐᓂᕆᔭᐅᔪᑦ - ᐊᒥᖅᑳᖅᐸᖕᓂᖅ, ᒥᖕᓂᑐᙱᓐᓂᖅ, ᐃᓚᒌᖕᓂᖅ, ᐃᒃᐱᒍᓱᑦᑎᐊᕐᓂᖅ, ᓇᒡᓕᒍᓱᖕᓂᖅ, ᓈᓚᖕᓂᖅ, ᐊᔾᔨᒌᒃᑎᑦᑎᓂᖅ.
ᐱᓕᕆᕙᖕᓂᕐᒧᑦ ᐊᓐᓂᕆᔭᐅᔪᑦ - ᐊᑭᓕᖅᓱᖅᑕᐅᓇᓂ ᐱᓕᕆᕙᖕᓂᖅ, ᓇᐅᑦᑎᖅᓱᕐᓂᖅ, ᐊᔪᕈᓐᓃᖅᓴᕐᓂᖅ, ᐊᔪᙱᑕᖃᓕᑦᑎᐊᕐᓂᖅ, ᐱᓕᕆᖃᑎᒌᒃᐸᖕᓂᖅ, ᑲᑐᔾᔨᖃᑎᒌᒃᐸᖕᓂᖅ, ᐊᑕᐅᓯᑦᑕᐃᓐᓇᕐᒨᖓᓂᖅ, ᐊᖏᖃᑎᒌᒃᓯᒪᓂᖅ ᓄᖑᕋᐃᓗᐊᖅᑕᐃᓕᒪᕙᖕᓂᕐᓗ.
ᐊᑐᖅᑕᖃᕐᓂᐊᕐᓗᓂ ᐊᓕᐊᓇᐃᑎᑦᑐᓂᒃ ᐊᓐᓂᕆᔭᐅᔪᑦ - ᐅᑕᖅᑭᑦᑎᐅᕈᓐᓇᕐᓂᖅ, ᐊᕗᖓᑲᓪᓚᒃ ᑕᐃᒪᐃᑦᑐᒦᑦᑐᓐᓴᕐᓂᖅ, ᐊᑐᕈᓐᓇᕐᓂᖅ ᐊᓯᐊᒍᖔᖅ, ᓴᙱᓂᖅ, ᐊᑐᓕᖅᓴᕋᐃᑦᑐᓐᓴᕐᓂᖅ ᖃᐅᔨᒪᓚᐅᙱᑕᒥᒃ, ᐊᓯᐊᒎᖅᓴᕋᐃᑦᑐᓐᓇᕐᓂᖅ, ᐃᓱᒪᒃᓴᖅᓯᐅᖅᓯᒪᑦᑎᐊᕈᓐᓴᕐᓂᖅ, ᓯᕗᒻᒧᐊᖅᐸᓪᓕᐊᓂᖅ, ᐊᕗᖓᑲᓪᓚᒃ ᑕᐅᑐᖕᓂᖅ, ᐆᒪᔪᓐᓇᕐᓂᖅ, ᐊᒃᑐᐊᖃᑦᑕᐅᑎᓯᒪᔪᓐᓇᕐᓂᖅ ᓱᓕᔪᓐᓇᕐᓂᕐᓗ.
ᑕᒪᒃᑯᐊ ᐊᓐᓂᕆᔭᐅᔪᑦ ᑐᙵᕕᖃᖅᑎᑕᐅᕗᑦ 8-ᓄᑦ ᒪᓕᒃᑕᐅᕙᓪᓕᐊᕙᒃᑐᓄᑦ ᓇᓗᓇᐃᔭᖅᓯᒪᔪᑎᑐᑦ ᐊᑖᓂ - ᑖᒃᑯᐊᑦᑕᐃᓐᓇᐃᓪᓗ ᓇᓂᔭᐅᔪᓐᓇᕆᓪᓗᑎᒃ ᐅᑯᓇᓂ, ᐱᓇᓱᐊᖅᑕᕗᑦ:
ᐃᓅᖃᑎᒌᑦᓯᐊᕐᓂᖅ: ᐃᒃᐱᒋᔭᖃᑦᑎᐊᕐᓂᖅ ᐃᓅᖃᑕᐅᔪᓂᒃ, ᐃᓅᖃᑎᒌᒃᐸᒃᑐᓂᒃ ᑲᒪᒋᔭᖃᑦᑎᐊᕐᓂᕐᓗ ᐃᓄᖕᓂᒃ.
- ᐃᒃᐱᒋᔭᖃᑦᑎᐊᕐᓂᖅ ᐊᓯᒥᓂᒃ ᑲᒪᒋᔭᖃᖅᐸᖕᓂᕐᓗ ᐊᔾᔨᒌᒃᑎᑦᑎᓗᓂᓗ ᐃᓕᖅᑯᓯᕆᔭᐅᕙᒃᐳᖅ ᐃᓐᓇᕐᓂᑦ ᐊᑐᖁᔭᐅᙲᓐᓇᐅᔭᖅᖢᓂ ᐅᖃᐅᔾᔪᐃᓕᕌᖓᒥᒃ (ᐅᖃᐅᔾᔪᓯᐊᑦ). ᒐᕙᒪᒃᑯᑦ ᐊᑐᖅᐸᒃᑕᖏᑦ ᐅᔾᔨᕈᓱᓕᖅᑎᑦᑎᓪᓗᐊᖅᐳᑦ ᑭᓇᑐᐃᓐᓇᒥᒃ ᐃᑲᔪᖅᑐᐃᙱᓐᓂᖅᓴᐅᙱᓐᓂᕐᒥᒃ.
ᑐᙵᓇᕐᓂᖅ: ᐃᓅᓯᑦᑎᐊᕙᖕᒥᒃᐊᑐᕐᓂᖅ ᒪᑐᐃᙶᑦᑎᐊᕐᓂᒃᑯᑦ, ᑐᙵᓇᕐᓂᒃᑯᑦ ᐊᑕᖐᑎᑦᑎᕙᖕᓂᒃᑯᓪᓗ.
- ᐃᖅᑲᓇᐃᔭᕐᕕᒋᔭᐅᔪᑦ ᐃᓄᖕᓄᑦ ᑐᙵᓇᖅᑎᑦᑕᕆᐊᖃᖅᐸᕗᑦ, ᑐᙵᓱᒃᑎᑦᑎᕙᒡᓗᑎᒃ ᐊᑐᖅᑕᐅᔪᒪᕙᒡᓗᑎᒃ ᓄᓇᕗᒻᒥ ᐃᓐᓇᕆᔭᐅᔪᓄᑦ, ᐱᓕᕆᖃᑎᒋᕙᒃᑕᑦᑎᓐᓄᑦ ᐊᓯᖏᓐᓄᓪᓗ. ᐲᖅᓯᓂᖅ ᐅᖃᐅᓯᕐᓄᑦ ᐃᓕᖅᑯᓯᕆᔭᐅᔪᓄᓪᓗ ᐊᔭᖅᑭᔾᔪᑕᐅᕙᒃᑐᓂᒃ ᐱᒻᒪᕆᐊᓘᕗᖅ ᑐᙵᓱᒃᑎᑦᑎᓂᐊᕐᓗᓂ ᐃᓄᖕᓂᒃ.
ᐱᔨᑦᓯᕐᓂᖅ: ᐱᔨᑦᑎᕋᕐᓂᖅ ᐱᓕᕆᕙᖕᓂᕐᓗ ᐃᓚᒌᓄᑦ ᐊᓐᒪᓗᓘᓐᓃᑦ ᓄᓇᓕᖕᓄᑦ.
- ᐱᓕᕆᐊᒃᓴᒥᓂᒃ ᐱᓕᕆᐊᖃᖅᑎᓪᓗᒋᑦ ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑏᑦ ᐱᓇᔪᖃᑦᑕᕐᓂᐊᖅᐳᑦ ᐃᓅᖃᑎᒌᖕᓂᕐᒥᓄᑦ ᐱᔨᑦᑎᕋᖃᑦᑕᐅᑎᓂᕐᒥᒃ ᓄᓇᓕᖕᓂᒡᓗ ᐊᔪᙱᓐᓂᓕᒫᑎᒃ ᐊᑐᕐᓗᒋᑦ.
ᐋᔩᖃᑎᒌᖕᓂᖅ: ᖃᓄᖅ ᐋᖅᑭᒃᓯᒪᓕᖅᑎᑦᑎᓂᖅ ᐅᖃᖃᑎᒌᖕᓂᒃᑯᑦ ᐊᖏᖃᑎᒌᖕᓂᒃᑯᓪᓗ.
- ᐱᒻᒪᕆᐊᓗᖕᓂᒃ ᑐᓴᐅᒪᖃᑦᑕᐅᑎᓂᕐᒧᑦ ᐋᖅᑭᒃᓯᓂᕐᒧᓪᓗ ᐋᖅᑭᒃᓯᒪᓕᖅᑎᑦᑎᔪᖃᕐᓂᐊᖅᐳᖅ ᕿᓂᖅᑐᖃᕐᓗᓂ ᐅᖃᐅᓯᐅᔪᒃᓴᓂᒃ ᐃᓄᑐᐃᓐᓇᓂᑦ, ᓵᙵᖃᑦᑕᐅᑎᓗᓂ ᑲᑎᒪᖃᑎᒌᖕᓂᒃᑯᑦ, ᐅᖃᓪᓚᖃᑎᒌᖕᓂᓪᓚᑦᑖᑎᒍᑦ, ᐋᖅᑭᒃᓱᐃᓂᒃᑯᓪᓗ ᐊᖏᖃᑎᒌᖕᓂᐅᖃᑦᑕᕋᔭᖅᑐᓂᒃ.
- ᐃᓄᐃᑦ ᐅᖃᐅᓯᖏᑦ ᐊᑐᖅᑕᐅᓪᓚᕆᖃᑦᑕᕐᓂᐊᖅᐳᑦ ᐅᖃᐅᓯᓪᓗᐊᑕᕆᔭᐅᓗᑎᒃ ᑐᓴᐅᒪᖃᑦᑕᐅᑎᔾᔪᑕᐅᓗᑎᒃ.
- ᓂᐱᖃᙱᓐᓂᖅ ᐃᓚᒋᔭᐅᕗᖅ ᑐᓴᐅᒪᖃᑦᑕᐅᑎᕙᖕᓂᕐᒧᑦ, ᓇᓗᓇᐃᖅᓯᔾᔪᑕᐅᕙᒐᓂᓗ ᐊᖏᖃᑎᒌᒃᑐᖃᕐᓂᖓᓂᒃ
ᐱᓕᒻᒪᒃᓴᕐᓂᖅ/ᐱᔭᕆᐅᖅᓴᓂᖅ: ᐱᐅᓯᒋᐊᖅᑎᑦᑎᓂᖅ ᐊᔪᙱᓐᓂᕆᔭᐅᔪᓂᒃ ᐊᔪᕈᓐᓃᖅᓴᖅᐸᖕᓂᒃᑯᑦ< ᐱᓇᔪᖕᓂᒃᑯᑦ ᐱᓕᕆᓂᒃᑯᓪᓗ.
- ᐃᖅᑲᓇᐃᔭᕐᕕᒋᔭᐅᔪᖅ ᑐᙵᓇᕐᓂᖅᓴᐅᓇᔭᖅᐳᖅ ᐊᓯᔾᔨᒐᕐᓂᕐᓗᓂᓗ ᐊᑐᖅᑎᑦᑎᓂᐊᖅᑎᓪᓗᒍ ᐃᓂᒃᓴᖃᖅᑎᑦᑎᓂᐊᖅᑎᓪᓗᒍᓘᓐᓃᑦ ᓄᑖᓄᑦ ᐃᓱᒪᓕᐅᕈᑕᐅᔪᓐᓇᖅᑐᓄᑦ ᐊᑐᖅᑕᐅᔪᓐᓇᖅᑐᓄᓪᓗ ᓴᖅᑭᑎᑕᐅᔭᕆᐊᓕᖕᓄᑦ.
- ᐃᓄᐃᑦ ᐃᖅᑲᓇᐃᔭᖅᑏᑦ ᐱᕕᒃᓴᖃᖅᑎᑕᐅᔭᕆᐊᖃᖅᐳᑦ ᐱᐅᓯᒋᐊᖅᑎᑦᑎᔪᓐᓇᕐᓗᑎᒃ ᐊᔪᙱᓐᓂᕆᔭᒥᓂᒃ ᐃᖅᑲᓇᐃᔭᕐᕕᒋᔭᒥᓂ ᐃᖅᑲᓇᐃᔭᕐᓇᐅᑎᓪᓗᒍ ᐊᑐᖅᑐᖃᕐᓗᓂ ᐊᑐᖅᑕᐅᔪᓐᓇᖅᑐᓂᒃ ᓲᕐᓗ ᐃᖅᑲᓇᐃᔭᕐᓗᓂ ᐊᔪᕈᓐᓃᖅᓴᖅᑎᑕᐅᕙᓪᓕᐊᓂᕐᒧᑦ, ᐱᓕᕆᕝᕕᒋᔭᐅᔪᒥ ᐊᔪᕈᓐᓃᖅᓴᕐᓂᒃᑯᑦ ᐱᓕᕆᔨᒻᒪᕆᐅᓂᕐᒧᓪᓗ ᐱᕙᓪᓕᐊᓂᕐᒧᑦ.
ᐱᓕᕆᖃᑎᒌᖕᓂᖅ/ᐃᑲᔪᖅᑎᒌᖕᓂᖅ: ᐱᓕᕆᖃᑎᒌᖕᓂᖅ ᐊᑕᐅᓯᕐᒧᑦ ᐱᔾᔪᑎᖃᕐᓗᑎᒃ.
- ᐃᓄᐃᓪᓗ ᐃᓅᙱᑦᑐᓪᓗ ᐃᖅᑲᓇᐃᔭᖅᑏᑦ ᐱᓕᕆᖃᑎᒌᖃᑦᑕᕆᐊᖃᖅᐳᑦ ᑐᙵᕕᖃᕐᓗᑎᒃ ᓇᖕᒥᓂᖅ ᖃᐅᔨᒪᓂᕆᔭᒥᓂᒃ ᐊᑐᖃᑦᑕᖅᓯᒪᔭᒥᓂᒡᓗ ᐋᖅᑭᒃᓱᐃᕙᓪᓕᐊᔪᒪᒧᑦ ᑐᑭᓯᐅᒪᖃᑦᑕᐅᑎᑦᑎᐊᕐᓂᕐᒥᒃ ᓈᒻᒪᒃᑐᑎᒍᓪᓗ ᐊᑐᕈᒪᒧᑦ ᐊᑐᖅᑕᐅᔪᓐᓇᖅᑐᓂᒃ ᐊᑐᖅᑐᖃᕐᓂᐊᖅᑎᓪᓗᒍ ᐱᓕᕆᐊᒃᓴᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒡᓗ.
- ᐱᔨᑦᑎᕋᑦᑎᐊᒃᑲᓐᓂᕈᓐᓇᖅᐳᒍᑦ ᑭᒃᑯᑐᐃᓐᓇᓂᒃ ᑕᐃᒪᓐᓇ ᐱᓕᕆᖃᑎᒌᖕᓂᒃᑯᑦ ᑕᒪᒃᑭᕐᓗᑕᓗ ᑐᑭᓯᐅᒪᓂᒃᑯᑦ ᐃᖅᑲᓇᐃᔭᕐᕕᒋᔭᐅᔪᓂ.
ᖃᓄᖅᑑᕐᓂᖅ: ᖃᓄᖅᑑᕈᓐᓇᑦᑎᐊᕐᓂᖅ ᐃᓱᒪᒃᓴᖅᓯᐅᕈᑎᖃᕈᓐᓇᑦᑎᐊᕐᓂᕐᓗ.
- ᐃᓄᐃᑦ ᕿᓃᓐᓇᐅᔭᕆᐊᖃᓚᐅᖅᓯᒪᔪᑦ ᓄᑖᓂᒃ ᐊᑐᕈᓐᓇᖅᑕᒥᓂᒃ ᐆᒪᓇᓱᒍᑎᒋᔪᓐᓇᕐᓗᒋᑦ. ᐱᒻᒪᕆᐊᓘᕗᖅ ᒐᕙᒪᒃᑯᓐᓄᑦ ᐃᓕᓴᖅᓯᔪᓐᓇᕐᓗᑎᒃ ᕿᓃᓐᓇᐅᔭᕆᐊᖃᕐᓂᑦᑎᓐᓂᒃ ᐊᔾᔨᒌᙱᕈᓘᔭᖅᑐᓂᒃ ᐊᒥᓱᓂᒃ ᐱᕕᒃᓴᐅᔪᓐᓇᖅᑐᓂᒃ ᓯᕗᒻᒧᐊᖅᐸᓪᓕᐊᓂᐊᕈᑦᑕ.
ᐊᕙᑎᑦᑎᓐᓂᒃ ᑲᒪᑦᓯᐊᕐᓂᖅ: ᐃᒃᐱᒋᔭᖃᑦᑎᐊᕐᓂᖅ ᑲᒪᑦᑎᐊᕐᓂᕐᓗ ᓄᓇᒥᒃ, ᓂᕐᔪᑎᓂᒃ ᐊᕙᑎᒥᒡᓗ.
- ᑖᓐᓇ ᓴᙱᔪᒻᒪᕆᐅᕗᖅ ᐃᓄᐃᑦ ᐃᓅᖃᑎᒌᒃᐸᖕᓂᕐᒧᑦ ᐊᓐᓂᕆᓪᓗᓂᔾᔪᒃ ᐆᒪᑎᑦᑎᓯᒪᓪᓗᓂᓗ ᐃᓄᖕᓂᒃ ᐊᑯᓂᒻᒪᕆᐊᓗᒃ ᐅᓪᓗᒥᓗ ᑕᐃᒪᓐᓇᑦᑎᐊᖅ ᐱᒻᒪᕆᐅᑎᒋᓪᓗᓂ ᓱᓕ.
|
