ᓗᐃ ᑕᐹᕐᔪᒃ ᓂᕈᐊᖅᑕᐅᓚᐅᖅᓯᒪᔪᖅ ᑐᒡᓕᐊᓂ ᓄᓇᕗᑦ ᒐᕙᒪᖃᓕᖅᑎᓪᓗᒍ ᕕᕝᕗᐊᕆ 16, 2004-ᖑᓕᖅᑎᓪᓗᒍ ᐊᕕᒃᑐᕐᓂᐅᔪᓂ ᓂᕈᐊᕐᓂᖃᖅᑎᓪᓗᒋᑦ. ᓂᕈᐊᖅᑕᐅᓕᓚᐅᕆᕗᖅ ᑲᑎᒪᔨᖃᑎᖏᓐᓄᑦ ᑲᑎᒪᔩᑦ ᒥᓂᔅᑕᖏᓐᓄᑦ ᑎᓕᔭᐅᓪᓗᓂ ᑕᐃᑲᙵᑦ ᒥᓂᔅᑕᐅᓂᕐᒥᓄᑦ ᐃᓕᖅᑯᓯᓕᕆᔨᒃᑯᓐᓄᑦ ᐃᖅᑲᓇᐃᔭᖅᑐᓕᕆᔨᒃᑯᓐᓄᓪᓗ.
ᓗᐃ ᐃᓅᓚᐅᖅᑐᖅ ᔭᓄᐊᕆ 30, 1953-ᖑᑎᓪᓗᒍ ᐃᒡᓗᕕᒐᕐᒥ ᓯᑯᒦᑦᑐᒥᑦ ᐊᒡᒎᓂᕋᖅᑕᐅᔪᒥᑦ ᐅᐊᓕᓂᖅᐸᓯᖕᒥᑦ ᐅᐊᖕᓇᖓᓂ ᐃᒡᓗᓕᐅᑉ ᕼᐋᒻᓚᖓᓂ. ᓄᑕᕋᑯᓘᑎᓪᓗᒍ ᓱᓕ, ᖃᑕᙳᑎᒋᔭᖏᑦ ᐃᒡᓗᓕᖕᒧᑦ ᓅᓕᓚᐅᖅᑐᑦ ᐱᕈᖅᓴᕐᕕᒋᓕᖅᖢᓂᐅᒃ. ᑲᑎᒪᔨᐅᓚᐅᖅᓯᒪᔪᖅ ᒪᐃᔭᐅᒋᓪᓗᓂ ᐃᒡᓗᓕᖕᒥ.
ᓗᐃ ᐊᐅᓪᓚᖅᑎᑕᐅᓚᐅᖅᓯᒪᔪᖅ ᓯᕗᓪᓕᖅᐹᒥ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕆᐊᖅᑎᑕᐅᓪᓗᓂ 1959-ᖑᑎᓪᓗᒍ ᑕᐃᑲᓂ ᐱᔭᕇᓚᐅᖅᑐᖅ ᓄᑕᖅᑲᓄᑦ ᐃᓕᓐᓂᐊᕐᓂᕆᕙᒃᑕᖏᓐᓂᒃ.
ᓗᐃ ᐃᖅᑲᓇᐃᔭᕐᓂᕐᒧᑦ ᐱᒋᐊᓚᐅᖅᓯᒪᕗᖅ ᐃᒡᓗᓕᐅᑉ ᑯᐊᐸᒃᑯᖏᓐᓂ ᐊᕐᕌᒍᖃᖅᑎᓪᓗᒍ 12-ᓂᒃ ᓴᖅᑭᑎᕆᔨᐅᓪᓗᓂ ᐊᐅᓚᑦᑎᔨᐅᓕᓚᐅᖅᖢᓂᖢ. ᐅᐊᑦᑎᐊᕈᙳᒃᑲᓐᓂᕐᒪᑦ, ᓂᕈᐊᖅᑕᐅᓕᓚᐅᖅᑐᖅ ᐃᒡᓗᓕᐅᑉ ᑯᐊᐸᒃᑯᑦ ᑲᑎᒪᔨᖏᓐᓄᑦ ᑭᒡᒐᖅᑐᐃᔨᐅᓪᓗᓂ ᐅᑭᐅᖅᑕᖅᑐᒥ ᑯᐊᐸᒃᑯᑦ ᓕᒥᑕᑦᑯᓐᓂ ᐊᖓᔪᖅᑳᕆᔭᐅᓚᐅᕆᓪᓗᓂ ᑕᐃᑲᓂ ᐅᑭᐅᖅᑕᖅᑐᒥ ᑯᐊᐸᒃᑯᑦ ᓕᒥᑕᒃᑯᑦ ᐱᕙᓪᓕᐊᓕᖅᑎᓪᓗᒋᑦ.
ᓗᐃ ᐱᓕᕆᐊᕆᖃᑕᐅᓯᒪᑦᑎᐊᓚᐅᕐᒥᔭᖓ ᓄᓇᕗᒻᒥ ᓄᓇᑖᕋᓱᐊᖅᑎᓪᓗᒋᑦ ᐋᔩᖃᑎᒌᖕᓂᕐᒥᑦ ᑲᑎᒪᔨᐅᖃᑕᐅᒋᓪᓗᓂ ᑐᙵᕕᒃ ᐃᓚᒌᒃᓴᑦ ᓄᓇᕘᖑᑎᓪᓗᒍ, ᐊᖓᔪᖅᑳᖑᓚᐅᕐᒥᖕᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ (BRIA, ᒫᓐᓇ QIA-ᖑᓂᕋᑦᑕᐅᓕᖅᑐᖅ). ᐅᖃᖅᑎᐅᒻᒪᕆᓚᐅᕐᒪᑦ ᐃᓄᐃᑦ ᐱᖅᑯᓯᖏᓐᓂ ᐅᖃᐅᓯᖏᓐᓂᓪᓗ ᐅᔾᔨᕆᔭᐅᓯᒪᓪᓗᓂᓗ ᐃᓄᖕᓄᑦ ᐅᖃᖅᑎᒋᔭᐅᓂᕐᒥᓄᑦ ᐃᒃᐱᒋᔭᐅᔪᓄᑦ ᑲᑎᒪᔨᐅᖃᑎᒥᖕᓂᑦ.
ᓗᐃ ᓱᓕ ᒫᓐᓇᒧᑦ ᓄᓇᖃᖅᑐᖅ ᐃᒡᓗᓕᖕᒥ ᓄᓕᐊᓂᓗ, ᓘᓯ, ᐱᖓᓱᓪᓗ ᕿᑐᕐᖓᖏᑦ. ᒪᕐᕉᖕᓂᓪᓗ ᐃᕐᓂᖃᖅᑑᒃ ᐱᕈᖅᓴᐃᔪᑦ ᖃᑕᙳᑎᒋᔭᖏᓐᓂᒃ ᐃᒡᓗᓕᖕᒥᐅᑕᐅᒋᓪᓗᑎᒃ.
