ᓕᐅᓇ ᐊᒡᓗᒃᑲᖅ ᓂᕈᐊᖅᑕᐅᓚᐅᖅᑐᖅ ᓇᑦᑎᓕᒻᒧᑦ ᒪᓕᒐᓕᐅᖅᑎᐅᓂᕐᒧᑦ (ᓄᓇᓖᑦ ᑭᒡᒐᑐᖅᑕᖏᒃ ᐅᖅᓱᖅᑑᖅ ᐊᒻᒪᓗ ᑕᓗᕐᔪᐊᖅ) ᓂᕈᐊᕐᓇᐅᑎᓪᓗᒍ ᕕᕝᕗᐊᓕ 16, 2004-ᒥ.
ᒥᔅ ᐊᒡᓗᒃᑲᖅ ᓂᕈᐊᖅᑕᐅᓕᓚᐅᕐᒥᔪᖅ ᒪᓕᒐᓕᐅᖅᑎᐅᖃᑎᒥᓄᑦ ᐊᐅᓚᑦᓯᔩᑦ ᑲᑎᒪᔨᖏᓐᓄᑦ ᒫᑦᓯ 5, 2004-ᖑᑎᓪᓗᒍ. ᒥᓂᔅᑕᓐᖑᖅᑎᑕᐅᓚᐅᖅᑐᖅ ᑮᓇᐅᔭᓕᕆᔨᒃᑯᓐᓄᑦ ᐊᒻᒪᓗ ᑎᓕᔭᐅᓪᓗᓂ ᒐᕙᒪᒃᑯᑦ ᑲᑎᒪᕕᖓᓂ ᓯᕗᓕᐅᖅᑎᐅᓂᕐᒧᑦ.
ᒥᔅ ᐊᒡᓗᒃᑲᖅ ᐃᓅᓯᒪᔪᖅ ᐅᑭᐅᖅᑕᖅᑐᒥ ᐱᕈᖅᓴᔭᐅᓯᒪᓪᓗᓂ ᑖᒻ ᐸᐃᒥ, ᑕᓗᕐᔪᐊᕐᒥ ᐊᒻᒪᓗ ᐅᖅᓱᖅᑑᕐᒥ.
ᒥᔅ ᐊᒡᓗᒃᑲᖅ ᖁᕕᐊᒍᑎᖃᖅᓯᒪᔪᖅ ᐃᖅᑲᓇᐃᔭᖃᑦᑕᖅᓯᒪᓂᕐᒥᓄᑦ ᒐᕙᒪᒃᑯᓐᓂ ᑕᒪᒃᑮᓐᓂ ᓄᓇᑦᓯᐊᕐᒥ ᓄᓇᕗᒻᒥᓗ. ᐃᖅᑲᓇᐃᔭᖅᓯᒪᔪᖅ ᐃᓪᓗᓕᕆᔨᕐᔪᐊᒃᑯᓐᓂ ᐊᒻᒪᓗ ᑮᓇᐅᔭᓕᕆᔨᒃᑯᓐᓂ, ᐊᐅᓚᑦᓯᔨᐅᖃᑕᐅᓂᕐᒧᑦ ᐃᖅᑲᓇᐃᔭᖃᑦᑕᖅᓯᒪᒻᒥᔪᖅ ᐃᖅᑲᓇᐃᔭᖅᑐᓕᕆᔨᒃᑯᓐᓂ, ᐃᓕᓐᓂᐊᕐᓂᓕᕆᔨᒃᑯᓐᓂ, ᐃᓕᖅᑯᓯᓕᕆᔨᒃᑯᓐᓂᑦ ᐃᖅᑲᓇᐃᔭᖅᑐᓕᕆᔨᒃᑯᓐᓂᓗ.
ᒥᔅ ᐊᒡᓗᒃᑲᖅ ᒥᓂᔅᑕᐅᑉ ᑐᒡᓕᐊᓄᑦ ᐃᑲᔪᖅᑎᐅᓯᒪᔪᖅ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ, ᐊᒻᒪᓗ ᒐᕙᒪᒃᑯᑦ ᓄᓇᓕᓐᓄᑦ ᓄᑦᑎᖅᑎᕆᕙᓪᓕᐊᓂᕐᒧᑦ ᑎᑎᕋᕐᕕᖓᓐᓂ.
ᓯᑎᐱᕆ 2000-ᒥᒃ ᐃᐳᓗ 2002-ᒧᑦ, ᒥᔅᑕ ᐊᒡᓗᒃᑲᖅ ᑎᑎᕋᖅᑎᒧᑦ ᑐᒡᓕᒋᔭᐅᓚᐅᖅᑐᖅ ᓄᓇᕗᑦ ᒪᓕᒐᓕᐅᕐᕕᐊᓂ. ᓂᕈᐊᖅᑐᓚᐅᖅᑎᓐᓇᒍ ᒥᓂᔅᑕᐅᑉ ᑐᒡᓕᕆᓚᐅᖅᑕᖓ ᐃᓕᖅᑯᓯᓕᕆᔨᒃᑯᓐᓂ ᓄᓇᕗᑦ ᒐᕙᒪᒃᑯᖏᓐᓂ.
ᒥᔅ ᐊᒡᓗᒃᑲᖅ ᑲᑎᒪᔨᐅᖃᑕᐅᖃᑦᑕᖅᓯᒪᔪᖅ ᐊᔾᔨᒌᓐᖏᑦᑐᓂ ᓲᕐᓗ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᐅᑉ ᑲᑎᒪᔨᖏᓐᓂ, ᓄᓇᕗᒻᒥ ᓄᓇᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓂ ᐊᒻᒪᓗ ᓄᓇᑦᓯᐊᕐᒥ ᖃᐅᔨᓴᖅᑐᓕᕆᔨᒃᑯᓐᓄᑦ. ᐊᕐᕌᒍᓂᒃ 6-ᓂᒃ ᕼᐊᒻᓚᒃᑯᓐᓄᑦ ᑲᑎᒪᔨᐅᓯᒪᒻᒥᔪᖅ ᐃᖃᓗᑦᑑᑦᑎᐊᕐᒥ.
